ກອງປະຊຸມເຊື່ອມຊຶມ ແລະ ຜັນຂະຫຍາຍນິຕິກຳສຳຄັນຂອງພັກ-ລັດ ໄດ້ຈັດຂຶ້ນໃນວັນ​ທີ 26 ກຸມພາ 2020 ໂດຍການເປັນປະທານຂອງ ທ່ານ ປອ ກອງແກ້ວ ໄຊສົງຄາມ ກໍຳມະການສູນກາງພັກ ເລຂາພັກແຂວງ ເຈົ້າແຂວງບໍລິຄຳໄຊ, ມີຄະນະປະຈຳ ແລະ ກຳມະການພັກແຂວງ, ຄະນະປະຈຳພັກເມືອງ 7 ຕົວເມືອງ, ຄະນະພັກຈາກພະແນກການອ້ອມຂ້າງແຂວງ ແລະ ບັນດາພະແນກການ ເຂົ້າຮ່ວມ.

ໃນພິທີ ທ່ານປະທານ ໄດ້​ຍົກ​ໃຫ້​ເຫັນ​ຫຼາຍເອກະສານສຳຄັນ ເຊັ່ນ: ບົດເຜີຍແຜ່ຜົນສຳເລັດກອງປະຊຸມ ຄັ້ງທີ 42 ຂອງຄະນະກຳມະການຮ່ວມມືທະວິພາຄີ ລະຫວ່າງສອງລັດຖະບານ ລາວ ແລະ ຫວຽດນາມ ທີ່ໄດ້ຈັດຂຶ້ນໃນວັນທີ 4 ມັງກອນ 2020 ທີ່ ຮ່າໂນ້ຍ ສສ ຫວຽດນາມ ເຊິ່ງກອງປະຊຸມດັ່ງກ່າວ ໄດ້ຕີລາຄາ ສະພາບການຈັດຕັ້ງປະຕິບັດ ຂໍ້ຕົກລົງວ່າດ້ວຍການຮ່ວມມື ປີ 2019 ໃນຂໍສະດວກ, ຂໍ້ຫຍຸ້ງຍາກ ແລະ ໄດ້ວາງທິດທາງການຮ່ວມມື ໃນປີ 2020 ບົນພື້ນຖານການຈັດຕັ້ງຜັນຂະຫຍາຍເນື້ອໃນຈິດໃຈການຊີ້ນຳຂອງສອງກົມການເມືອງ ໃຫ້ເປັນອັນລະອຽດ ເປັນຕົ້ນແມ່ນ ການສືບຕໍ່ຮັກສາມູນເຊື້ອ ດ້ານການເມືອງ – ການຕ່າງປະເທດ, ປ້ອງກັນຊາດ, ປ້ອງກັນຄວາມສະຫງົບ, ດ້ານການຄ້າ, ການລົງທຶນ, ຄົມມະນາຄົມ-ຂົນສົ່ງ, ການຮ່ວມມືດ້ານອຸດສະຫະກຳ, ພະລັງງານ, ການຮ່ວມມືດ້ານການສຶກສາ ແລະ ພັດທະນາຊັບພະຍາກອນມະນຸດ, ການຮ່ວມມືລະຫວ່າງບັນດາກະຊວງ, ອົງການ, ຂະແໜງການ, ອົງການຈັດຕັ້ງມະຫາຊົນ, ບັນດາທ້ອງຖິ່ນ ແລະ ການຊ່ວຍເຫຼືອລ້າຂອງຫວຽດນາມແກ່ລາວ.

ໃນກອງປະຊຸມ ຍັງໄດ້ຮັບຟັງການເຜີຍແຜ່ຄຳສັ່ງ ຂອງກົມການເມືອງສູນກາງພັກ ສະບັບເລກທີ 095/ກມສພ, ລົງວັນທີ 22 ມັງກອນ 2020 ວ່າດ້ວຍການກະກຽມ ແລະ ສະເຫຼີມສະຫຼອງ ບັນດາວັນສຳຄັນປະຫວັດສາດລະດັບຊາດ ໃນປີຂອງ 2020 ແລະ ເອກະສານການຮ່ວມມືພັດທະນາແລວທາງເສດຖະກິດລາວ-ຈີນ 2019-2030 ໂດຍໄດ້ມີເນື້ອໃນເວົ້າເຖິງຄວາມໝາຍຄວາມສຳຄັນ ແລະ ແນວຄວາມຄິດລວມ ຂອງການພັດທະນາແລວທາງເສດຖະກິດລາວ-ຈີນ, ຂົງເຂດການຮ່ວມມືຕົ້ນຕໍ ແລະ ທີ່ມີຄວາມສຳຄັນ ແລະ ມາດຕະການຄ້ຳປະກັນ.

Medialaos bolikhamxay