ກອງປະຊຸມໃຫຍ່ ຄັ້ງທີ IV ໜ່ວຍພັກຫ້ອງການກະຊວງການຕ່າງປະເທດ

0
681

ໃນວັນ​ທີ 13 ມີ​ນາ 2020 ຜ່ານມາ, ​ທີ່​ຫ້ອງ​ປະ​ຊຸມກະ​ຊວງ​ການ​ຕ່າງ​ປະ​ເທດ, ໄດ້ຈັດມີກອງ​ປະ​ຊຸມ​ໃຫຍ່ຄັ້ງ​ທີ IV ຂອງໜ່ວຍ​ພັກ​ຫ້ອງ​ການ ກະ​ຊວງ​ການ​ຕ່າງ​ປະ​ເທດ ໄດ້ໄຂຂຶ້ນຢ່າງເປັນທາງການ, ໂດຍການໃຫ້ກຽດເຂົ້າຮ່ວມ​​ເປັນປະທານ ຂອງ ສະຫາຍ ​ສະ​ເຫລີມ​ໄຊ ກົມ​ມະ​ສິດ ກໍາມະການສູນກາງພັກ, ເລ​ຂາຄະນະບໍລິຫານງານພັກ ກະ​ຊວງ​ການ​ຕ່າງ​ປະ​ເທດ, ມີສະຫາຍ ເລຂາໜ່ວຍພັກຫ້ອງການ, ບັນດາສະຫາຍເລຂາ, ຮອງເລຂາ ແລະ ຕາງໜ້າໜ່ວຍພັກອ້ອມຂ້າງກະຊວງການຕ່າງປະເທດທີ່ເປັນແຂກຖືກເຊີນ, ສະມາຊິກພັກສົມບູນ, ສະມາຊິກພັກສຳຮອງ ແລະ 3 ອົງການຈັດຕັ້ງມະຫາຊົນຂອງຫ້ອງ​ການກະ​ຊວງ​ການ​ຕ່າງ​ປະ​ເທດ ເຂົ້າຮ່ວມ 60 ສະຫາຍ.

ຖ່າຍຮູບລວມ

ໃນກອງປະຊຸມ, ສະ​ຫາຍ ໂພ​ໄຊ ໄຂ​ຄຳ​ພິ​ທູນ ເລ​ຂາ​ໜ່ວຍ​ພັກ​ ຫ້ອງ​ການ​ກະ​ຊວງ​ການ​ຕ່າງ​ປະ​ເທດ ໄດ້ຜ່ານບົດລາຍງານການເມືອງ ແລະ ບົດສຳຫລວດການນຳພາລວມ ຂອງຄະນະໜ່ວຍພັກໃນໄລຍະ 5 ປີຜ່ານມາ, ເຊິ່ງສາມາດສັງເກດຕີລາຄາຜົນສຳເລັດ, ຂໍ້ຫຍຸ້ງຍາກ ແລະ ບາງບົດຮຽນທີ່ຖອດຖອນ ໄດ້ຂອງໜ່ວຍພັກ ນັບທັງການຊີ້ນຳ-ນຳພາ ຂອງຄະນະໜ່ວຍພັກ. ພ້ອມດຽວກັນນີ້, ກໍໄດ້ກຳນົດທິດທາງແຜນການ ແລະ ໜ້າທີ່ຈຸດສຸມສຳລັບປີ 2020-2025, ພ້ອມວິທີການຈັດຕັ້ງປະຕິບັດ ທິດທາງແຜນການ ທີ່ໄດ້ກໍານົດໄວ້ໃຫ້ປະກົດຜົນເປັນຈິງ.

ການລົງປະຊາມະຕິຮັບຮອງເອົາຜົນຂອງກອງປະຊຸມໃຫຍ່ ຄັ້ງ​ທີ IV

ໜ່ວຍພັກຫ້ອງການກະຊວງ ການຕ່າງປະເທດ ມີສະມາຊິກພັກທັງໝົດ 49 ສະຫາຍ, ຍິງ 7 ສະ ຫາຍ. ໃນໄລຍະ 5 ປີ ຜ່ານມາ, ໜ່ວຍພັກຫ້ອງການ ກະຊວງການຕ່າງປະເທດ ໄດ້ເສີມຂະຫຍາຍບົດບາດ ຊີ້ນຳ-ນຳພາຂອງຕົນ, ສາມາດຍາດໄດ້ຜົນງານ ທີ່ພົ້ນເດັ່ນຫລາຍດ້ານ, ເປັນຕົ້ນແມ່ນ ການກໍ່ສ້າງ ແລະ ຂະຫຍາຍພັກໄດ້ດຳເນີນຢ່າງຕໍ່ເນື່ອງ ໂດຍຖືເອົາຄຸນນະພາບເປັນສຳຄັນ ແລະ ຕິດພັນກັບຂະບວນການ ເຄື່ອນໄຫວຂອງອົງການຈັດຕັ້ງມະຫາຊົນ, ເຊິ່ງສາມາດກໍ່ສ້າງມະຫາຊົນກ້າວໜ້າ ເພື່ອຂະຫຍາຍເຂົ້າໃນຖັນແຖວ ຂອງພັກໄດ້ທັງໝົດ 15 ສະຫາຍ, ໄດ້ເປັນເສນາທິການ ໃຫ້ແກ່ຂັ້ນເທິງ ໃນການປະຕິບັດໜ້າທີ່ ວິຊາສະເພາະໄດ້ເປັນຢ່າງດີ, ເປັນຕົ້ນ ດ້ານການອຳນວຍ ຄວາມສະດວກ ໃນການເຄື່ອນໄຫວວຽກງານຂອງການນຳ, ການສະຫລຸບສັງລວມ, ຄົ້ນຄວ້າວິໄຈສະພາບການສາກົນ, ການກະກຽມ ບົດລາຍງານຕ່າງໆ ໃຫ້ຂັ້ນເທິງ, ການແປພາສາຮັບໃຊ້ການນຳພັກ-ລັດ, ການຮັບປະກັນການປະສານງານ ພາຍໃນກະຊວງ ແລະ ລະຫວ່າງກະຊວງ ກັບພາຍນອກໃຫ້ມີຄວາມໂລ່ງລ່ຽນ, ການຮັບປະກັນການຕິດຕໍ່ສື່ສານ ແລະ ການຮັກສາຄວາມລັບ ຂອງເອກະສານ ທາງລັດຖະການ, ການເກັບມ້ຽນສຳເນົາເອກະສານສຳຄັນ, ການຫັນເປັນທັນສະ ໄໝ, ການຄຸ້ມຄອງຊັບສົມບັດຄົງທີ່, ການພັດທະນາ ພື້ນຖານ ໂຄງລ່າງວັດຖຸເຕັກນິກ, ປັບປຸງໂສມໜ້າ, ຄວາມຈົບງາມ ແລະ ຄວາມເປັນລະບຽບຮຽບຮ້ອຍພາຍໃນກະຊວງ. ຈາກຜົນງານ ທັງໝົດເຫລົ່ານີ້, ເຮັດໃຫ້ໜ່ວຍພັກຫ້ອງການ ໄດ້ຮັບການຍ້ອງຍໍບຸກຄົນ ແລະ ກົມກອງລວມໝູ່ ຈາກລັດຖະບານ ສປປ ລາວ ແລະ ຈາກປະເທດເພື່ອນ ມິດຫລາຍຄັ້ງ ແລະ ໄດ້ຮັບນາມມະຍົດໜ່ວຍພັກ ເຂັ້ມແຂງ-ຮູ້ນຳພາຮອບດ້ານ ຈຳນວນ 2 ຄັ້ງຕິດຕໍ່ກັນ.

ຄະນະກຳມະການຄວບຄຸມການເລືອກຕັ້ງ ຂອງກອງປະຊຸມໃຫຍ່ ຄັ້ງທີ IV

ສຳ​ລັບ​ທິດ​ທາງ​ແຜນ​ການຈຸດສູມ ຂອງໜ່ວຍພັກຫ້ອງການໄລຍະ ​ປີ 2020-2025 ແມ່ນ​ຈະ​ໄດ້​ສຸມ​ໃສ່ວຽກງານ ກໍ່າສ້າງພັກ-ພະນັກງານ, ຂະຫຍາຍພັກຢ່າງມີຈຸດສຸມ ແລະ ມີຄຸນນະພາບ, ເອົາ​ໃຈ​ໃສ່​ສຶກ​ສາ​ອົບ​ຮົມ​ທາງ​ ດ້ານ​ການ​ເມືອງ​ແນວ​ຄິດ ​ໃຫ້​ສະ​ມາ​ຊິ​ກ​ພັກ​ຫ້ອງ​ການ, ຍົກສູງຄຸນນະພາບ ໃນການເປັນເສນາທິການ ໃນການປະຕິບັດໜ້າທີ່​ວິ​ຊາ​ສະ​ເພາະ​, ເພີ່ມທະວີການຊີ້ນຳ-ນຳພາ ແລະ ເສີມຂະຫຍາຍ ບົດບາດຂອງ 3 ອົງການຈັດຕັ້ງມະຫາຍ ຊົນພາຍໃນຫ້ອງການ ເພື່ອເຕົ້າໂຮມມະຫາຊົນ ເຂົ້າຮ່ວມໃນຂະບວນການແຂ່ງ ຂັນຈັດຕັ້ງປະຕິບັດ ຄຳຂວັນ “3 ດີ 4 ມີ 5 ຕ້ານ” ຂອງໜ່ວຍພັກຫ້ອງການ ຕິດພັນກັບການຈັດຕັ້ງປະ ຕິບັດແຜນການກໍ່ສ້າງໜ່ວຍພັກ ປອດໃສ, ເຂັ້ມແຂງ ໜັກແໜ້ນ ໃຫ້ສຳເລັດຜົນເປັນຮູບປະທຳ.

ຜູ້ແທນກອງ​ປະ​ຊຸມ​ ໄດ້​ໃຊ້ສິດປະຊາທິປະໄຕ ປ່ອນ​ບັດ​ຄັດ​ເລືອກ​ເອົາ​ຄະ​ນະ​ໜ່ວຍພັກ​ຊຸດ​ໃໝ່ ຈຳ​ນວນ 5 ສະ​ຫາຍ ແລະ ໃນກອງປະຊຸມ ຄັ້ງປະຖົມມະລຶກ ຂອງຄະນະໜ່ວຍພັກ ໄດ້​ເປັນ​ເອ​ກະ​ພາບເລືອກ​ເອົາ ສະ​ຫາຍ ໂພ​ໄຊ ໄຂ​ຄຳ​ພິ​ທູນ ເປັນ​ເລ​ຂາ​ໜ່ວຍ​ພັກ, ສະຫາຍ ບຸນທັນ ກຸສົນສະໜອງ ເປັນຮອງເລຂາ, ສະຫາຍ ສຸຂັນໄຊ ອັກຄະວົງ ເປັນປະທານກວດກາໜ່ວຍພັກ, ສະຫາຍ ນາງ ວອນຄຳ ເຈື່ອງມະນີວົງ ແລະ ສະຫາຍ ວິຊາສັກສິດ ສະນຸກຜົນ ເປັນກຳມະການໜ່ວຍພັກ​ຫ້ອງ​ການ.

ກອງ​ປະ​ຊຸມ​ຄັ້ງນີ້, ຍັງ​​ໄດ້​ຮັບ​ຟັງການ​ໂອ້ລົມ​ຂອງ ສະຫາຍ ສະ​ເຫລີມ​ໄຊ ກົມ​ມະ​ສິດ ເຊິ່ງ​​ໄດ້​ສະແດງຄວາມ ຍ້ອງຍໍຊົມເຊີຍ ຕໍ່ຜົນງານຂອງໜ່ວຍພັກ​​ ຫ້ອງ​ການກະ​ຊວງ​ການ​ຕ່າງ​ປະ​ເທດ ໃນໄລຍະຜ່ານມາ ແລະ ໄດ້ໃຫ້ທິດຊີ້ນຳ ໃຫ້ໜ່ວຍພັກຫ້ອງການ​ ສືບ​ຕໍ່​ເສີມ​ຂະຫຍາຍ​ມູນ​ເຊື້ອ​ຂອງ​ຕົນ, ໃຫ້ຖືວຽກງານກໍ່ສ້າງພັກ-ພະນັກງານ ເປັນບຸລິມະສິດຕົ້ນຕໍ, ເພີ່ມທະວີການການນຳພາ​ດ້ານການເມືອງ- ແນວຄິດຕໍ່ສະມາຊິກພັກ-ພະນັກງານຂອງຫ້ອງການ, ເພີ່ມທະວີຄວາມສາມັກ ພາຍໃນໜ່ວຍພັກຍົກສູງຫລັກ ການລວມສູນປະຊາທິປະໄຕ, ກໍ່ສ້າງຂະຫຍາຍສະມາຊິກພັກ ໃຫ້ໄດ້ຄຸນນະພາບ, ການກໍ່ສ້າງບໍາລຸງພະນັກງານ ດ້ານພາສາຕ່າງປະເທດ ຄຽງຄູ່ກັບຄວາມຮູ້ດ້ານວິຊາສະເພາະ, ສືບຕໍ່ຊີ້ນຳ-ນຳພາ ຢ່າງໃກ້ຊິດຕໍ່ 3 ອົງການຈັດຕັ້ງມະຫາຊົນ, ເພີ່ມທະວີວຽກງານກວດກາ ໃຫ້ເຂັ້ມແຂງ ແລະ ຍົກສູງປະສິດ ທິພາບ ປະສິດທິຜົນ ໃນການປະຕິບັດໜ້າທີ່ ວິຊາສະເພາະໃນດ້ານຕ່າງໆ, ພ້ອມກັນສູ້​ຊົນບຸກບືນ ​ແລະ ​ເຊີດ​ຊູຄວາມເປັນ ເຈົ້າການ ແລະ ​ຄວາມຮັບຜິດຊອບຕໍ່​ໜ້າທີ່ການເມືອງຂອງຕົນ ສາມາດຍາດໄດ້ຜົນສຳເລັດອັນໃໝ່ ໃຫຍ່ຫລວງ ກວ່າເກົ່າ, ສືບຕໍ່ຮັກສາໄດ້ນາມມະຍົດໜ່ວຍພັກ ປອດໃສ, ເຂັ້ມແຂງ ແລະ ໜັກແໜ້ນ ເປັນສະໄໝທີສາມ ຕາມແຜນການ ແລະ ກອງປະຊຸມໄດ້ສຳເລັດລົງ ໃນຕອນເຊົ້າຂອງວັນດຽວກັນ.

Medialaos MMD