ກອງປະຊຸມໃຫຍ່ອົງຄະນະພັກເມືອງອາດສະພອນ ຄັ້ງທີ VI ໄດ້ໄຂຂຶ້ນຢ່າງເປັນທາງການແລ້ວ

0
299

ກອງປະຊຸມໃຫຍ່ອົງຄະນະພັກເມືອງອາດສະພອນ ຄັ້ງທີ VI ໄດ້ໄຂຂຶ້ນຢ່າງເປັນທາງການ ໃນວັນທີ 10 ມີນາ 2020 ນີ້ ທີ່ສະໂມສອນຂອງເມືອງ ໂດຍການເປັນປະທານກິດຕິມະສັກຂອງສະຫາຍ ປອ ໂພໄຊ ໄຊຍະສອນ ກຳມະການສຳຮອງສູນກາງພັກ ຮອງເລຂາຄະນະບໍລິຫານງານພັກແຂວງສະຫວັນະເຂດພັກແຂວງ ແລະ ການເປັນປະທານກອງປະຊຸມຂອງ ສະຫາຍ ຄຳແພງ ເພັດທຸມພອນ ກຳມະການພັກແຂວງ ເລຂາຄະນະບໍລິຫານງານພັກເມືອງອາດສະພອນ, ເຂົ້າຮ່ວມມີບັນດາສະຫາຍຈາກຄະນະພັກເມືອງອ້ອມຂ້າງ; ພະແນກການອ້ອມຂ້າງແຂວງ ພ້ອມບັນດາສະຫາຍຜູ້ແທນສົມບູນທີ່ມາຈາກຮາກຖານພັກ ຈຳນວນ 159 ສະຫາຍ,ຍິງ 11 ສະຫາຍ ເຊິ່ງເປັນຕົວແທນໃຫ້ແກ່ສະມາຊິກພັກທັງໝົດໃນທົ່ວເມືອງ ຈຳນວນ 1.877 ສະຫາຍ ຍິງ 409 ສະຫາຍ.

ສະຫາຍ ຄຳແພງ ເພັດທຸມພອນ ກຳມະການພັກແຂວງ ເລຂາຄະນະບໍລິຫານງານພັກເມືອງອາດສະພອນ ໄດ້ກ່າວໄຂກອງໃຫຍ່ຢ່າງເປັນທາງການວ່າ: ນັບແຕ່ຊ່ວງເວລາແຕ່ກອງປະຊຸມໃຫຍ່ຄັ້ງທີ V ຂອງອົງຄະນະພັກເມືອງ ຈົນຮອດກອງປະຊຸມໃຫຍ່ຄັ້ງທີ VI ບັນດາຖັນແຖວສະມາຊິກພັກ,ພະນັກງານ ຕະຫຼອດຮອດປະຊາຊົນຊາວເມືອງອາດສະພອນ ຕ່າງກໍ່ໄດ້ເປັນເຈົ້າການຈັດຕັ້ງຜັນຂະຫຍາຍບັນດາຄາດໝາຍດ້ານຕ່າງໆ ທີ່ກອງປະຊຸມໃຫຍ່ຄັ້ງທີ X ຂອງພັກ,ກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ ແລະ ກອງປະຊຸມໃຫຍ່ຄັ້ງທີ V ຂອງອົງຄະນະພັກເມືອງວາງອອກຢ່າງເປັນຂະບວນການຟົດຟື້ນ ແລະ ໄດ້ຮັບໝາກຜົນຢ່າງໜ້າເພິ່ງພໍໃຈ,ເຮັດໃຫ້ເສດຖະກິດ – ສັງຄົມຂອງເມືອງ ມີການຂະຫຍາຍຕົວຢ່າງຕໍ່ເນື່ອງ,ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ ເຮັດໃຫ້ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນເປັນກ້າວໆ

ໂອກາດດຽວກັນນີ້ ສະຫາຍ ຄຳແພງ ເພັດທຸມພອນ ກໍ່ໄດ້ຜ່ານບົດລາຍງານການເມືອງທັງສອງພາກ ພ້ອມທັງຕີລາຄາຄືນຜົນຂອງການຈັດຕັ້ງມະຕິກອງປະຊຸມຄັ້ງທີ V ຂອງເມືອງໃນຜ່ານມາໃຫ້ຮູ້ວ່າ: ໄລຍະ 5 ປີຜ່ານທາງຄະນະພັກເມືອງໄດ້ເອົາໃຈໃສ່ໃນການເຮັດວຽກງານສຶກສາອົບຮົມແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ໃຫ້ຖັນແຖວກໍາລັງປະກອບອາວຸດ, ປະຊາຊົນບັນດາເຜົ່າໄດ້ຮັບຮູ້ເຊື່ອມຊຶມຢ່າງເລິກເຊິ່ງ ແລະ ທົ່ວເຖິງ,ຊຸກຍູ້ການຜະລິດກະສິກໍາໃຫ້ຂະຫຍາຍຕົວຢ່າງຕໍ່ເນື່ອງ, ສາມາດຕອບສະໜອງສະບຽງອາຫານໃຫ້ພຽງພໍຕາມຄວາມຕ້ອງການ ແລະ ສົ່ງເສີມການຜະລິດກາຍເປັນສິນຄ້າຫຼາຍຂຶ້ນ, ທົ່ວເມືອງຜະລິດເຂົ້າໄດ້ທັງໝົດ 79.208 ໂຕນ, ສະມັດຕະພາບສະເລ່ຍ 4,17 ໂຕນ/ເຮັກຕາ, ສະເລ່ຍໃສ່ຫົວຄົນໜຶ່ງໄດ້ຮັບເຂົ້າເປືອກ 1.202 ກິໂລ/ຄົນ/ປີ,ເອົາໃຈໃສ່ໃນການຍາດແຍ່ງທຶນຮອນເຂົ້າມາພັດທະນາເມືອງອາດສະພອນໄດ້ສູງພໍສົມຄວນ, ມີແຜນການລົງທຶນຂອງເມືອງທັງໝົດ 151 ໂຄງການ, ແຕ່ສາມາດສາມາດຈັດຕັ້ງປະຕິບັດໄດ້ທັງໝົດ 142 ໂຄງການ, ມີທຶນທັງໝົດ 110,76 ຕື້ກີບ, ເສດຖະກິດຂອງເມືອງຂະຫຍາຍຕົວສະເລ່ຍໃນລະດັບ 6,60 % ຕໍ່ປີ, ລວມຍອດຜະລິດຕະພັນ (GDP) ບັນລຸໄດ້ 793,06 ຕື້ກີບ ສະເລ່ຍໃສ່ຫົວຄົນໜຶ່ງໄດ້ຮັບ 12 ລ້ານກວ່າກີບ ຫຼື ເທົ່າກັບ 1.433 ໂດລາ/ຄົນ/ປີ, (ທຽບໃສ່ປີ 2014 ເພີ່ມຂຶ້ນ 272 ໂດລາ).

ສຳລັບທິດທາງໜ້າທີ່ລວມໃນ 5 ປີ ຕໍ່ໜ້າ ຮັບປະກັນໃຫ້ທົ່ວເມືອງມີຄວາມສະຫົງບ ແລະ ມີຄວາມປອດໄພໂດຍພື້ນຖານ, ແນວທາງປ້ອງກັນຊາດປ້ອງກັນຄວາມສະຫງົບກາຍເປັນຂອງທົ່ວປວງຊົນຮອບດ້ານຢ່າງຫນັກແໜ້ນ, ປະຊາຊົນໄດ້ທໍາມາຫາກິນ ແລະ ດໍາລົງຊີວິດຢູ່ຢ່າງຜາສຸກ, ອັດຕາການເຕີບໂຕດ້ານເສດຖະກິດບໍ່ຫຼຸດ 6,50 % ຕໍ່ປີ, ຮອດປີ 2024 ສະເລ່ຍໃສ່ພົນລະເມືອງຜູ້ໜຶ່ງໃຫ້ໄດ້ 16.049.131 ກີບ ຫຼືເທົ່າກັບ 1.911 ໂດລາ/ຄົນ/ປີ, ພື້ນຖານໂຄງລ່າງ ເສດຖະກິດໄດ້ຮັບການພັດທະນາ, ຮັບປະກັນເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າດີຂຶ້ນຢ່າງຕໍ່ເນື່ອງ, ປະຕິບັດຕາມຂໍ້ແຂ່ງຂັນຂອງແຕ່ລະອົງການ ຕິດພັນກັບຂະບວນການຮັກຊາດ ແລະ ພັດທະນາ, ຫັນພະນັກງານລົງກໍ່ສ້າງຮາກຖານການເມືອງຕິດພັນກັບການພັດທະນາຊົນນະບົດຮອບດ້ານ ຕາມທິດສາມສ້າງ.

ຈາກນັ້ນສະຫາຍ ສີພັນ ສຸວັນນະສານ ຮອງເລຂາຄະນະບໍລິຫານງານພັກເມືອງອາດສະພອນ ກໍ່ໄດ້ຜ່ານແຜນພັດທະນາເສດຖະກິດ – ສັງຄົມ 5 ປີຄັ້ງທີ VI 2020 – 2024 ຕື່ມອີກ.

savannakhet medialaos