ພາບປະກອບ

ການລະບາດຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ ໄວຣັດໂຄວິດ-19 (COVID-19) ໄດ້ສົ່ງຜົນກະທົບຕໍ່ຂະແໜງ ການທ່ອງທ່ຽວ ຂອງ ສປປ ລາວ ຢ່າງໜັກໜ່ວງ ເນື່ອງ ຈາກວ່າຕົວເລກນັກທ່ອງທ່ຽວທີ່ມາຈາກ ຫລື ຜ່ານທາງປະເທດ ຈີນ ແລະ ສ.ເກົາຫລີ ໃນປັດຈຸບັນ ກາຍເປັນສູນທັງໝົດ.

ທ່ານ ບຸນມາ ເພັດສາວົງ ຫົວໜ້າກົມຄຸ້ມຄອງການທ່ອງທ່ຽວ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໃຫ້ສຳພາດໃນວັນທີ 26 ກຸມພາ ນີ້ວ່າ: ຜົນກະທົບຕໍ່ຂະແໜງ ການທ່ອງທ່ຽວໃນຄັ້ງນີ້, ແມ່ນຮ້າຍແຮງທີ່ສຸດໃນປະຫວັດສາດ ການທ່ອງທ່ຽວຂອງປະເທດເຮົາ ຍ້ອນວ່າການຂົນສົ່ງນັກທ່ອງທ່ຽວ ລະຫວ່າງປະເທດ ເປັນອຳມະພາດ ເພາະວ່າມີການໂຈະຖ້ຽວບິນ ຊົ່ວຄາວ ຫລາຍສາຍການບິນ, ເຊິ່ງບັນດາຖ້ຽວບິນເຫລົ່ານັ້ນ ແມ່ນເສັ້ນທາງຫລັກທີ່ ນຳນັກທ່ອງທ່ຽວ ເຂົ້າມາ ສປປ ລາວ.

 ມາຮອດປັດຈຸບັນ, ຫລາຍປະເທດໄດ້ຫ້າມ ບໍ່ໃຫ້ນັກທ່ອງທ່ຽວເດີນທາງໄປປະເທດຈີນ, ຮອງກົງ, ມາເກົາ, ໄຕ້ຫວັນ, ເກົາຫລີໃຕ້, ຍີ່ປຸ່ນ ແລະ ປະເທດອື່ນໆ ທີ່ມີຄວາມສ່ຽງສູງ ເຊິ່ງເຮັດໃຫ້ມີການໂຈະຖ້ຽວບິນໄປປະເທດນັ້ນໆ ຈົນກວ່າສະພາບການ ຈະເຂົ້າສູ່ປົກກະຕິ ດ້ວຍເຫດນີ້ ນັກທ່ອງທ່ຽວທີ່ຕ້ອງການເດີນທາງຜ່ານ ບັນດາປະເທດເຫລົ່ານີ້ ແມ່ນບໍ່ສາມາດໄປໄດ້. ໃນຂະນະດຽວກັນ, ບັນດາຜູ້ປະກອບການທຸລະກິດ ສະຖານທີ່ພັກແຮມ, ທຸລະກິດນຳທ່ຽວ ທີ່ຖືກຜົນກະທົບແຮງກວ່າ ກໍໄດ້ສະເໜີຜ່ານກົມຄຸ້ມຄອງການທ່ອງທ່ຽວ ໂດຍມີຈຸດປະສົງ ໃຫ້ທາງລັດຖະບານຊ່ວຍເຫລືອ ໂດຍການຫລຸດ ຜ່ອນພັນທະບາງຢ່າງ ເຊັ່ນ: ອາກອນກຳໄລ, ອາກອນ ລາຍໄດ້, ດອກເບ້ຍທະນາຄານ ແລະ ພັນທະອື່ນໆ ເພື່ອໃຫ້ພາກທຸລະກິດດັ່ງກ່າວ ສາມາດຜ່ານຜ່າວິກິດການຄັ້ງນີ້. ປັດຈຸບັນ ການຈອງໂຮງແຮມ ແລະ ເຮືອນພັກ ແມ່ນຖືກຍົກເລີກໄປແລ້ວປະມານ 95% ແລະ ຈຳນວນການຈອງໃໝ່ແມ່ນບໍ່ມີເລີຍ.

ຕໍ່ກັບບັນຫາດັ່ງກ່າວ, ກົມຄຸ້ມຄອງການທ່ອງທ່ຽວ ກໍໄດ້ຮຽກຮ້ອງມາຍັງຜູ້ ປະກອບການທຸລະກິດການທ່ອງທ່ຽວ ໃຫ້ຫັນເອົາວິກີດການຄັ້ງນີ້ມາເປັນໂອກາດ ໂດຍເນັ້ນໃສ່ສົ່ງເສີມ ລາວທ່ຽວລາວ ເປັນ ຕົ້ນແມ່ນ ການສົ່ງເສີມການທ່ອງທ່ຽວງານ ບຸນປະເພນີຕ່າງໆ ຕາມລະດູການ ແລະ ເພີ່ມສາຍການບິນພາຍໃນໃຫ້ຫລາຍຂຶ້ນ, ພ້ອມກັນດຽວນັ້ນ ກໍເນັ້ນໃຫ້ນຳໃຊ້ວັດຖຸທີ່ຜະລິດ ຢູ່ພາຍໃນປະເທດ ເພື່ອຮັບໃຊ້ພາຍໃນທຸລະກິດຂອງຕົນ ທົດແທນການນຳເຂົ້າຈາກຈີນ ແລະ ແກ້ໄຂບັນດາສິນຄ້າ ຄ້າງສົ່ງໄປປະເທດຈີນ.

Medialaos MMD