ທ່ານ ປອ ລືໄຊ ພະດວງເດດ ຫົວໜ້າພະແນກການຕ່າງປະເທດ ໃຫ້ຮູ້ວ່າ: ໃນໄລຍະຜ່ານມາແຂວງໄຊຍະບູລີ ແມ່ນປະຕິບັດນະໂຍບາຍເປີດກວ້າງການພົວພັນຕ່າງປະເທດ ແລະ ການຮ່ວມມືກັບສາກົນ ໂດຍຍຶດໝັ້ນແນວທາງຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ຮ່ວມມືຢ່າງສະເໝີຕົ້ນສະເໝີປາຍ ເປັນເຈົ້າການເຊື່ອມໂຍງກັບພາກພື້ນ ແລະ ສາກົນ ປະກອບສ່ວນຢ່າງຕັ້ງໜ້າເຂົ້າໃນການສ້າງປະຊາຄົມອາຊຽນ, ສືບຕໍ່ເສີມຂະຫຍາຍສາຍພົວພັນທີ່ເປັນມູນເຊື້ອແຫ່ງຄວາມສາມັກຄີແບບພິເສດ ແລະ ການຮ່ວມມືຮອບດ້ານກັບບັນດາແຂວງ ສສ ຫວຽດນາມ ແລະ ກິ່ງແຂວງມົນທົນຢູນານ ສປ ຈີນ ບົນຈິດໃຈເປັນຄູ່ຮ່ວມມືຍຸດທະສາດຮອບດ້ານ ແລະ ໝັ້ນຄົງຍາວນານເຂົ້າສູ່ລວງເລິກ, ຕັ້ງໜ້າເສີມຂະຫຍາຍການພົວພັນອັນດີກັບບັນດາແຂວງຂອງໄທ ໂດຍສະເພາະແມ່ນແຂວງທີ່ມີຊາຍແດນຮ່ວມກັນ ແນໃສ່ເຮັດໃຫ້ຊາຍແດນກາຍເປັນຊາຍແດນສັນຕິພາບ, ເອື້ອອໍານວຍໃຫ້ແກ່ການສົ່ງເສີມວຽກງານການຄ້າ ການລົງທຶນ ແລະ ການທ່ອງທ່ຽວໃຫ້ມີການຂະຫຍາຍຕົວ ແລະ ມີຄວາມເຂົ້າໃຈເຊິ່ງກັນ ແລະ ກັນຫຼາຍຂຶ້ນ; ເຊິ່ງສະແດງອອກໃນປີຜ່ານມາແຂວງໄຊຍະບູລີໄດ້ຮັບທຶນການສຶກສາຈາກແຂວງເພື່ອນມິດ ສສ ຫວຽດນາມ ຈໍານວນ 69 ທຶນ ໃນນີ້ມີປະລິນຍາໂທ 10 ທຶນ, ປະລິນຍາຕີ 29 ທຶນ ແລະ ຊັ້ນສູງ 30 ທຶນ. ຄະນະຜູ້ແທນຂັ້ນສູງແຂວງໄຊຍະບູລີ ແລະ ບັນດາແຂວງຂອງເພື່ອນມິດຢ້ຽມຢາມ ແລະ ເຮັດວຽກຮ່ວມກັນມີ 11 ຄັ້ງ, ໄດ້ເສີມຂະຫຍາຍພົວພັນແບບຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານກັບບັນດາແຂວງ ຂອງ ສປ ຈີນ ຕາມທິດ 4 ດີບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ. ປີ 2019 ນີ້ແຂວງໄຊຍະບູລີໄດ້ຮັບການຊ່ວຍເຫຼືອດ້ານການພັດທະນາຊັບພະຍາກອນມະນຸດ ຈໍານວນ 8 ທຶນ ແລະ ໄດ້ມີການແລກປ່ຽນຄະນະຜູ້ແທນນໍາກັນ 5 ຄັ້ງ, ຂັ້ນການນໍາແຂວງ 3 ຄັ້ງ ແລະ ຂັ້ນຂະແໜງການ 2 ຄັ້ງ. ໃນປີ 2019 ແຂວງພວກເຮົາໄດ້ຈັດກອງປະຊຸມຄະນະກໍາມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນລາວ-ໄທ ແຂວງໄຊຍະບູລີ-ຈັງຫວັດນ່ານ ຄັ້ງທີ 11 ທີ່ແຂວງໄຊຍະບູລີເປັນເຈົ້າພາບ ພ້ອມນີ້ຄະນະຜູ້ແທນຂັ້ນສູງຂອງແຂວງ-ຈັງຫວັດນັບທັງຂະແໜງການອ້ອມຂ້າງແຂວງຂັ້ນເມືອງ-ອໍາເພີ ທີ່ມີຊາຍແດນຕິດຈອດກັນ ໄດ້ແລກປ່ຽນດ້ານການຄ້າ-ການລົງທຶນ, ທ່ອງທ່ຽວ, ສີລະປະວັນນະຄະດີ, ວັດທະນະທໍາ ແລະ ກິລາ ນັບທັງຂັ້ນການນໍາຂອງແຂວງ, ເມືອງ ແລະ ຂະ ແໜງການອ້ອມຂ້າງແຂວງທັງໝົດ 30 ກວ່າຄັ້ງ.

ປະຈຸບັນອົງການສາກົນ ທີ່ບໍ່ສັງກັດລັດຖະບານ INGOs ທີ່ໄດ້ຮັບອະນຸຍາດໃຫ້ມາຈັດຕັ້ງປະຕິບັດເຄື່ອນໄຫວວຽກງານຢູ່ແຂວງໄຊຍະບູລີມີ 5 ອົງການ (ອົງການໂລກອວຍພອນ ສ ເກົາຫຼີ, ອົງການ KOICA, ອົງການ Room to Read, ອົງການບໍລິການປະຊາຊົນ PIS, ອົງການ AAR JAPAN) 5 ໂຄງການ ແລະ 21 ກິດຈະກໍາ ມີມູນຄ່າລວມທັງໝົດ 18.864,267 ໂດລາສະຫະລັດ. ໄດ້ເຮັດໜັງສືຜ່ານແດນທາງລັດທະການໃຫ້ພະນັກງານແຂວງໄຊຍະບູລີ ໄປຢ້ຽມຢາມ ແລະ ເຮັດວຽກຢູ່ຕ່າງປະເທດໄດ້ 14 ຄັ້ງ ມີ 18 ຫົວ. ໃນປີ 2019 ນີ້ກົມກົງສູນກະຊວງການຕ່າງປະເທດໄດ້ເປີດນໍາໃຊ້ສູນຮັບຄໍາຮ້ອງຂໍເຮັດໜັງສືຜ່ານແດນຢູ່ແຂວງໄຊຍະບູລີ ນັບແຕ່ເດືອນກໍລະກົດຮອດປະຈຸບັນໄດ້ທັງໝົດ 5.502 ຫົວ, ໄດ້ອອກໜັງສືຢັ້ງຢືນການສະເໜີຂໍແຕ່ງດອງ ລະຫວ່າງພົນລະເມືອງລາວກັບຄົນຕ່າງປະເທດໄດ້ 5 ຄູ່. ປະຈຸບັນມີ 30 ສັນຊາດ, ມີ 3.636 ຄົນ ຊາວຕ່າງປະເທດທີ່ເຂົ້າມາທໍາມາຫາກິນອອກແຮງງານຢູ່ແຂວງໄຊຍະບູລີ ມີຈໍານວນໜຶ່ງກໍ່ເຂົ້າມາແບບບໍ່ຖືກຕ້ອງ, ໄດ້ອອກວີຊາກັບດ່ານສາກົນໄດ້ທັງໝົດ 2.924 ຄົນ, ມອບເງິນເຂົ້າງົບປະມານສູນກາງ 80 ພັນກວ່າໂດລາ, ດ່ານສາກົນຂົວມິດຕະພາບນໍ້າເຫືອງອອກວີຊາໃຫ້ແກ່ຊາວຕ່າງປະເທດໄດ້ 1.263 ຄົນ ຍົກເວັ້ນ 161 ຄົນ, ສ້າງລາຍຮັບເຂົ້າງົບປະມານສູນກາງໄດ້ 30 ພັນກວ່າໂດລາ, ດ່ານສາກົນນໍ້າເງິນ ເມືອງເງິນອອກວີຊາໃຫ້ຊາວຕ່າງປະເທດໄດ້ 1.661 ຄົນ ຍົກເວັ້ນ 28 ຄົນ ສ້າງລາຍຮັບເຂົ້າງົບປະມານສູນກາງ 49 ພັນກວ່າໂດລາ.

ຂ່າວ: ບຸນທີ
Medialaos xayaboury