ປັດຈຸບັນ ຄະນະກໍາມະການສະເພາະກິດ​ ຊຶ່ງແຕ່ງຕັ້ງໂດຍກະຊວງໂຍທາທິການ ແລະ ຂົນສົ່ງ ໄດ້ຮ່ວມກັບ ເຈົ້າໜ້າທີ່ ສືບສວນ-ສອບສວນ ຈາກສາຍການບິນຂອງໄທ ແລະ ພາກສ່ວນອື່ນໆທີ່ກ່ຽວຂ້ອງ ກຳລັງຂຸ້ນຂ້ຽວດຳເນີນການ ສືບສວນ-ສອບສວນ ແລະ ເກັບກຳລາຍລະອຽດຕ່າງໆ ຕໍ່ເຫດການເຮືອບິນແອບັສ A330-300 ໝາຍເລກທະບຽນ HS-TEU ຂອງສາຍການບິນໄທແອເວ (Thai Airways) ຖ້ຽວບິນ TG 575 ວຽງຈັນ-ບາງກອກ ເກາະກັບເຮືອບິນສ່ວນຕົວລໍາໜຶ່ງ ທີ່ຈອດຢູ່ລານເດີ່ນສະໜາມບິນສາກົນວັດໄຕ ໃນວັນ 9 ມີນາ 2020 ເວລາ 20:26 ນາທີ (ຕາມເວລາທ້ອງຖິ່ນ).

ທ່ານ ຄອນຄຳ ສຸວົງສາ ຫົວໜ້າຫ້ອງການ ສືບສວນ-ສອບສວນ ເຫດຕິດຂັດ ແລະ ອຸບັດເຫດທາງການບິນ, ກະຊວງໂຍທາທິການ ແລະ ຂົນສົ່ງ ໄດ້ໃຫ້ສຳພາດໃນວັນທີ 10 ມີນາ ນີ້ວ່າ: ສາເຫດຂອງການເກີດອຸບັດເຫດໃນຄັ້ງນີ້ ແມ່ນຍັງບໍ່ທັນສາມາດສະຫລຸບໄດ້ເທື່ອວ່າ ເກີດຂຶ້ນຍ້ອນສາເຫດໃດແທ້ ເນື່ອງຈາກຕ້ອງໄດ້ມີການ ສືບສອບ-ສອບສວນ ລະອຽດກ່ອນ. ການສືບສວນ-ສອບສວນ ຄາດວ່າຈະບໍ່ໃຊ້ເວລາດົນ ເນື່ອງຈາກວ່າເຫດການດັ່ງກ່າວ ແມ່ນບໍ່ໄດ້ມີຄວາມຊັບຊ້ອນ ເຊິ່ງບໍ່ຄືກັບເຫດການອື່ນໆ ທີ່ພົວພັນເຖິງເຄື່ອງຈັກ ຫລື ສະພາບອາກາດ. ອຸບັດເຫດແບບນີ້ ແມ່ນເກີດຂຶ້ນເປັນຄັ້ງທຳອິດ ນັບຕັ້ງແຕ່ມີການເປີດນຳໃຊ້ສະໜາມບິນສາກົນວັດໄຕເປັນຕົ້ນມາ ແລະ ເຫດການແບບນີ້ ກໍເຄີຍເກີດຂຶ້ນຢູ່ ສະໜາມບິນສາກົນອື່ນໆ ເຊັ່ນດຽວກັນ.

ທ່ານ ຄອນຄຳ ສຸວົງສາ ອະທິບາຍຕື່ມວ່າ: ພາຍຫລັງທີ່ເຮືອບິນລໍາດັ່ງກ່າວ ໄດ້ເຄື່ອນຍ້າຍອອກຈາກລານຈອດ (ດ້ວຍລົດລາກ) ຈົນສຸດຂະບວນການຖອຍຫລັງແລ້ວ ຫລັງຈາກນັ້ນກໍໄດ້ມີການເຄື່ອນຍ້າຍໄປທາງໜ້າດ້ວຍເຮືອບິນເອງເພື່ອທີ່ຈະໄປ ຫາເສັ້ນທາງຂຶ້ນ-ລົງ ໃນຂະນະນັ້ນ ປີກເບື້ອງຊ້າຍຂອງເຮືອບິນກໍໄດ້ໄປເກາະກັບເຮືອບິນສ່ວນຕົວລຳໜຶ່ງທີ່ຈອດຢູ່ລານເດີ່ນເຊິ່ງເຮັດໃຫ້ເຮືອບິນທັງສອງລຳໄດ້ຮັບຄວາມເສຍຫາຍ. ມາຮອດປັດຈຸບັນນີ້ ເຮືອບິນທັງສອງລຳແມ່ນບໍ່ໄດ້ ມີການເຄື່ອນຍ້າຍ ແລະ ບໍ່ທັນສາມາດບິນໄດ້, ສ່ວນມູນຄ່າເສຍຫາຍຂອງເຮືອບິນທັງສອງລຳແມ່ນຍັງບໍ່ທັນສາມາດປະເມີນໄດ້ເທື່ອ.

ເຮືອບິນສ່ວນຕົວລຳດັ່ງກ່າວ, ແມ່ນລຸ້ນ Gulfstream G450 (GLF4) ເປັນເຮືອບິນທີ່ຂຶ້ນທະບຽນຢູ່ເກາະໜຶ່ງຂອງປະເທດອັງກິດ, ເຊິ່ງບິນມາແຕ່ໂຮ່ຈິມິງ ສສ.ຫວຽດນາມ ມາລົງສະໜາມບິນສາກົນວັດໄຕ ໃນວັນທີ 2 ມີນາ 2020 ແລະ ໄດ້ບິນໄປປາກເຊກ່ອນຈະກັບມາຈອດຢູ່ວັດໄຕອີກຄັ້ງໜຶ່ງ ໃນວັນທີ 8 ມີນາ ແລະ ບໍ່ທັນມີກຳນົດທີ່ຊັດເຈນໃນການບິນອອກ ຈາກສະໜາມບິນສາກົນວັດໄຕ, ເຊິ່ງຈຸດປະສົງໃນການມາຂອງເຮືອບິນລຳດັ່ງກ່າວ ແມ່ນເພື່ອນຳມາສະແດງໃຫ້ຜູ້ທີ່ມີຄວາມສົນໃຈ ໂດຍສະເພາະບັນດານັກທຸລະກິດໄດ້ຊົມເພື່ອກ້າວໄປສູ່ການເຊັນສັນຍາ ຊື້-ຂາຍ ຮ່ວມກັນ.

ເຮືອບິນ ແອບັສ A330-300 ຂອງສາຍການບິນ ໄທແອເວ ບັນທຸກຜູ້ໂດຍສານທັງໝົດ 79 ຄົນ ແລະ ມີນັກບິນ ພ້ອມຈຸບິນ 13 ຄົນ.  ພາຍຫລັງເກີດເຫດການດັ່ງກ່າວ, ຝ່າຍບໍລິການພາກພື້ນດິນຂອງສະໜາມບິນສາກົນວັດໄຕ ແລະ ພາກສ່ວນທີ່ກ່ຽວຂ້ອງໄດ້ໃຫ້ການຊ່ວຍເຫລືອ ແລະ ນຳເອົາຜູ້ໂດຍສານ ແລະ ລູກເຮືອທັງໝົດໄປພັກຜ່ອນ ຢູ່ທີ່ໂຮງແຮມ ທີ່ຈັດຕຽມໄວ້ຕາມມາດຕະຖານໃນການເບິ່ງແຍງຜູ້ໂດຍສານຂອງສາຍການບິນ.

Medialaos MMD