ສະຖາບັນສື່ມວນຊົນ ວັດທະນະທໍາ ແລະ ທ່ອງທ່ຽວ (ສສວທ) ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ(ຖວທ) ຮ່ວມກັບ ກະຊວງຖະແຫລງຂ່າວ ແລະ ສື່ສານ ສສ ຫວຽດນາມ ຈັດຊຸດຝຶກອົບຮົມ  ຫົວຂໍ້ “ທັກສະການເກັບກໍາຂໍ້ມູນ ແລະ ຂຽນບົດວຽກດີຄົນເດັ່ນ ໃນຍຸກສື່ແບບໃໝ່” ໃນລະ​ຫວ່າງວັນທີ 2-6 ມີນາ 2020 ຢູ່ ນະຄອນ​ຫລວງ​ວຽງ​ຈັນ ໂດຍມີທ່ານ ວິໄລທອງ ສີຊານົນ ຫົວໜ້າ ສສວທ, ທ່ານນາງ ມາຍ ເຮືອງ ຢາງ (Mai Hung Giang) ຮອງຫົວໜ້າກົມສື່ມວນຊົນ ກະຊວງຖະແຫລງຂ່າວ ແລະ ສື່ສານ ສສ ຫວຽດນາມ ພ້ອມດ້ວຍ ອາຈານ ຈາກ ສສ ຫວຽດນາມ, ມີສໍາມະນາກອນຈາກສູນກາງ ແລະ ທ້ອງ​ຖິ່ນ ເຂົ້າຮ່ວມ.

ທ່ານ ພູທອນ ບຸດຕະວົງ ຮອງຫົວໜ້າ ສສວທ ກ່າວວ່າ: ເພື່ອເປັນການສ່ອງແສງ ໃຫ້ເຫັນເຖິງວຽກດີ ຄົນເດັ່ນໃນອົງການ ຈັດຕັ້ງຂອງພັກ ແລະ ລັດ ອົງການຈັດຕັ້ງມະຫາຊົນ ໃນການເຄື່ອນໄຫວຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ X ຂອງ ພັກ ແລະ ສ້າງຜົນງານຕ້ອນຮັບ ກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ, ກົມສື່ມວນຊົນ ສສ ຫວຽດນາມ ແລະ ສສວທ ໄດ້ຈັດຊຸດຝຶກອົບຮົມຄັ້ງນີ້ຂຶ້ນ ເຊິ່ງແມ່ນຫົວຂໍ້ໜຶ່ງທີ່ສໍາຄັນ ແມ່ນການເກັບກໍາຂໍ້ມູນ, ການຂຸດຄົ້ນ ເລືອກ ເຟັ້ນເອົາບຸກຄົນ, ຄອບຄົວ, ໜ່ວຍງານ ຫລື ອົງການ ທີ່ເຮັດວຽກງານດ້ວຍຄວາມຫ້າວຫັນ, ມີບົດຮຽນ, ມີຜົນງານດີເດັ່ນ ແລະ ພົ້ນເດັ່ນ ທີ່ເປັນແບບຢ່າງ ໃນການສ້າງເສດຖະກິດຄອບຄົວ, ມີຫົວຄິດປະດິດສ້າງ, ບຸກບືນຜ່ານຜ່າ, ສູ້ຊົນຈົນໄດ້ຮັບຜົນສໍາເລັດ ຕາມຄວາມຄາດໝາຍ ຫລື ເກີນຄາດໝາຍ, ເປັນບຸກຄົນຕົວຢ່າງ, ເປັນຄອບຄົວຕົວແບບ, ເປັນໜ່ວຍງານດີເດັ່ນ ເພື່ອນໍາສະເໜີ ຕໍ່ສັງຄົມໃຫ້ຮັບຮູ້ຜ່ານທາງອອນລາຍ ທີ່ມີຄວາມວ່ອງໄວທັນຍຸກ, ທັນສະໄໝ ໃນຍຸກສື່ແບບໃໝ່.

ທ່ານ ວິໄລທອງ ສີຊານົນ ໄດ້ຮຽກຮ້ອງໃຫ້ຜູ້ເຂົ້າຮ່ວມຝຶກ​ອົບຮົມ ຈົ່ງພ້ອມກັນເອົາໃຈໃສ່ຕິດຕາມ, ຄົ້ນຄວ້າ, ປຶກສາຫາລື, ແລກປ່ຽນບົດຮຽນນຳກັນ ເພື່ອນຳຄວາມຮູ້ ໄປຈັດຕັ້ງປະຕິບັດເຂົ້າໃນວິຊາສະເພາະຕົວຈິງ ໃຫ້ມີປະສິດທິຜົນ ສູງສຸດ; ພ້ອມ​ທັງ​ສະ​ແດງ​ຄວາມ​ຂອບ​ໃຈ ຕໍ່ກົມສື່ມວນຊົນ ກະຊວງຖະແຫລງຂ່າວ ແລະ ສື່ສານ ສສ ຫວຽດນາມ ​ທີ່​ເຫັນ​ໄດ້​ຄວາມ​ສຳ​ຄັນ ຕໍ່​ວຽງ​ງານ​ສື່​ມວນ​ຊົນ ​ລາວ ແລະ ສະ​ແດງ​ຄວາມຫວັງວ່າ ຈະ​ໄດ້​ຮັບການສະໜັບສະໜູນ ຊ່ວ​ຍ​ເຫລືອອີກຕໍ່ໄປ ​ໃນ​ອະນາຄົດ.

Medialaos MMD