ວັນທີ 27 ສິງຫາ 2019 ນີ້ໃນເວລາ 8 ໂມງ 14 ນາທີ ເຈົ້າໜ້າທີ່ ປກສ ເມືອງຊົນນະບູລີ ໄດ້ຮັບແຈ້ງຈາກພົນລະເມືອງດີທາງໂທລະສັບວ່າ: ມີຄົນບໍ່ດີເຄື່ອນໄຫວຄ້າຂາຍຈໍາໜ່າຍຢາເສບຕິດຢູ່ຂອບເຂດບ້ານ ໂນນສະຫວ່າງ ເມືອງຊົນນະບູລີ ແຂວງສະຫວັນນະເຂດ ຈາກນັ້ນທາງເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງ ຈິ່ງໄດ້ສົມທົບກັບພົນລະເມືອງດີ ພ້ອມດ້ວຍເຈົ້າໜ້າທີ່,ທີ່ກ່ຽວຂ້ອງລົງເຄື່ອນໄຫວຕິດຕາມເປົ້າໝາຍ.ຕົກມາຮອດເວລາປະມານ 10 ໂມງ 25 ນາທີ ເຈົ້າໜ້າທີ່ວິຊາສະເພາະສາມາດຈັບຕົວຜູ້ຖຶກຫາໄດ້ 1 ຄົນ, ຊື່ທ້າວ ຈ໋ອກ ອາຍຸ 20 ປີ, ປະຊາຊົນບ້ານ ໂນນສະຫວ່າງ ເມືອງຊົນນະບູລີ ແຂວງສະຫວັນນະເຂດ, ພ້ອມຂອງກາງຢາເສບຕິດປະເພດຢາບ້າຈໍານວນ 105 ເມັດ, ພ້ອມນໍາຕົວທ້າວ ຈອ໋ກ ມາສອບສວນຜ່ານການສອບສວນໃນເບື້ອງຕົ້ນຂອງເຈົ້າໜ້າທີ່, ຜູ້ກ່ຽວໃຫ້ການຮັບສາລະພາບວ່າ: ຢາບ້າຈໍານວນດັ່ງກ່າວແມ່ນຂອງຕົນແທ້ ແລະຜູ້ກ່ຽວຍັງຮັບສາລະພາບຕື່ມອີກວ່າ: ຢາບ້າໄດ້ຊື້ນໍາຜູ້ຮ່ວມຂະບວນການເມື່ອໄດ້ຢາບ້າມາແລ້ວກໍ່ໄດ້ນໍາມາເຄື່ອນໄຫວຈໍາໜ່າຍໃຫ້ກັບໄວໜຸ່ມພາຍໃນບ້ານ ແລະບ້ານໃກ້ຄ່ຽງ ເຊີ່ງເລີ່ມເຄື່ອນໄຫວຄ້າຂາຍຢາເສບຕິດມາແຕ່ຕົ້ນປີ 2019 ຈົນຮອດປະຈຸບັນ, ຈຶ່ງຖຶກເຈົ້າໜ້າທີ່ຈັບຕົວພ້ອມຂອງກາງຢາບ້າ 105 ເມັດ, ຄະດີດັ່ງກ່າວຍັງຢູ່ໃນຂັ້ນຕອນການສອບສວນຂະຫຍາຍຜົນຫາຜູ້ຮ່ວມຂະບວນການເພື່ອນໍາຕົວມາດໍາເນີນຄະດີຕາມລະບຽບກົດໝາຍ.