ບໍລິຄຳໄຊ – ບືງການ ຈັດກອງປະຊຸມປະສານງານປະຈໍາພື້ນທີ່ເພື່ອສະກັດກັ້ນ ແລະ ແກ້ໄຂບັນຫາຢາເສບຕິດຕາມຊາຍແດນ

0
214

ຕອນເຊົ້າວັນທີ 26 ກຸມພາ 2020 ນີ້, ຢູ່ທີ່ຫ້ອງປະຊຸມເບີ 2 ຂອງແຂວງບໍລິຄໍາໄຊ ໄດ້ຈັດກອງປະຊຸມໜ່ວຍປະສານງານປະຈຳພື້ນທີ່ ເພື່ອສະກັດກັ້ນ ແລະ ແກ້ໄຂບັນຫາຢາເສບຕິດຕາມຊາຍແດນ ລະຫວ່າງ ແຂວງບໍລິຄຳໄຊ ສປປ ລາວ ແລະ ແຂວງບືງການຣາຊາອານາຈັກໄທ, ຝ່າຍລາວນຳໂດຍທ່ານ ພັນເອກ ຄຳແດງ ແພງພົງພັນ ຫົວໜ້າການທະຫານກອງບັນຊາການທະຫານແຂວງ, ຫົວໜ້າໜ່ວຍປະສານງານປະຈຳພື້ນທີ່ແຂວງບໍລິຄຳໄຊ ພ້ອມຄະນະ, ຝ່າຍຣາຊາອານາຈັກໄທ ນຳໂດຍທ່ານ ພັນຕຳຫຼວດເອກ ສົມສັກ ຄົງໄພບຸນ ຮອງຜູ້ບັງຄັບການຕຳຫຼວດພູທອນແຂວງບືງການ ພ້ອມຄະນະ.

ພາຍຫຼັງທີ່ຕາງໜ້າຝ່າຍລາວ ແລະ ຝ່າຍໄທ ໄດ້ກ່າວເປີດກອງປະຊຸມແນະນໍາບັນດາຜູ້ແທນກອງປະຊຸມສໍາເລັດ, ທັງສອງຝ່າຍກໍ່ໄດ້ພັດປ່ຽນກັນລາຍງານສະພາບການຈັດຕັ້ງປະຕິບັດວຽກງານໄລຍະ 01 ເດືອນຜ່ານມາ ໃຫ້ກັນຮັບຊາບ, ໃນນັ້ນ ໜ່ວຍປະສານງານສະກັດກັ້ນ ແລະ ແກ້ໄຂບັນຫາຢາເສບຕິດຕາມຊາຍແດນ ສາມາດມ້າງຄະດີໄດ້ 02 ເລື່ອງ, ຍຶດຂອງກາງປະເພດຢາໄອ້ 30 ເປົາ ນໍ້າໜັກ 698 ກິໂລກຼາມ, ຍຶດກັນຊາແຫ້ງອັດແທ່ງໄດ້ 15 ເປົາ ນໍ້າໜັກ 609 ກິໂລກຼາມ, ລົດໃຫຍ່ 01 ຄັນ.

ໂອກາດດຽວກັນບັນດາຜູ້ແທນກອງປະຊຸມກໍ່ໄດ້ພັດປ່ຽນກັນປະກອບຄໍາຄິດຄໍາເຫັນຢ່າງກົງໄປກົງມາບົນພື້ນຖານລະບຽບຫຼັກການ, ຄວາມສາມັກຄີ, ການຊ່ວຍເຫຼືອເຊີ່ງກັນ ແລະ ກັນ ລະຫວ່າງ 02 ແຂວງ, 02 ປະເທດໃນການເຄື່ອນໄຫວເຮັດໜ້າທີ່ວຽກງານວິຊາສະເພາະເພື່ອສະກັດກັ້ນ ແລະ ແກ້ໄຂບັນຫາຢາເສບຕິດຕາມຊາຍແດນ, ພ້ອມທັງສ້າງບົດບັນທຶກຮ່ວມກັນ ເຊີ່ງເນື້ອໃນແມ່ນສອງຝ່າຍຈະສືບຕໍ່ປະສານສົມທັບຮ່ວມມືກັນໃນການເຄື່ອນໄຫວວຽກງານວິຊາສະເພາະ, ການສືບຂ່າວ, ເກັບກໍາສະພາບ, ລົງກວດກາຈຸດຂ້າມລອຍ, ອອກກວດກາລາດຕະເວນທາງບົກ ແລະ ທາງນໍ້າຮ່ວມກັນ, ໃນກໍລະນີມີບັນຫາໃດໜຶ່ງເກີດຂຶ້ນໃນຂອບເຂດບໍລິເວນຊາຍແດນໃຫ້ທັງສອງກໍາລັງປະສານສົມທົບປຶກສາຫາລື ເພື່ອພ້ອມກັນແກ້ໄຂໃຫ້ທັນກັບສະພາບການ, ສ້າງສາຍພົວພັນການໄປມາຫາສູ່, ເພື່ອແລກປ່ຽນບົດຮຽນ, ປະສານສົມທົບກັນຕິດຕາມການເຄື່ອນໄຫວເໜັງຕິງຂອງກຸ່ມຄົນບໍ່ດີຮ່ວມກັນ, ເອົາໃຈໃສ່ຕ້ານ ແລະ ສະກັດກັ້ນບັນຫາການຄ້າ – ຂາຍຢາເສບຕິດ, ຄ້າ – ຂາຍເຖື່ອນ, ການເຄື່ອນຍ້າຍຊັບພະຍາກອນທໍາມະຊາດທີ່ຜິດຕໍ່ລະບຽບກົດໝາຍ, ສ້າງກິດຈະກໍາຮ່ວມກັນເນື່ອງໃນໂອກາດວັນສໍາຄັນຕ່າງໆເພື່ອເພີ່ມຄວາມສາມັກຄີລະຫວ່າງ 02 ແຂວງ, 02 ປະເທດໃຫ້ແໜ້ນແຟ້ນ.

ສອງຝ່າຍຍັງໄດ້ຄົ້ນຄ້ວາຢ່າງລະອຽດຖີ່ຖ້ວນຕໍ່ບັນດາເນື້ອໃນທີ່ໄດ້ລະບຸໄວ້ໃນບົດບັນທຶກສະບັບນີ້ໂດຍອິງໃສ່ສະພາບຄວາມເປັນຈິງ ເພື່ອສ້າງທິດທາງແຜນການ ແລະ ພ້ອມກັນນໍາໄປຈັດຕັ້ງປະຕິບັດໃຫ້ໄດ້ຮັບຜົນສໍາເລັດຢ່າງມີປະສິດທິຜົນສູງ ແນ່ໃສ່ເຮັດໃຫ້ບໍລິເວນຂອບເຂດຊາຍຂອງ 02 ແຂວງມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ.

Medialaos bolikhamxay