ວັນທີ 8 ມີນາ ແມ່ນວັນແມ່ຍິງສາກົນ ຊຶ່ງປີນີ້ມີອາຍຸຄົບຮອບ 110 ປີ (8/3/1910 – 8/3/2020) ແມ່ນເຫດການ ການເມືອງ ແລະ ປະຫວັດສາດອັນສຳຄັນແຫ່ງການເຕີບໃຫຍ່ຂະຫຍາຍຕົວຂອງແມ່ຍິງໃນທົ່ວໂລກ.

ສຳລັບຢູ່ ສປປ ລາວ, ແຕ່ໃດມາແມ່ຍິງລາວ ຍາມໃດກໍໄດ້ຄຽງບ່າຄຽງໄຫຼ່ກັບເພດຊາຍ, ເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ອັນໄດ້ເຮັດໃຫ້ຂະບວນການຂອງແມ່ຍິງລາວ ຍາມໃດກໍຕິດພັນກັບການເຕີບໃຫຍ່ຂະຫຍາຍຕົວຂອງຊາດລາວໂດຍຕະຫຼອດມາ.

ຕະຫຼອດໄລຍະທີ່ຜ່ານມາ ສະຫະພັນແມ່ຍິງລາວ ກໍຄື ແມ່ຍິງລາວບັນດາເຜົ່າທົ່ວປະເທດ ພ້ອມກັບແມ່ຍິງທົ່ວໂລກ ແລະ ພາກພື້ນ ໄດ້ຮ່ວມກັນຈັດຕັ້ງປະຕິບັດບັນດາຖະແຫຼງການ, ຂໍ້ຕົກລົງຮ່ວມກັນກ່ຽວກັບການພັດທະນາ, ການປົກປ້ອງສິດຜົນປະໂຫຍດອັນຊອບທຳຂອງແມ່ຍິງ ແລະ ເດັກນ້ອຍ, ການກໍ່ສ້າງສະຖາບັນຄອບຄົວ, ການພັດທະນາເສດຖະກິດ, ການສ້າງວຽກງານທຳ, ການເຂົ້າເຖິງຂໍ້ມູນຂ່າວສານ, ການສົ່ງເສີມຄວາມກ້າວໜ້າຂອງແມ່ຍິງ, ຄວາມສະເໝີພາບຍິງ-ຊາຍ, ການສົ່ງເສີມບົດບາດແມ່ຍິງໃນການນຳພາ ແລະ ຕັດສິນບັນຫາຂັ້ນຕ່າງໆ.

ພັກ – ລັດ ຍາມໃດກໍເຫັນຄວາມສຳຄັນຂອງແມ່ຍິງທີ່ມີຕໍ່ພາລະກິດປະຕິວັດຂອງຊາດລາວ. ແມ່ຍິງຍາມໃດກໍເປັນປັດໃຈສຳຄັນໃນການຊຸກຍູ້ເຮັດໃຫ້ການປະຕິບັດແນວທາງນະໂຍບາຍຂອງພັກໃນແຕ່ລະໄລຍະໄດ້ຮັບຜົນສຳເລັດໂດຍຕະຫຼອດມາ. ແມ່ຍິງລາວບັນດາເຜົ່າ ແມ່ນມີຄວາມຮັບຮູ້ເຂົ້າໃຈຕໍ່ແນວທາງນະໂຍບາຍຂອງພັກ, ມີຄຸນທາດການເມືອງ, ມີຄຸນສົມບັດສິນທຳປະຕິວັດ, ມີຄວາມຮູ້, ຄວາມສາມາດໃນການປະຕິບັດໜ້າທີ່ວຽກງານທີ່ພັກ-ລັດມອບໝາຍໃຫ້ ກໍຄືການເຄື່ອນໄຫວວຽກງານລວມໃນສັງຄົມ, ປະກອບສ່ວນອັນສຳຄັນເຂົ້າໃນການຕ້ານ ແລະ ສະກັດກັ້ນປະກົດການຫຍໍ້ທໍ້ທີ່ເກີດຂຶ້ນກັບແມ່ຍິງ, ຄອວຄົວ ແລະ ສັງຄົມ; ພ້ອມກັນສ້າງຄອບຄົວໃຫ້ມີຄວາມອົບອຸ່ນຜາສຸກ, ເປັນຄອບຄົວວັດທະນະທຳ. ແມ່ຍິງລາວຍັງຮັກສາໄວ້ໄດ້ຢ່າງດີຄຸນລັກສະນະເປັນເອກະລັກທີ່ເປັນມູນເຊື້ອອັນດີງາມຂອງແມ່ຍິງລາວ ເປັນຕົ້ນ ມີຄວາມດຸໝັ່ນຂະຫຍັນພຽນໃນການອອກແຮງງານ, ປະຢັດສັດທ່ຽງ, ມີຄວາມບໍລິສຸດຜຸດຜ່ອງ, ເບິ່ງແຍງລູກຜົວ, ມີນ້ຳໃຈຮັກຊາດແພງເຊື້ອ, ຮັກບ້ານເກີດເມືອງນອນ, ມີກິລິຍາມາລະຍາດອ່ອນຫວານ ຊຶ່ງເປັນການປະກອບສ່ວນອັນໃຫຍ່ຫຼວງເຂົ້າໃນການອະນຸລັກຮັກສາມູນມໍລະດົກວັດທະນະທຳອັນດີງາມຂອງຊາດເຮົາ.

ເພື່ອລະນຶກວັນປະຫວັດສາດ ກໍຄືການຕໍ່ສູ້ຂອງແມ່ຍິງເພື່ອປົດປ່ອຍຕົນເອງ ແລະ ທວງໃຫ້ມີສິດສະເໝີພາບ ປະຊາທິປະໄຕເທົ່າທຽມກັບເພດຊາຍນັ້ນ ຮຽກຮ້ອງມາຍັງແມ່ຍິງລາວບັນດາເຜົ່າ ແລະ ຊັ່ນຄົນຕ່າງໆ ຈົ່ງເພິ່ມທະວີຄວາມສາມັກຄີເປັນປຶກແຜ່ນ ພາຍໃຕ້ການນຳພາຂອງພັກ; ເຊີດຊູຄວາມຮັບຜິດຊອບໃນໜ້າທີ່ການເມືອງຂອງຕົນ, ຕັດສິນໃຈຜ່ານຜ່າຄວາມຫຍຸ້ງຍາກນາໆປະການ, ປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງຕາມຈຸດໝາຍສັງຄົມນິຍົມທີ່ພັກ ແລະ ປະຊາຊົນລາວເຮົາໄດ້ເລືອກເອົາໄວ້, ເພີ່ມທະວີການສຶກສາອົບຮົມການເມືອງ-ແນວຄິດໃຫ້ຖັນແຖວສະມາຊິກສະຫະພັນແມ່ຍິງ, ແມ່ຍິງລາວບັນດາເຜົ່າໃຫ້ມີຄວາມຮູ້, ເຂົ້າໃຈ, ສາມາດຈັດຕັ້ງຜັນຂະຫຍາຍແນວທາງນະໂຍບາຍຂອງພັກ, ລັດຖະທຳມະນູນ, ກົດໝາຍ, ແຜນການພັດທະນາເສດຖະກິດ-ສັງຄົມ ແລະ ພັດທະນາແມ່ຍິງລາວ, ຕັ້ງໜ້າເຂົ້າຮ່ວມການຕ້ານ ແລະ ສະກັດກັ້ນປະກົດການຫຍໍ້ທໍ້ເກີດຂຶ້ນໃນຄອບຄົວ ແລະ ສັງຄົມ. ສົ່ງເສີມການປົກປ້ອງສິດຜົນປະໂຫຍດອັນຊອບທຳຂອງແມ່ຍິງ-ເດັກນ້ອຍ, ຄວາມກ້າວໜ້າຂອງແມ່ຍິງ ແລະ ຄວາມສະເໝີພາບລະຫວ່າງ ຍິງ-ຊາຍ, ຄອບຄົວ ແລະ ສັງຄົມ. ເສີມຂະຫຍາຍມູນເຊື້ອ ແລະ ເອກະລັກອັນດີງາມຂອງແມ່ຍິງລາວໃຫ້ກາຍເປັນການກະທຳຕົວຈິງໃນການປະກອບສ່ວນເຂົ້າໃນການຈັດຕັ້ງປະຕິບັດແນວທາງນະໂຍບາຍຂອງພັກ, ປະຕິບັດແຜນພັດທະນາເສດຖະກິດ-ສັງຄົມໃຫ້ປະກົດຜົນເປັນຈິງ ເພື່ອເຮັດໃຫ້ປະຊາຊົນລາວບັນດາເຜົ່າຮັ່ງມີຜາສຸກ, ສັງຄົມມີຄວາມສີວິໄລ, ປະຊາທິປະໄຕ ແລະ ຍຸຕິທຳ.

Medialaos MMD