ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ລົງຕິດຕາມການເຝົ້າລະວັງ ແລະ ຄວບຄຸບການລະບາດຂອງພະຍາດ COVID-19

0
132

ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ລົງຕິດຕາມການເຝົ້າລະວັງ ແລະ ຄວບຄຸບການລະບາດຂອງພະຍາດ COVID-19 ຢູ່ທີ່ຂົວມິດຕະພາບແຫ່ງທີ1, ໂຮງໝໍ 103,​ ໂຮງໝໍມິດຕະພາບ  ແລະ ສະໜາມບິນສາກົນວັດໄຕ. ໃນການລົງເຄື່ອນໄຫວເຮັດວຽກໃນຄັ້ງນີ້ ທ່ານ ທອງລຸນ ສີສຸລິດ ໄດ້ຮັບຟັງການລາຍງານຫຍໍ້ກ່ຽວກັບສະພາບການຈັດຕັ້ງປະຕິບັດມາດຕະການຕ້ານ ແລະ ຄວບຄຸມການແຜ່ລະບາດເຊື້ອພະຍາດ COVID-19 ຈາກພາກ ສ່ວນທີ່ກ່ຽວຂ້ອງ, ຫຼັງຈາກນັ້ນ ທ່ານນາຍົກລັດຖະມົນຕີ ໄດ້ໃຫ້ສຳພາດຕໍ່ສື່ມວນຊົນໂດຍໄດ້ຢັ້ງຢືນວ່າ: ປັດຈຸບັນນີ້ ສປປ ລາວ ໄດ້ມີຄວາມພ້ອມໃນທຸກດ້ານເພື່ອຮອງຮັບການລະບາດຂອງພະຍາດທີ່ອາດຈະແຜ່ລະບາດ ຢູ່ ສປປ ລາວ ບໍ່ວ່າທາງດ້ານບຸກຄາລາກອນ, ອຸປະກອນການແພດທີ່ທັນສະໄໝ, ສະຖານທີ່ຮອງຮັບຄົນເຈັບ ແລະ ໂຮງໝໍຕ່າງໆ ກໍ່ມີຄວາມກຽມພ້ອມທຸກຢ່າງ.

ນອກຈາກນັ້ນ ທ່ານ ນາຍົກລັດຖະມົນຕີ ກໍ່ໄດ້ຍ້ອງຍໍຊົມເຊີຍຕໍ່ຜູ້ທີ່ປະຕິບັດໜ້າທີ່ໃນການເຝົ້າລະວັງຢູ່ທຸກຂະແໜງການທີ່ກ່ຽວຂ້ອງ ທີ່ເອົາໃຈໃສ່ໃນການປະຕິບັດໜ້າທີ່ວຽກງານຂອງຕົນຢ່າງມີຄວາມຮັບຜິດຊອບສູງ.

ຂໍໃຫ້ທຸກໆ ພາກສ່ວນຈົ່ງມີສະຕິໃນການເຝົ້າລະວັງ ແລະ ຕິດຕາມຂໍ້ມູນຂ່າວສານຢ່າງໃກ້ຊິດບໍ່ວ່າຈະເປັນຂ່າວປອມ ຫຼື ສ້າງຂ່າວປັ່ນປ່ວນທາງສັງຄົມ ແລະ ອື່ນໆ.

ທ່ານ ນາຍົກລັດຖະມົນຕີ ຍັງໄດ້ຢ້ຳຕື່ມອີກວ່າຜູ້ໃດທີ່ມີອາການທີ່ເຂົ້າໃນນິຍາມຂອງພະຍາດ COVID-19 ແມ່ນໃຫ້ໄປກວດຟຼີ ແລະ ຖ້າຫາກຜູ້ໃດທີ່ຕິດເຊື້ອພະຍາດ COVID-19 ແມ່ນປິ່ນປົວຟີເຊັ່ນດຽວກັນ.