ທ່ານ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ໄດ້ຖະແຫຼງກ່ຽວກັບ ພະຍາດອັກເສບປອດທີ່ເກີດຈາກເຊື້ອຈຸລະໂຣກສາຍພັນໃໝ່ COVID-2019 ໃນວັນ ທີ 16 ມີນາ 2020, ທີ່ກະຊວງສາທາລະນະສຸກ, ທ່ານໄດ້ລາຍງານສະພາບການປັດຈຸບັນກ່ຽວກັບການລະບາດຂອງພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ COVID-19 ມີໃນຫຼາຍປະເທດໄດ້ຂະຫຍາຍເປັນວົງກວ້າງ ມາຮອດເວລາ 24:00 ໂມງເຊົ້າຂອງວັນທີ 15 ມີນາ 2020, ທົ່ວໂລກມີລາຍງານກໍລະນີທັງໝົດ 154 ປະເທດ, ກໍລະນີຢັ້ງຢືນຜູ້ຕິດເຊື້ອພະຍາດ COVID-19 ແລ້ວ 169.261 ກໍລະນີ (ເພີ່ມຂຶ້ນ 678 ກໍລະນີ ເກືອບທັງໝົດກໍລະນີໃໝ່ ແມ່ນຢູ່ນອກປະເທດ ສປຈີນ), ເສຍຊິວິດ 6.499 (ເພີ່ມຂຶ້ນ 678 ກໍລະນີ) ກໍລະນີ ແລະ ປິ່ນປົວຫາຍດີ76.618 (ເພີ່ມຂຶ້ນ 2.158).

ສຳລັບ ສປປ ລາວແມ່ນມີກໍລະນີສົງໄສສະ ສົມທີ່ໄດ້ເກັບຕົວຢ່າງມາກວດ ທັງໝົດ 79 ກໍລະນີແລະ 73 ກໍລະນີກວດບໍ່ພົບເຊື້ອພະຍາດ, ຍັງລໍຖ້າຜົນກວດ 6 ກໍລະນີ ແລະ ຈະແຈ້ງຜົນກວດໃຫ້ບັນດາທ່ານຮັບຊາບອີກ ພາຍຫຼັງໄດ້ຮັບຜົນກວດ. ຕາມການຕິດຕາມຈະເຫັນວ່າໂຕເລກໃນ ສປຈີນ ຫຼຸດລົງຫຼາຍ ແລະ ເກືອບບໍ່ມີລາຍງານກໍລະນີໃໝ່ກົງກັນຂ້າມກັບບັນດາປະເທດໃນທົ່ວໂລກໂດຍສະເພາະໃນຂົງເຂດເອີຣົບໂຕເລກລາຍງານກໍລະນີ ແລະ ເສຍຊີວິດເພີ່ມຫຼາຍຂຶ້ນທຸກມື້ໂດຍສະເພາະປະເທດ ອີຕາລີ, ອີຣານ, ຝຣັ່ງ, ສະເປນ ແລະ ສ.ເກົາຫຼີ. ເຖິງວ່າ ສປປ ລາວເຮົາ ຍັງບໍ່ມີກໍລະນີລາຍງານ ແຕ່ບັນດາປະເທດເພື່ອນບ້ານຂອງເຮົາກໍມີລາຍງານກໍລະນີ ແລະ ສັງເກດເຫັນວ່າໂຕເລກລາຍງານເພີ່ມຂຶ້ນ ແລະ ການພົວພັນໄປມາຫາສູ່ກັນໃນແຕ່ລະວັນ, ສະນັ້ນ ສປປລາວ ເຮົາແມ່ນມີຄວາມສ່ຽງສູງທີ່ຈະມີກໍລະນີນຳເຂົ້າພະຍາດດັ່ງກ່າວ.

ເພື່ອປ້ອງກັນບໍ່ໃຫ້ມີກໍລະ ນີນຳເຂົ້າພວກເຮົາໄດ້ສືບຕໍ່ກວດອຸນຫະພູມຄົນເຂົ້າ-ອອກ ທີ່ເດີນທາງມາແຕ່ຕ່າງປະເທດ ການກວດກາອຸນຫະພູມແມ່ນເພື່ອຊອກຫາຄົນທີ່ເປັນໄຂ້ເພາະອາການໄຂ້ແມ່ນໜຶ່ງໃນອາການຂອງພະຍາດ COVID-19. ວິທີການກັນກອງເພື່ອຊອກຫາຜູ້ທີ່ຕິດເຊື້ອເປັນພະຍາດ COVID-19 ທີ່ພວກເຮົາຈັດຕັ້ງປະຕິບັດຢູ່ນີ້ແມ່ນປະຕິບັດຕາມການແນະນຳຂອງອົງການອະນາໄມໂລກ ແລະ ທຸກປະເທດໃນທົ່ວໂລກກໍໄດ້ໃຊ້ວິທີການດຽວກັນກັບທີ່ ສປປ ລາວ ເຮົາປະຕິບັດເພາະຍັງບໍ່ທັນມີປະເທດໃດທີ່ສາມາດຜະລິດເຄື່ອງມື ຫຼື ອຸປະກອນທີ່ຄົນຍ່າງຜ່ານແລ້ວສາມາດຮູ້ວ່າຕິດພະຍາດດັ່ງກ່າວ.

ຂໍໃຫ້ບັນດາທ່ານຈົ່ງເຊື່ອໝັ້ນໃນມາດຕະການ ຫຼື ວິທີການທີ່ພວກເຮົາກຳລັງຈັດຕັ້ງປະຕິບັດເພາະເປັນມາດຕະການດຽວກັນກັບປະເທດອື່ນໆ ແລະ ປັດຈຸບັນກໍໄດ້ມີການແຈ້ງປິດດ່ານປະເພນີຊົ່ວຄາວຢູ່ບາງແຂວງທີ່ມີຊາຍແດນຕິດກັບປະເທດເພື່ອນບ້ານຖ້າກໍລະນີກວດພົບສົງໄສຕິດເຊື້ອພະຍາດ COVID-19 ທາງກົມຄວບຄຸມພະຍາດໄດ້ມີຫ້ອງວິເຄາະທີ່ສາມາດກວດວິເຄາະຊອກຫາເຊື້ອພະຍາດ COVID-19 ທີ່ໄດ້ມາດຖານສາກົນຄື: ສູນວິເຄາະ ແລະ ລະບາດວິທະຍາແຫ່ງຊາດ, ຫ້ອງວິເຄາະສະຖາບັນປັດສະເຕີລາວ, ຫ້ອງວິເຄາະ LOMWRU ໂຮງໝໍມະໂຫສົດ ແລະ ສູນວິໄຈພະຍາດຊຶມເຊື້ອເມລີເອີສຳລັບແຂວງພາກເໜືອ ມີຫ້ອງວິເຄາະ 2 ແຂວງທີ່ສາມາດກວດໄດ້ຄື: ແຂວງຫຼວງພະບາງ ແລະ ຫຼວງນ້ຳທາ, ສ່ວນແຂວງພາກໃຕ້ທີ່ເຮົາຈະໄດ້ສົ່ງເຄື່ອງກວດໄປເພີ່ມແມ່ນແຂວງ ຈຳປາສັກ ແລະ ສະຫວັນນະເຂດ.

ສຳລັບແຂວງ: ທ່ານທີ່ສົງໄສຕົນເອງເປັນພະຍາດດັ່ງກ່າວສາມາດໄປກວດສຸຂະພາບຢູ່ ໂຮງໝໍແຂວງຊຶ່ງແພດໝໍຈະເປັນຜູ້ກວດກາຮ່າງກາຍ ແລະ ສອບຖາມປະຫວັດຖ້າເຂົ້າກັບ ນິຍາມຜູ້ສົງໄສຕິດເຊື້ອຈະໄດ້ເກັບຕົວຢ່າງເພື່ອສົ່ງມາກວດ ແລະ ຄ່າກວດເຊື້ອແມ່ນກວດ ໃຫ້ລ້າຕາມນະໂຍບາຍຂອງລັດຖະບານ ແລະ ກຳນົດເອົາໂຮງໝໍແຂວງເປັນບ່ອນປິ່ນປົວຄົນ ເຈັບທີ່ໄດ້ຮັບການຢັ້ງຢືນຕິດເຊື້ອພະຍາດCOVID-19 ແລະ ພາຍໃນນະຄອນຫຼວງວຽງຈັນຜູ້ທີ່ສົງໄສສາມາດໄປກວດໄດ້ບັນດາໂຮງໝໍສູນກາງເຊັ່ນ: ໂຮງໝໍມິດຕະພາບ, ໂຮງໝໍ 103, ໂຮງໝໍເຊດຖາທິລາດ, ໂຮງໝໍມະໂຫສົດ… ຊຶ່ງແພດໝໍຈະເປັນຜູ້ກວດກາຮ່າງກາຍ ແລະ ສອບຖາມປະຫວັດຖ້າເຂົ້າກັບນິຍາມຜູ້ສົງໄສຕິດເຊື້ອຈະໄດ້ເກັບຕົວຢ່າງເພື່ອສົ່ງມາກວດ ແລະ ຄ່າກວດເຊື້ອແມ່ນກວດໃຫ້ລ້າຕາມນະໂຍບາຍຂອງລັດຖະບານ ແລະ ລັດຖະບານ ຍັງໄດ້ກຳນົດເອົາໂຮງໝໍ 103 ແລະ ໂຮງໝໍມິດຕະພາບເປັນສູນລວມໃນການກວດກາຄົນເຈັບສົງໄສ ແລະ ເປັນບ່ອນປິ່ນປົວຄົນເຈັບທີ່ໄດ້ຮັບການຢັ້ງຢືນຕິດເຊື້ອພະຍາດ COVID-19.

ສຳລັບບັນດາທ່ານທີ່ສົງໄສຕົນເອງຕິດເຊື້ອ ແລະ ມີຄວາມຕື່ນໂຕຢາກກວດຊອກຫາເຊື້ອແມ່ນຈະອີງຕາມຜົນກວດທີ່ແພດໝໍຢູ່ໂຮງໝໍກວດກາຮ່າງກາຍ ແລະ ສອບຖາມປະຫວັດ, ຖ້າບໍ່ເຂົ້າກັບນິຍາມກໍລະນີຜູ້ສົງໄສແມ່ນຈະບໍ່ກວດຊອກຫາເຊື້ອໃຫ້, ເນື່ອງຈາກຄ່າໃຊ້ຈ່າຍໃນການກວດແມ່ນມີມູນຄ່າສູງ ແລະ ຈະໄດ້ແນະນຳຕິດຕາມອາການຂອງທ່ານພ້ອມທັງວິທີປ້ອງກັນ. ຕອນທ້າຍຂອງການຖະແຫຼງຂ່າວຄັ້ງນີ້ທ່ານໄດ້ຮຽກຮ້ອງຂໍໃຫ້ພໍ່ແມ່ປະຊາຊົນບັນ ດາທ່ານຕິດຕາມຂ່າວຈາກແຫຼ່ງຂ່າວທີ່ເປັນທາງການເຊັ່ນ: ການຖະແຫຼງຂ່າວກ່ຽວກັບມາດຕະການ ແລະ ຄວາມຄືບໜ້າຂອງພະຍາດທີ່ກະຊວງສາທາລະນະສຸກ ແລະ Facebook ສູນ ຂ່າວສານການແພດສຸຂະສຶກສາ Centre of Information and Education for Health ສອບຖາມຂໍ້ມູນເພີ່ມເຕີມໄດ້ທີ່ ສາຍດ່ວນ 166 ຕະຫຼອດ 24 ຊົ່ວໂມງ ຫຼື ໂທເຂົ້າທີ່ເບີ +856 20 54066777.

Medialaos MMD