ໃນຕອນເຊົ້າຂອງວັນທີ 28 ກຸມພາ 2020ນີ້ ຢູ່ທີ່ສະໂມສອນເມືອງຄຳ ແຂວງຊຽງຂວາງ ແນວລາວສ້າງຊາດເມືອງໄດ້ຈັດກອງປະຊຸມໃຫຍ່ ຜູ້ແທນແນວລາວສ້າງຊາດເມືອງຄຳ ຄັ້ງທີ VII ຂື້ນຢ່າງເປັນທາງການ ພາຍໃຕ້ການເປັນປະທານຂອງທ່ານ ພົມມາ ເທບທິລາດ ຄະນະປະຈຳພັກເມືອງ ປະທານແນວລາວສ້າງຊາດເມືອງຄຳ, ໂດຍເປັນກຽດເຂົ້າຮ່ວມຂອງທ່ານ ດຳດີ ນັນທະວົງ ກຳມະການພັກແຂວງ ປະທານແນວລາວສ້າງຊາດແຂວງຊຽງຂວາງ, ທ່ານ ໃຈເພັດ ພິມວົງສາ ເລຂາຄະນະພັກເມືອງຄຳ ແຂວງຊຽງຂວາງ, ມີປະທານ-ຮອງປະທານແນວລາວສ້າງຊາດບັນດາເມືອງໃນທົ່ວແຂວງຊຽງຂວາງ, ກຳມະການແນວລາວສ້າງຊາດເມືອງ, ຫົວໜ້າ – ຮອງຫົວໜ້າຫ້ອງການອ້ອມຂ້າງເມືອງ, ຜູ້ຕາງໜ້າຈາກອົງການຈັດຕັ້ງມະຫາຊົນຂັ້ນເມືອງ, ອາດິດປະທານ-ຮອງປະທານແນວລາວສ້າງຊາດເມືອງ, ຄະນະພັກກຸ່ມໃນທົ່ວເມືອງ, ເຖົ້າແກ່ແນວໂຮມ, ເຈົ້າກົກເຈົ້າເຫຼົ່າ, ຜູ້ຊົງຄຸນວຸດທິຕະຫຼອດຮອດພະນັກງານແນວລາວສ້າງຊາດແຂວງເຂົ້າຮ່ວມທັງໝົດ 116 ທ່ານ, ຍິງ 8 ທ່ານ ແລະ ພະສົງ 2 ອົງ.

ໃນກອງປະຊຸມ ທ່ານ ພົມມາ ເທບທິລາດ ປະທານແນວລາວສ້າງຊາດເມືອງຄຳ ຂື້໊ນກ່າວເປີດກອງປະຊຸມຢ່າງເປັນທາງການ. ຈາກນັ້ນ ທ່ານ ລີຢ່າ ໜາວຕູ້ຢົງເຊັ້ງ ຮອງປະທານໄດ້ຜ່ານບົດລາຍງານການເມືອງທັງ 2 ພາກ ໃນການເຄື່ອນໄຫວວຽກງານຂອງຄະນະກຳມະການແນວລາວສ້າງຊາດເມືອງຄຳ ແຂວງຊຽງຂວາງໄລຍະ 5 ປີຜ່ານມາ(2014-2019) ແລະທິດທາງໃນຕໍ່ໜ້າ (2020-2024),ໂດຍທ່ານຍົກໃຫ້ເຫັນໂດຍຫຍໍ້ບາງວຽກງານຄື : ໄດ້ສົມທົບກັບທຸກພາກສ່ວນສຶກສາອົບຮົມການເມືອງແນວຄິດ, ຄວາມຂັດຂ້ອງໝອງໃຈຂອງປະຊາຊົນທີ່ບໍ່ເຂົ້າໃຈຕໍ່ນະໂຍບາຍຂອງພັກ-ລັດ, ແຜນພັດທະນາເສດຖະກິດ-ສັງຄົມຂອງລັດເຊັ່ນ: ການວັດແທກແຜນຜັງເມືອງໃໝ່ເຂດດົງກາ, ການຈັດສັນຕະຫຼາດຈອມທອງ , ໄດ້ເອົາໃຈໃສ່ຕິດຕາມ-ກວດກາ ແລະ ຊຸກຍູ້ປະຊາຊົນບັນດາເຜົ່າ, ສາສະນິກະຊົນທັງຫຼາຍປົກປັກຮັກສາຮີດຄອງປະເພນີອັນດີງາມຂອງໃຜລາວ, ໄດ້ເອົາໃຈໃສ່ຕິດຕາມກວດກາ ການຈັດຕັ້ງປະຕິບັດ ຂອງຄະນະກຳມະການແນວລາວສ້າງຊາດ ຂັ້ນເມືອງ-ບ້ານ ໃຫ້ມີການເຄື່ອນໄຫວຖືກຕ້ອງສອດຄ່ອງກັບພາລະບົດບາດ, ສິດ ແລະ ໜ້າທີ່, ລະບຽບກົດໝາຍຂອງແນວລາວສ້າງຊາດວາງອອກ, ໄດ້ສົມທົບກັບອົງການພາຄີ, ອົງການຈັດຕັ້ງຕ່າງໆ ຕະຫຼອດຮອດພະນັກງານລັດຖະກອນ ເປີດບັ້ນແຂ່ງຂັນຮັກຊາດ ແລະ ພັດທະນາ ເຊີ່ງສະແດງອອກ: ວຽກງານກໍ່ສ້າງຮາກຖານການເມືອງຕາມ 4 ເນື້ອໃນ, 4 ຄາດໝາຍ, ຈັດຕັ້ງປະຕິບັດຂະບວນການສ້າງເປັນຄອບຄົວ ແລະ ບ້ານສາມັກຄີປອງດອງໄດ້ 38ບ້ານ ແລະ ໄດ້ຈັດພິທີປະກາດຮັບຮອງບ້ານສາມັກຄີປອງດອງໄດ້ຈຳນວນ38ບ້ານ, ມີ 4,061 ຄອບຄົວ ເທົ່າກັບ42, 22%, ໃນທົ່ວເມືອງ. ພ້ອມນັ້ນພິທີໄດ້ຮັບຟັງ ການປະກອບຄໍາຄິດເຫັນ ກ່ຽວກັບວຽກງານຂະບວນການສ້າງຄອບຄົວ ແລະ ບ້ານສາມັກຄີປອງດອງ ຂອງບ້ານໃຫຍ່ນາຍອງ, ໄດ້ຜ່ານມາດຖານເງື່ອນໄຂຜູ້ສະໝັກ-ລາຍຊື່ຜູ້ທີ່ຈະມາເປັນຄະນະກຳມະການແນວລາວສ້າງຊາດຊຸດໃໝ່. ກອງປະຊຸມຄັ້ງປະຖົມມະລຶກເປັນເອກະສັນກັນຮັບຮອງ ຕົກລົງແຕ່ງຕັ້ງເອົາທ່ານ ພົມມາ ເທບທິລາດ ເປັນປະທານແນວລາວສ້າງຊາດເມືອງ, ທ່ານ ບຸນມາ ເສັງວິໄຊ ແລະ ທ່ານ ນາງ ກົງໃຈ ທອງພະຈັນ ເປັນຮອງປະທານ ແລະ ອີກ 32 ທ່ານ ເປັນຄະນະກຳມະການແນວລາວສ້າງຊາດເມືອງຄຳ ແຂວງຊຽງຂວາງ.

ໃນຕອນທ້າຍຂອງພິທີຍັງໄດ້ຮັບຟັງການໂອ້ລົມ, ໃຫ້ຄຳຄິດເຫັນຂອງທ່ານ ດຳດີ ນັນທະວົງ ປະທານແນວລາວສ້າງຊາດແຂວງຊຽງຂວາງ ກ່ອນອື່ນທ່ານໄດ້ສະແດງຄວາມບິຕິຍີນດີ, ຍ້ອງຍໍຊົມເຊີຍມາຍັງຜູ້ແທນກອງປະຊຸມທັງໝົດ, ຄະນະກຳມະການແນວລາວສ້າງຊາດຊຸດທີVI ທີ່ໄດ້ພ້ອມກັນເຮັດສຳເລັດຕໍ່ກັບວຽກງານແນວລາວສ້າງຊາດໃນໄລຍະຜ່ານມາຈົນເຖີງປັດຈຸບັນ. ພ້ອມນັ້ນ ທ່ານຍັງໄດ້ຮຽກຮ້ອງ ແລະ ເນັ້ນໜັັກບາງບັນຫາຕື່ມອີກຄື ຄະນະກໍາມະການແນວລາວສ້າງຊາດຊຸດທີ VII ນີ້ ສືບຕໍ່ຊີ້ນຳ-ນໍາພາ, ເປັນຄັນທຸງການເຕົ້າໂຮມຄວາມສາມັກຄີປອງດອງປະຊາຊົນບັນດາເຜົ່າ, ຊັ້ນຄົນ, ສາສສະໜາ, ເພດ-ໄວ ໃນທົ່ວປວງຊົນ, ເປັນເຈົ້າການປຸກລະດົມປະຊາຊົນບັນດາເຜົ່າ ເຂົ້າຮ່ວມການສ້າງສາພັດທະນາປະເທດຊາດ, ຈົ່ງພ້ອມກັນນໍາເອົາເນື້ອໃນ ຈິດໃຈຂອງກອງປະຊຸມຄັ້ງນີ້ໄປເຜີຍແຜ່ຈັດຕັ້ງປະຕິບັດໃຫ້ເກີດດອກອອກຜົນ. ສືບຕໍ່ຊີ້ນຳ-ນຳພາການຈັດຕັ້ງປະຕິບັດຂະບວນການສ້າງຄອບ ຄົວ ແລະ ບ້ານສາມັກຄີປອງດອງ ຂອງແນວລາວສ້າງຊາດໃຫ້ເປັນຂະບວນການກວ້າງຂວ້າງ, ພ້ອມກັນສູ້ຊົນເຮັດໃຫ້ເມືອງຄຳກາຍເປັນເມືອງສາມັກຄີປອງດອງຂອງແນວລາວສ້າງຊາດໃນຕໍ່ໜ້າ. ກອງປະຊຸມຄັ້ງນີ້ໄດ້ດຳເນີນມາເປັນເວລາໜື່ງຕອນ ແລະປິດລົງດ້ວຍຜົນສຳເລັດອັນຈົບງາມ.

ພາບ-ຂ່າວ: ທ ເບ່ຕ່າ ໄຊປັນຍາ(ແນວລາວສ້າງຊາດແຂວງຊຽງຂວາງ)
ລົງຂ່າວ: ສົມພອນ ເທບທິລາດ
medialaos xiengkhouang