ລັດຖະບານຍີ່ປຸ່ນ ໄດ້ໃຫ້ທຶນຊ່ວຍເຫລືອຈຳນວນ 18.500 ກວ່າໂດລາສະຫະລັດ ໃຫ້ແກ່ໂຄງການສະໜອງອຸປະກອນກິລາ ແກ່ນັກກິລາຄົນພິການ ພາຍໃຕ້ໂຄງການຊ່ວຍເຫລືອ ວັດທະນະທຳ ຂັ້ນຮາກຖານຂອງລັດຖະບານ ແລະ ປະຊາຊົນຍີ່ປຸ່ນ ​ໂດຍ​ໄດ້​ມີພິທີເຊັນສັນຍາ ມອບທຶນຊ່ວຍເຫລືອດັ່ງກ່າວ ໃນວັນທີ 3 ມີນາ 2020 ນີ້, ຢູ່ນະຄອນຫລວງວຽງຈັນ ລະຫວ່າງ ທ່ານ ທາເກວະກະ ເຄໂຊ ເອກອັກຄະຣາຊະທູດຍີ່ປຸ່ນ ປະຈຳລາວ ແລະ ທ່ານ ສີທາດ ຈັນທະບູລີ ຮອງປະທານ, ເລຂາທິການຄະນະ ກຳມະການກິລາພາຣາລິມປິກແຫ່ງຊາດລາວ ໂດຍມີ ທ່ານນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງ ສຶກສາທິການ ແລະ ກິລາ, ພ້ອມດ້ວຍພາກສ່ວນກ່ຽວຂ້ອງສອງຝ່າຍ ເຂົ້າຮ່ວມເປັນສັກຂີພິຍານ.

ຈຸດປະສົງຂອງໂຄງການດັ່ງກ່າວ ແມ່ນເພື່ອປັບປຸງສະພາບ ແວດລ້ອມ​ໃນການຝຶກຊ້ອມ ຂອງນັກກິລາຄົນພິການ ໂດຍສະໜອງອຸປະກອນກິລາຍົກນ້ຳໜັກ ແລະ ອຸປະກອນອື່ນໆ ​ເຊິ່ງຈະ​ໄດ້​ຕິດຕັ້ງຢູ່ສະໜາມ ກິລາເຈົ້າອານຸວົງ ແລະ ຫ້ອງຝຶກຊ້ອມຂອງອົງການຄົນພິການອາຊີ ເພື່ອການພັດທະນາ (ADDP) ​ເຊິ່ງເປັນອົງການບໍ່ສັງກັດລັດຖະບານ (NGO) ຂອງຍີ່ປຸ່ນທີ່ໃຫ້ການຊ່ວຍເຫລືອນັກກິລາຄົນພິການລາວ.

ໃນໂອກາດດຽວກັນ, ທ່ານນາງ ທາກຸຈິ ອາກິ ນັກກິລາຍິງປືນພາຣາລິມປິກຍີ່ປຸ່ນ ແລະ ທ່ານ ເປຍລາວພັກດີ ນັກກິລາຍົກນ້ຳໜັກພາຣາລິມປິກລາວ ກໍໄດ້ຂຶ້ນແບ່ງປັນປະສົບການ, ການດຳລົງຊີວິດ ແລະ ເສັ້ນທາງກ້າວສູ່ ມະຫາກຳກິລາ ພະຣາລິມປິກໂຕກຽວ 2020 ຕື່ມອີກ.

Medialaos