ໃນວັນທີ 13 ມີນາ 2020 ທີ່ກະຊວງສາທາລະນະສຸກ,  ທ່ານ ດຣ.ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ໄດ້ຮຽກຮ້ອງມາຍັງພໍ່ແມ່ປະຊາຊົນລາວທຸກຊົນເຜົ່າ ບໍ່ໃຫ້ອອກນອກປະເທດ ຖ້າບໍ່ຈຳເປັນ, ໂດຍສະເພາະປະເທດທີ່ມີຄວາມສ່ຽງ ທີ່ເປັນພະຍາດປອດອັກເສບສາຍພັນໃໝ່ ໂຄວິດ-19 ທີ່ກໍາລັງລະບາດ ຢູ່ໃນທົ່ວໂລກ ພ້ອມທັງເນັ້ນໃຫ້ປະຊາຊົນ ແລະ ຜູ້ໂດຍສານທີ່ເດີນທາງມາຈາກຕ່າງປະເທດ, ຜູ້ໂດຍສານທຸກຄົນຕ້ອງໄດ້ຜ່ານກ້ອງວັດແທກອຸນຫະພູມຢູ່ທາງເຂົ້າໂດຍມີເຈົ້າໜ້າທີ່ແພດປະຈຳດ່ານຕິດຕາມກວດກາ ແລະ ຕື່ມແບບຟອມກວດກາກ່ອນເຂົ້າ ສປປ ລາວ, ຖ້າຫາກຜູ້ໂດຍສານທ່ານໃດ ມີອາການໄຂ້, ໄອ, ຈາມ ກໍຈະໄດ້ເອົາ ເຂົ້າຫ້ອງແຍກປ່ຽວ ເພື່ອສອບຖາມປະຫວັດ, ນຳສົ່ງກວດ ແລະ ປິ່ນປົວ ຢູ່ໂຮງໝໍທີ່ຖືກກຳນົດໄວ້ ເຊັ່ນ: ສໍາລັບແຂວງ ແມ່ນໂຮງໝໍແຂວງ, ສູນກາງແມ່ນກວດໄດ້ຢູ່ບັນດາໂຮງໝໍສູນກາງ ແຕ່ບ່ອນປິ່ນປົວແມ່ນ ກຳນົດເອົາໂຮງໝໍມິດຕະພາບ ເປັນບ່ອນປິ່ນປົວພະຍາດໂຄວິດ-19.

ທ່ານ ດຣ. ບຸນກອງ ສີຫາວົງ ກ່າວຕື່ມວ່າ: ປະຊາຊົນລາວທຸກຄົນມີຄວາມຢ້ານ ແລະ ຕື່ນຕົວຕໍ່ບັນດາຂ່າວ ໃນສື່ອອນລາຍຕ່າງໆ ວ່າພະຍາດດັ່ງກ່າວ ມີການແຜ່ລະບາດໃນ ສປປ ລາວ ແລ້ວ, ແຕ່ຄວາມຈິງແລ້ວ ແມ່ນຍັງບໍ່ມີ. ສະນັ້ນ, ຂ້າພະເຈົ້າຈະສືບຕໍ່ລາຍງານ ສະພາບການໃຫ້ທຸກທ່ານ ໄດ້ຮັບຮູ້ໃນຖະແຫລງຂ່າວມື້ນີ້. ສິ່ງສຳຄັນທີ່ສຸດ ຖ້າຮູ້ຈັກວິທີປ້ອງກັນ ແລະ ນຳໄປປະຕິບັດຢ່າງຖືກຕ້ອງ ເຮົາກໍຈະປອດໄພ ແລະ ຮຽກຮ້ອງ ມາຍັງພໍ່ແມ່ ປະຊາຊົນ ທຸກຄົນໃຫ້ຕິດຕາມແຫລ່ງຂ່າວ ທີ່ໜ້າເຊື່ອຖືໄດ້ເປັນປະຈຳ ໂດຍສະເພາະຈາກ ແຫລ່ງຂ່າວ ທາງການ, ຕາມຖະແຫລງ ການ ຂອງກະຊວງສາທາລະນະສຸກ ແລະ ເວັບໄຊ ຂອງອົງການອະນາໄມໂລກ.

ຕາມການລາຍງານຂອງ ອົງການອະນາໄມໂລກ ນັບມາຮອດວັນທີ 12 ມີນາ 17 ໂມງ ຕາມເວລາປັກກິ່ງ, ນອກປະເທດຈີນ ມີ 117 ປະເທດ ແລະ ເຂດແຄວ້ນ ຢືນຢັນມີຜູ້ຕິດເຊື້ອພະຍາດອັກ ເສບປອດ ຈາກເຊື້ອຈຸລາໂລກ ສາຍພັນໃໝ່ ຫລື ໂຄວິດ 19 ທັງໝົດ 44.067 ກໍລະນີ, ເສຍຊີວິດທັງໝົດ1.440 ຄົນ. ເມື່ອທຽບໃສ່ຈໍານວນ 1 ມື້ກ່ອນ, ນອກປະເທດຈີນ ຢືນຢັນມີຜູ້ຕິດເຊື້ອພະຍາດເພີ່ມຂຶ້ນ 6.703 ກໍລະນີ ແລະ ເສຍຊີວິດເພີ່ມ 310 ຄົນ, ມີ 4 ປະເທດ ແລະ ເຂດແຄວ້ນປະກົດມີຜູ້ຕິດເຊື້ອພະຍາດ ຄື: ໂປລີເນຊີ、ຕວກກີ、ຮົງດູຣັດ ແລະ ກົດດີວົວ. ສຳລັບ ອີຕາລີ ຢືນຢັນມີຜູ້ຕິດ ເຊື້ອໂຄວິດ19 ທຽບໃສ່ 1 ມື້ກ່ອນ ເພີ່ມຂຶ້ນ 2.651 ກໍລະນີ, ໃນມື້ດຽວກັນເສຍຊີວິດເພີ່ມ189 ຄົນ, ມີຜູ້ຕິດເຊື້ອທັງໝົດ 15.113 ກໍລະນີ, ເສຍຊີວິດທັງໝົດ 1.016 ຄົນ.

ທ່ານສາມາດສອບຖາມຂໍ້ມູນ ເພີ່ມເຕີມໄດ້ທີ່ ສາຍດ່ວນ 166 ຕະຫລອດ 24 ຊົ່ວໂມງ ຫລື ໂທເຂົ້າທີ່ເບີ +856 20 5406 6777 ສໍາລັບພາສາຈີນ ກໍ່ມີທີມງານທ່ານໝໍ ທີ່ສາມາດເວົ້າພາສາຈີນ ໃຫ້ຂໍ້ມູນຕະຫລອດ ເຊັ່ນກັນ.

Medialaos MMD