ປັດຈຸບັນ​ນີ້ຂ່າວ​ປອມ (FAKE NEWS) ໄດ້​ສ້າງ​ຄວາມ​ສັບສົນ​ທົ່ວ​ໂລກ ໂດຍ​ສະເພາະແມ່ນ​ຂ່າວ​ກ່ຽວ​ກັບ​ການ​ລະບາດ​ຂອງ​ພະຍາດ​ອັກເສບ​ປອດ​ສາຍ​ພັນ​ໃໝ່ ຢູ່ ສປ ຈີນ ພະຍາດ​ໄວ​ຣັສໂຄ​ໂຣ​ນາສາຍ​ພັນ​ໃໝ່ (2019 ncov).

ຂ່າວ​ປອມ​ສ່ວນ​ໃຫຍ່​ແມ່ນ​ມາ​ຈາກ​ ສື່​ສັງຄົມ​ອອນ​ລາຍ ສະນັ້ນຫຼາຍ​ປະເທດ​ຈຶ່ງ​ມີ​ມາດ​ຕະການ​ແຕກ​ຕ່າງ​ກັນ​ໃນ​ການ​ຕໍ່ສູ້​ກັບ​ຂ່າວ​ປອມ ເຊັ່ນ​ວ່າ: ໃຊ້​ມາດ​ຕະການ​ທາງ​ກົດໝາຍ ໃຊ້​ການ​ອະທິບາຍ​ຈາກ​ສື່​ທາງ​ການ ແລະ ໃຊ້ AI (ປັນຍາ​ປະດິດ) ການ​ໃຊ້ AI ເຂົ້າ​ປາບ​ນີ້​ແມ່ນ​ການ​ໃຊ້​ຫຸ່ນ​ຍົນ​ເຂົ້າ​ໃນ​ການ  ຈັດຕັ້ງ​ປະຕິບັດ​ການ​ກວດ​ຂ່າວ​ປອມ ເຊິ່ງ​ຫຼາຍ​ປະເທດ​ເຫັນ​ວ່າ​ມັນ​ມີ​ປະ​ສິດທິ​ຜົນ ແລະ ວ່ອງໄວ​ດີ.

ແຕ່​ບັນຫາ​ສຳ​ຄົນ​ແມ່ນ​ການ​ປ້ອນ​ຂໍ້​ມູນ​ໃຫ້ AI ທາງ​ດ້ານ​ພາສາ ກົດໝາຍ ແລະ ຂໍ້​ມູນ​ຈາກ​ພາກ​ລັດ.

ສະນັ້ນ ມີ​ປະເທດ​ເຂົາ​ຈັດ​ຕັ້ງ​ໜ່ວຍ​ງານ​ນີ້​ຂຶ້ນ​ມາ​ຖື​ເປັນ​ວາລະ​ແຫ່ງ​ຊາດ ໂດຍ​ແມ່ນ​ການ​ນຳ​ຂອງ​ລັດຖະ​ບານ​ເປັນ​ຜູ້​ບັນຊາ​ການ ໂດຍ​ມີ​ກະຊວງ​ກ່ຽວຂ້ອງ​ເຂົ້າ​ຮ່ວມ ມີ​ຫ້ອງການ​ປະຈຳ ປະກອບ​ບຸກ​ຄະ ລາ​ກອນ​ທາງ​ດ້ານ​ເຕັກນິກ ແລະ ຜູ້​ບັນຊາ​ດ້ານ​ເນື້ອ​ໃນ​ຂຶ້ນ​ໂດຍ​ກົງ​ກັບ​ລັດຖະບານ ສ່ວນ AI ນັ້ນ ຢ່າງ​ໜ້ອຍ​ຕ້ອງ​ມີ 3 ໂຕ ຫຼື ວ່າ 3 ລະບົບ ເຊິ່ງ​ແຕ່​ລະ​ໂຕ​ມີ​ການ​ແບ່ງ​ງານ​ຄັກແນ່? ເຊັ່ນ​ວ່າ: ໂຕ​ທີ​ໜຶ່ງ​ສຳລັບ​ກວດ​ວຽກ​ເລື່ອງ​ຄວາມ​ໝັ້ນຄົງ​ຂອງ​ຊາດ ແລະ ການ​ປົກ​ປ້ອງ​ສະ​ຖາ​ບັນ (ພັກ​ການເມືອງ​ກຳ​ອຳ ນາດລາດ​ຊະ​ວັງ​ເຈົ້າ​ຊີວິດ) ໂຕ​ທີ​ສອງໃຊ້​ກວດ​ວຽກ​ຂ່າວ-ປະຊາສຳພັນ​ທົ່ວ​ໄປ ເຊັ່ນ: ການເມືອງເສດຖະ ກິດ-ສັງຄົມ ແລະ ໂຕ​ສຸດ​ທ້າຍ​ແມ່ນ​ໃຊ້​ກວດ​ສອບ​ເບິ່ງ​ຂ່າວ​ຈາກ​ຕ່າງປະເທດ​ທີ່​ເກີດ​ຂຶ້ນ​ມີ​ຜົນ​ກະທົບ​ຕໍ່​ການ​ລົງທຶນການ​ທ່ອງທ່ຽວ ແລະ ການ​ສົ່ງ​ອອກ.

ໃນ AI ສາມ​ໂຕ​ນີ້​ຕ້ອງ​ປ້ອນ​ຂໍ້​ມູນ​ເຂົ້າ​ໃຫ້​ຫຼາຍ​ໃນ​ຮູບ​ແບບ BIG DATA ເປັນ​ພາສາ​ຂອງ​ແຕ່​ລະ​ປະເທດ ດ້ວຍ​ຂໍ້​ມູນ​ຈາກ​ໜ່ວຍ​ງານ​ຕ່າງໆ ເພື່ອ​ວ່າ​ຫຸ່ນ​ຍົນ​ກວດ​ພົບ​ແລ້ວ​ຈະ​ຮູ້​ທັນທີ​ວ່າ​ອັນ​ໃດ​ເປັນ​ຂອງ​ປອມ ແລະ ອັນ​ໃດ​ເປັນ​ຂອງ​ແທ້.

ການ​ສູ້​ຢັນ​ກັບ​ຂ່າວ​ປອມ ​ແມ່ນ​ບັນຫາ​ເປັນ​ຕາຍຍ້ອນ​ວ່າ​ໃນ​ແຕ່​ລະ​ມື້ ແຕ່​ລະ​ຊົ່ວໂມງ ມັນ​ມັກ​ໂປໂລ​ຂຶ້ນ ເໝືອນ​ພະຍາດ​ລະບາດ ສະນັ້ນ ຜູ້​ເສບ​ຂ່າວ​ຕ້ອງ​ມີ​ສະຕິ​ໃນ​ການ​ເບິ່ງ​ຂ່າວ​ຈາກ Face Book ເພາະ​ການ Like Comment Share ນັ້ນມັນ​ໝາຍ​ເຖິງ​ການ​ເຂົ້າ​ຂ້າງ​ອອກ​ຂາ​ຕໍ່​ບັນຫາ​ນັ້ນໆ ອາດ​ຖືກ​ໂທດ​ຕາມ​ກົດໝາຍ​ກ່ຽວຂ້ອງໃນ​ການ​ປາບ Fake NEWS ນີ້ ເຖິງ​ຈະ​ມີ​ເຕັກ​ໂນ​ໂລ​ຊີ​ທັນ​ສະໄໝ​ປານໃດ​ກໍ່ຕາມ ການ​ຖື​ສຳຄັນ​ເລື່ອງ​ເນື້ອ​ໃນ​ແມ່ນ​ໂຕ​ສັກສິດ ແລະ ມີ​ປະ​ສິດທິ​ຜົນ ດັ່ງນັ້ນ ບຸ​ກຄະລາ​ກອນ​ສຳຄັນ​ຍິ່ງ​ໃນ​ການ​ບັນຈຸ​ເຂົ້າ​ໃນ​ໜ່ວຍ​ງານ​ນີ້ ມີ​ຄຳ​ກ່າວ​ໄວ້​ວ່າ: “ຜູ້​ເຮັດ​ບໍ່​ຮູ້ ຜູ້​ຮູ້​ບໍ່​ໄດ້​ເຮັດ” ເມື່ອ​ເປັນ​ເຊັ່ນ​ນີ້​ແລ້ວ ການ​ປາບ​ຂ່າວ​ປອມ ຫຼື Fake NEWS ຈຶ່ງ​ເປັນ​ເລື່ອງ​ປວດ​ຫົວ  ຫາກ​ຜູ້​ບັນຊາ​ການ​ຂາດ​ເສນາ​ທິ​ການ​ທີ່​ເກັ່ງ ແລະ ຊັດ​ເຈນ.

ທົ່ວ​ໂລກ​ພວມ​ປວດ​ຫົວ​ກັບ Fake NEWS ແຕ່​ວິທີ​ແກ້ ຫຼື ທາງ​ອອກ​ທີ່​ດີ​ສຸດ​ຍັງ​ຄົງ​ແມ່ນ AI ເພາະ​ມັນ​ເຮັດ​ວຽກ​ຕະຫຼອດ 24 ຊົ່ວໂມງ ເຊິ່ງ​ຄົນ​ບໍ່​ສາມາດ​ເຮັດ​ໄດ້… ແຕ່​ອັນ​ຕັດສິນ​ຍັງ​ຄົງ​ແມ່ນ​ເສນາ​ທິ​ການ​ດ້ານ​ເນື້ອ​ໃນ.

ເຕັກ​ໂນ​ໂລ​ຊີ​ທັນ​ສະໄໝ​ທໍ່​ໃດ​ຍິ່ງ​ຈຳເປັນ​ຕ້ອງ​ມີ​ສະຕິ​ປັນຍາ​ແຫຼມ​ຄົມ ເພື່ອ​ບັນຊາ​ມັນ.