ຄະນະກວດກາສູນກາງພັກ ແລະ ອົງການກວດກາ ລັດຖະບານ ມອບເງິນຕ້ານພະຍາດ ໂຄວິດ -19

0
299

ໃນ​ວັນ​ທີ 24 ກຸມພາຜ່ານ​ມາ ຄະນະ​ກວດກາ​ສູນ​ກາງພັກ ແລະ ອົງການ​ກວດກາ​ລັດຖະບານ ນໍາ​ໂດຍ ທ່ານ ທຸມ​ມີ ທໍາ​ມະ​ວົງ ຫົວໜ້າ​ຫ້ອງການ ຄະນະ​ກວດກາ​ສູນ​ກາງ​ພັກ ແລະ ອົງການ​ກວດກາ ​ລັດຖະບານ ພ້ອມ​ດ້ວຍ​ຄະນະ ໄດ້ນຳ​ເງິນ ຈໍາ​ນວນ 100 ລ້ານ​ກີບ  ໄປ​ມອບ​ໃຫ້ ກະຊວງ​ພະລັງງານ ແລະ ບໍ່​ແຮ່ ແລະ ຮັບ​ໂດຍ ທ່ານ ຄໍາ​ມະນີ ອິນ​ທິ​ລາດ ລັດຖະມົນຕີ​ ກະຊວງພະລັງງານ ແລະ ບໍ່​ແຮ່ ປະທານ​ສະມາຄົມ​ມິດຕະພາບ​ລາວ​-​ຈີນ ຂັ້ນ​ສູນ​ກາງ.

ການມອບ​ເງິນ​ໃນຄັ້ງ​ນີ້, ແມ່ນ​ເພື່ອ​ເປັນ​ການ​ປະກອບສ່ວນ​ຊ່ວຍເຫຼືອໃນ​ການ​ປ້ອງ​ກັນການ​ສະກັດ​ກັ້ນ ແລະ ຕ້ານ​ການ​ລະບາດຂອງ​ພະຍາດ​​ອັກເສບ​ປອດຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່ ຫຼື ໂຄ​ວິດ-19 ພ້ອມ​ທັງ​ສະແດງ​ຄວາມ​ເຫັນໃຈ​ຕໍ່​ລັດຖະບານ ແລະ ປະຊາຊົນ​ຈີນ ໂດຍ​ສະເພາະ ບັນດາ​ຍາດ​ພີ່ນ້ອງ ຜູ້​ໄດ້​ຮັບ​ເຄາະ​ຮ້າຍ​ຈາກ​ການ​ແຜ່​ລະບາດ​ຂອງ​ພະຍາດ​ດັ່ງກ່າວ​ນີ້.

ໂອກາດ​ນີ້, ທ່ານ ຄໍາ​ມະນີ ອິນ​ທິ​ລາດ ກໍ​ໄດ້​ສະແດງ​ຄວາມ​ຂອບໃຈ​ຕໍ່ຄະນະ​ກວດກາ​ສູນ​ກາງ​ພັກ ແລະ ອົງການ​ກວດກາ​ລັດຖະບານ ທີ່​ເຫັນ​ຄວາມ​ສຳຄັນ ເປັນ​ຫ່ວງ​ເປັນ​ໄຍ ແລະ ນຳ​ເງິນ​ຈໍາ​ນວນ​  ດັ່ງກ່າວມາ​ມອບ​ເພື່ອ​ປະກອບສ່ວນ​ໃນ​ການ​ສະກັດ​ກັ້ນ ແລະ ປ້ອງ​ກັນ​ການ​ລະບາດ​ຂອງ​ພະຍາດ​ດັ່ງກ່າວ ຊຶ່ງ​ເງິນ​ຈຳນວນ​ດັ່ງກ່າວ​ນີ້ຈະ​ນຳໄປ​ມອບ​ຕໍ່ໃຫ້​ລັດຖະບານ ສປ ຈີນ ເພື່ອ​ນໍາ​ໃຊ້​ເຂົ້າ​ໃນ​ວຽກ​ງານ​ດັ່ງກ່າວ ໃຫ້​ເກີດ​ປະໂຫຍດ​ສູງ​ສຸດ.

Medialaos MMD