ມື້ນີ້ພວກເຮົາຈະເວົ້າກ່ຽວກັບນົມທີ່ໝົດອາຍຸ ນົມທີ່ພວກເຮົາບໍ່ສາມາດດື່ມໄດ້ ແລະ ນົມທີ່ໝົດອາຍຸກໍ່ມີປະໂຫຍດຫຼາຍ ເພາະນົມທີ່ໝົດອາຍຸສາມາດຖືກນຳໄປໃຊ້ເພື່ອບຳລຸງຜັກ ເລັ່ງດອກ ແລະ ເລັ່ງຜົນໄດ້ເຊັ່ນກັນ.

ເມື່ອພວກເຮົາຊື້ນົມ ຫຼື ນົມທີ່ລູກກິນເຫຼືອຈາກໂຮງຮຽນ ຫຼື ກິນບໍ່ທັນເວລາ ກໍ່ຈະໝົດອາຍຸໄວ ແລະ ຕ້ອງໄດ້ຖິ້ມ ເຖິງແມ່ນວ່າຫຼັງຈາກໝົດອາຍຸແລ້ວກໍ່ຍັງສາມາດນຳໃຊ້ປະໂຫຍດຫຼາຍຢ່າງ ໃຫ້ກັບຜັກຂອງພວກເຮົາໄດ້ເປັນຢ່າງດີ ໂດຍການນຳເອົາຜະລິດຮໍໂມນນົມສົດ ມາຊ່ວຍໃນການບຳລຸງຜັກໃຫ້ໃຫຍ່ໄວ ແຂງແຮງທົນທານ ແລະ ເລັ່ງຜົນໄດ້ເປັນຢ່າງດີ.

ສຳລັບສ່ວນປະກອບທີ່ຕ້ອງກຽມພ້ອມ

1. ເກືອ 1 ບ່ວງກາເຟ

2. ນົມສົດຈືດ 1 ປ່ອງ (ໃຊ້ກັບນົມທີ່ໝົດອາຍຸແລ້ວກໍ່ໄດ້)

3. ເຄື່ອງດື່ມຊູກຳລັງຍີ່ຫໍ້ໃດກໍ່ໄດ້ 1 ຝາ

4. ນໍ້າຕານ 2 ບ່ວງກາເຟ

5. ແປ້ງນົວ 1 ບ່ວງກາເຟ

ສຳລັບຂັ້ນຕອນໃນການເຮັດ

1. ຖອກນົມທີ່ກຽມໄວ້ໃສ່ໂຖ ຫຼື ຊາມ ຫຼັງຈາກນັ້ນໃສ່ແປ້ງນົວ, ເກືອ, ນໍ້າຕານ ແລະ ເຄື່ອງດື່ມຊູກຳລັງ ໃນຈຳນວນທີ່ລະບຸໄວ້ຂ້າງເທິງ.

2. ຫຼັງຈາກນັ້ນກໍ່ປັ່ນສ່ວນປະກອບທຸກຢ່າງໃຫ້ເຂົ້າກັນ ແລ້ວເອົາມາຕອງໃສ່ແກ້ວ ໂດຍບໍ່ຈຳເປັນຕ້ອງໝັກ ພຽງເທົ່ານີ້ເຮົາກໍ່ຈະໄດ້ຮໍໂມນນົມສົດໄວ້ສຳລັບໃຫ້ຜັກງາມໆ.

ອັດຕາສ່ວນ ແລະ ວິທີການນຳໃຊ້ ຄື: ໃຊ້ຮໍໂມນນົມສົດ 1 ບ່ວງກາເຟ ປະສົມກັບນໍ້າ 1 ລິດ ເມື່ອປະສົມເຂົ້າກັນແລ້ວ ສາມາດນຳໄປສີດພົ່ນໃສ່ສ່ວນຕ່າງໆ ຂອງພືດ ຫຼື ຈະໃຊ້ວິທີຫົດນໍ້າກໍ່ໄດ້ຄືກັນ ເຊີ່ງສາມາດໃຊ້ໄດ້ທຸກໆ 3 ວັນ/ເທື່ອ ສູດນີ້ສາມາດໃຊ້ໄດ້ກັບພືດທຸກໆ ຊະນິດ.

ແນະນຳໃຫ້ຮູ້ຕື່ມອີກ: ຮໍໂມນນົມດີແນວໃດ?

1. ສູດນີ້ຈະຊ່ວຍເລັ່ງໃຫ້ພືດໃຫຍ່ໄວ ແລະ ເຮັດໃຫ້ໃບມີສີຂຽວ

2. ໃຊ້ສູດນີ້ເພື່ອບຳລຸງຜັກ ຈະຊ່ວຍເລັ່ງດອກ, ເລັ່ງໝາກຜົນ ລວມທັງບຳລຸງຮາກ ແລະ ໃບຂອງພືດ

3. ຊ່ວຍໃຫ້ຂັ້ວນດອກມີຄວາມໜຽວ ແລະ ແຂງແຮງທົນທານຫຼາຍຂື້ນ ບໍ່ຫຼົ່ນງ່າຍ

4. ໃຊ້ກັບຜັກ ເຊັ່ນ: ເຮັດໃຫ້ມີສີຂຽວ, ງາມ, ເປັນຕາໜ້າກິນ, ລົດຊາດຫວານ ແລະ ແຊບ

5. ສູດນີ້ຖ້າໃຊ້ກັບຕົ້ນໄມ້ກິນໝາກ ຈະເຮັດໃຫ້ມີສີສັນສວຍງາມ ແລະ ມີນໍ້າໜັກດີ

ບໍ່ຍາກເລີຍແມ່ນບໍ່? ຢ່າງໃດກໍ່ຕາມລອງພະຍາຍາມເຮັດເບີ່ງ ເພື່ອວ່າຕົ້ນໄມ້ຂອງທ່ານຈະອອກດອກອອກໃບຫຼາຍ ເພາະນົມທີ່ພວກເຮົາຈະຖິ້ມແມ່ນມີປະໂຫຍດ ແລະ ມີສັບພະຄຸນຫຼາຍ.