ສະ​ຖານ​ທີ່​ທ່ອງ​ທ່ຽວ​ແກ້ງກາງ ເປັນ​ສະ​ຖານ​ທີ່ ທີ່​ມີ​ຄວາມ​ໂດດ​ເດັ່ນ ແລະ ສວຍ​ສົດ​ງົດ​ງາມ ທາງ​ດ້ານ​ທິວ​ທັດ ທຳ​ມະ​ຊາດ​ປ່າ​ໄມ້​ອັນ​ຂຽວ​ງາມ​ອຸ່ມ​ທຸ່ມ ເຮັດ​ໃຫ້​ອາ​ກາດ​ເຂດ​ນີ້​ມີ​ຄວາມ​ສົດ​ຊື່ນ​ແຈ່ມ​ໃສ​ດີ ຈຶ່ງ​ກາຍ​ເປັນ​ສະ​ຖານ​ທີ່​ທ່ອງ​ທ່ຽວ ທີ່​ໄດ້​ຮັບ​ຄວາມ​ນິ​ຍົມ​ຊົມ​ຊອບ ຈາກ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ​ປະ​ເທດ​ເປັນ​ຈຳ​ນວນ​ບໍ່​ໜ້ອຍ. ແຫຼ່ງ​ທ່ອງ​ທ່ຽວ​ແກ້ງ​ກາງ ຕັ້ງ​ຢູ່​ບ້ານ​ປາກ​ຊອນ ເມືອງຊະ​ນະ​ສົມ​ບູນ ແຂວງ​ຈຳ​ປາ​ສັກ ຫ່າງ​ຈາກຄິວ​ລົດ​ຫຼັກ 8 ເໜືອ 2 ກິ­ໂລ­ແມັດ ແລະ ເທ­ສະ​ບານ​ແຂວງ 10 ກິ​ໂລແມັດ ເດີນ​ທາງ​ດ້ວຍ​ລົດ.

ທ່ານ ໄພ​ວັນ ສິງ​ທະ​ນູ​ສອນ ຫົວ​ໜ້າ​ແຫຼ່ງ​ທ່ອງ​ທ່ຽວ​ແກ້ງ​ກາງ ໄດ້​ໃຫ້​ສຳ​ພາດຕໍ່​ສື່ມວນ​ຊົນ​ແຂວງ​ຈຳ​ປາ​ສັກ​ວ່າ: ຂ້າ​ພະ​ເຈົ້າ​ມີ​ຄວາມ​ມັກ​ຮັກ​ທຳ​ມະ​ຊາດ, ຢາກ​ຢູ່​ກັບ​ຄວາມ​ງາມ​ຂອງ​ທຳ​ມະ​ຊາດ ດັ່ງ​ນັ້ນ​ຈຶ່ງ​ໄດ້​ຈັດ​ສະ​ຖານ​ທີ່​ນີ້​ເປັນ​ບ່ອນ​ທ່ອງ​ທ່ຽວ​ໂດຍ​ມີ​ການ​ຕົບ​ແຕ່ງ​ບ່ອນ​ພັກ​ເຊົາ​ຂອງ​ຜູ້​ທີ່​ມາ​ທ່ຽວ​ຊົມ ເພື່ອ​ໃຫ້​ເປັນ​ບ່ອນທ່ຽວ​ຊົມ ເຊິ່ງ​ໄດ້​ສ້າງ​ເປັນ​ບ່ອນ​ທ່ອງ​ທ່ຽວ​​ໄດ້ 2 ປີ​ແລ້ວ ແລະ ສະ​ຖານ​ທີ່​ທ່ອງ​ທ່ຽວ​ແກ້ງ​ກາງນີ້​ ເປັນ​ສະ­ຖານ­ທີ່​ທ່ອງ​ທ່ຽວທຳ​ມະ​ຊາດ​ທີ່​ສວຍ​ງາມ ເປັນ​ແກ້ງ​ທີ່​ໃຫຍ່ ເຕັມ​ໄປດ້ວຍ​ກ້ອນ​ຫີນ​ທີ່​ສວຍ​ງາມ ກ້ອນຫີນ​ມີ​ລັກ­ສະ­ນະ​ແຕກ​ຕ່າງ​ກັນ ຢັ່ງຢາຍກັນ​ ​​ຕາມ​ສາຍນ້ຳ​​ເຊ​ໂດນ.

ທ່ານ​ໃດ​ຫາກ​ຮູ້​ສຶກ​ອິດ​ເມື່ອຍ​​ກັບ​ວຽກ​ງານ ກໍ​ຂໍ​ເຊີນ​ຊວນ​ທ່ານ​ໄປ​ທ່ຽວ​ຊົມທຳ​ມະ​ຊາດ ແລະ ພັກ​ຜ່ອນ​ກັບ​ບັນ​ຍາ​ກາດ​ເຢັນໆ​ເພື່ອ​ຄວາມ​ເບີກ​ບານ​ທາງ​ດ້ານ​ກາຍ ແລະ ຈິດ​ໃຈ.

ສື່ມວນ​ຊົນ​ແຂວງ​ຈຳ​ປາ​ສັກ
medialaos
+ໂດຍ: ດາວ​ພະ​ຈັນ ໄຊ​ຍະ​ວົງ