ເພື່ອເປັນການຜັນຂະຫຍາຍເນື້ອໃນມະຕິກອງປະຊຸມໃຫຍ່ຄັ້ງທີ່ XIV ຂອງອົງຄະນະພັກເມືອງໃໝ່ນັ້ນ. ໃນທ້າຍອາທີດທີ່ຜ່ານມານີ້, ທ່ານ ທອງສີ ເສົາສຸລິພົມ ຮອງເຈົ້າແຂວງໆຜົ້ງສາລີ, ຜູ້ຊີ້ນຳຂົງເຂດວັດທະນະທຳ – ສັງຄົມຂັ້ນແຂວງ, ທັງເປັນຜູ້ຊີ້ນຳວຽກງານຮອບດ້ານຂອງເມືອງໃໝ່ ແລະ ທ່ານ ສົມຈີດ ສິດທິວົງ ເຈົ້າເມືອງໆໃໝ່ ພ້ອມຄະນະທີມງານຈາກຂັ້ນແຂວງ, ຂັ້ນເມືອງ ໄດ້ລົງຕິດຕາມ ແລະ ຊຸກຍູ້ວຽກງານການສ້າງບ້ານນ້ອຍໃຫ້ກາຍເປັນບ້ານໃຫຍ່ ແລະ ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດຢູ່ບ້ານສະຫຼວງ ທີ່ຂື້ນກັບ ກຸ່ມຫົວເມີກຂອງເມືອງໃໝ່.

ໂອກາດນີ້ກໍ່ຮັບການຕ້ອນຮັບຈາກເລຂາພັກກຸ່ມ, ເລຂາພັກນາຍບ້ານ, ອົງການປົກຄອງບ້ານພ້ອມດ້ວຍປະຊາຊົນຢ່າງອົບອຸ່ນ ພ້ອມທັງໄດ້ຮັບຟັງການລາຍງານສະພາບຈຸດພິເສດ ແລະ ການພັດທະນາເສດຖະກີດ – ສັງຄົມຂອງທົ່ວກຸ່ມ ເຊີ່ງກຸ່ມຫົວເມີກ ແມ່ນຫ່າງຈາກເທດສະບານເມືອງໃໝ່ 102 ກິໂລ, ມີ 8 ບ້ານ ແລະ 1 ບ້ານທີ່ຂື້ນກັບ, ມີພົນລະເມືອງທັງໝົດ 2.143 ຄົນ, ຍີງ 1.054 ຄົນ, 331 ຫຼັງຄາ ແລະ 456 ຄອບຄົວ, ອາຊີບຕົ້ນຕໍຂອງປະຊາຊົນໃນທົ່ວກຸ່ມແມ່ນເຮັດໄຮ່ – ເຮັດນາ, ລ້ຽງສັດ, ເຮັດສ່ວນ ແລະ ຫາເຄື່ອງປ່າຂອງດົງເປັນອາຊີບເສີມ ເຊີ່ງສາມາດສ້າງລາຍຮັບທົ່ວກຸ່ມໃນປີ 2019 ໄດ້ 5 ຕື້ 514 ລ້ານກີບ, ສະເລ່ຍໃສ່ຫົວຄົນໝື່ງໄດ້ 2.573.028 ກີບຕໍ່ຄົນຕໍ່ປີ. ພ້ອມທັງຮັບຟັງຂໍ້ສະເໜີຈຳນວນໝື່ງຂອງກຸ່ມບ້ານເປັນຕົ້ນແມ່ນ ການຍົກຍ້າຍຫ້ອງການກຸ່ມ, ການຈັດສານທີດີນຢູ່ຈຸດສະຫຼວງ, ຊ້ອມແປງຄື້ນນ້ຳລີນຂອງບາງບ້ານທີ່ມີຢູ່ແລ້ວ, ຕິດຕັ້ງລະບົບສັນຍານໂທລະສັບ ແລະ ອື່ນໆ. ຈາກນັ້ນທ່ານ ບຸນແພງ ລາວລີ ຮອງຫົວໜ້າຫ້ອງວ່າການແຂວງກໍ່ໄດ້ຜ່ານເອກະສານກ່ຽວກັບມາດຖານເງື່ອນໄຂໃນການສ້າງບ້ານ, ການໂຮມບ້ານເຂົ້າກັນ ເພື່ອສ້າງເປັນບ້ານພັດທະນາ ແລະ ການສ້າງບ້ານໃຫຍ່ກາຍເປັນຕົວເມືອງນ້ອຍໃນຊົນນະບົດ.

ໃນໂອກາດນີ້ທ່ານ ທອງສີ ເສົາສຸລິພົມ ຮອງເຈົ້າແຂວງໆຜົ້ງສາລີ ກໍ່ໄດ້ມີຄຳເຫັນໂອ້ລົມຕໍ່ເລຂາກຸ່ມບ້ານ, ເລຂາພັກນາຍບ້ານ ແລະ ປະຊາຊົນພາຍໃນກຸ່ມ ເຊີ່ງກ່ອນອື່ນທ່ານກໍ່ໄກ້ກ່າວສະແດງຄວາມຍ້ອງຍໍຊົມເຊີຍ ຕໍ່ການຊີ້ນຳໆພາຂອງກຸ່ມບ້ານ, ນາຍບ້ານ, ອົງການປົກບ້ານ ແລະ ປະຊາຊົນ ທີ່ມີຜົນງານທີ່ຍາດມາໄດ້ໃນຕະຫຼອດໄລຍະທີ່ຜ່ານມາ. ພ້ອມກັນນັ້ນທ່ານກໍ່ຮຽກຮ້ອງໃຫ້ສືບຕໍ່ເຕົ້າໂຮມຄວາມສາມັກຄີບ້ານຕໍ່ບ້ານໃຫ້ເປັນປືກແຜນ, ເອົາໃຈໃສ່ວຽກງານປ້ອງກັນຊາດໃຫ້ມີຄວາມສະຫງົບ, ຕ້ານ ແລະ ສະກັດກັ້ນບັນດາບັນຫາປະກົດການຍໍ້ທໍ້ພາຍໃນບ້ານໂດຍສະເພາະຂີ້ລັກງັດແງະ, ບັນຫາຢາເສບຕິດ, ການເຊື້ອຖືສາສະໝາທີ່ບໍ່ສອດຄ່ອງກັບຮີດຄອງປະເພນີ, ສືບຕໍ່ສ້າງອາຊີບຖາວອນໃຫ້ຫຼາຍຂື້ນ, ພ້ອມກັນສ້າງສາເສດຖະກິດຂອງແຕ່ລະບ້ານກໍ່ຄືຂອງຄອບຄົວໃຫ້ເຂັ້ມແຂງກ່ວາເກົ່າ ເພື່ອເຮັດໃຫ້ຫຼູດຜ່ອນອອກຈາກຄວາມທຸກຢາກເທື່ອລະກ້າວ, ໃຫ້ທຸກພາກສ່ວນຊຸກຍູ້ສົ່ງເສີມໃນການສ້າງບ້ານສະຫຼວງໃຫ້ເປັນບ້ານໃຫຍ່ກາຍເປັນຕົວເມືອງນ້ອຍໃນຊົນນະບົດໃຫ້ບັນລຸຕາມຄາດໝາຍທີ່ວາງໄວ້.

ໃນໂອກາດທີ່ທ່ານຮອງເຈົ້າແຂວງລົງເຄື່ອນໄຫວວຽກງານໃນຄັ້ງນີ້ ຍັງໄດ້ນຳເອົາຖົງ ແລະ ອຸປະ ກອນການຮຽນ ແລະ ອຸປະກອນການກິລາຈຳນວນໝື່ງໄປມອບໃຫ້ກັບອົງການປົກຄອງບ້ານ ແລະ ຄູອາຈານ – ນ້ອງໆນັກຮຽນທີ່ຂາດເຂີນຕື່ມອີກ.

medialaos
phongsaly
( ພາບ – ຂ່າວ: ແສງຄຳ ສາລີວັນ )