ຕະຫລອດໄລຍະ 65 ປີ ທີ່ຜ່ານມາ, ພັກປະຊາຊົນປະຕິວັດລາວ ໄດ້ມີຜົນສຳເລັດອັນໃຫຍ່ຫລວງຫລາຍໆດ້ານ ໃນການຊີ້ນຳ-ນຳພາປະຊາຊົນ ເຂົ້າໃນພາລະກິດປົກປັກຮັກສາ ແລະ ສ້າງສາພັດ ທະນາປະເທດຊາດ ໂດຍສະເພາະໄດ້ເຮັດໃຫ້ການ ດຳລົງຊີວິດຂອງປະຊາຊົນລາວບັນດາເຜົ່າ ມີຄວາມສະ ດວກສະບາຍ, ປະເທດຊາດຮັ່ງມີເຂັ້ມແຂງ ແລະ ນັບມື້ນັບຈະເລີນຮຸ່ງເຮືອງສີວິໄລ.

ທ່ານ ນັນທະພອນ ພະວິເສດ ເລຂາໜ່ວຍພັກກຸ່ມປະຖົມສຶກສານາເລົ່າ, ທັງເປັນອໍານວຍການໂຮງຮຽນປະຖົມສຶກສາໂພນທັນ ເມືອງໂພນໂຮງ ແຂວງວຽງຈັນ, ໄດ້ໃຫ້ສຳພາດຕໍ່ນັກຂ່າວ ສຳນັກຂ່າວສານປະເທດລາວ ໃນວັນທີ 16 ມີນາ 2020 ໂດຍມີບາງຕອນສຳຄັນວ່າ: ຂ້າພະເຈົ້າມີຄວາມພາກພູມໃຈຫລາຍທີ່ໄດ້ເກີດເປັນຄົນລາວ ແລະ ຂໍສະແດງຄວາມຮູ້ບຸນຄຸນຢ່າງລົ້ນເຫລືອຫາສິ່ງປຽບບໍ່ໄດ້ມາຍັງ ພັກປະຊາຊົນປະຕິວັດລາວ ທີ່ໄດ້ເອົາໃຈໃສ່ທຸ່ມເທທຸກເຫື່ອແຮງ ແລະ ສະຕິປັນຍາໃນການຊີ້ນຳ-ນຳພາປວງຊົນລາວທັງຊາດ ເພື່ອປົກປັກຮັກສາ ແລະ ສ້າງສາພັດທະນາປະເທດຊາດແນໃສ່ເຮັດໃຫ້ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ສັງຄົມສາມັກຄີປອງດອງ, ມີປະຊາທິປະໄຕ, ຍຸຕິທໍາ ແລະ ສີວິໄລ. ປະຊາຊົນລາວບັນດາເຜົ່າຢູ່ເຢັນເປັນສຸກທຸກມື້ນີ້, ກໍຍ້ອນມີພັກນໍາພາທີ່ສະຫລາດສ່ອງໃສ ແລະ ມີຄວາມສາມັກຄີເປັນປຶກແຜ່ນພາຍໃນພັກຈົນສາມາດເອົາຊະນະທຸກຂໍ້ຫຍຸ້ງຍາກ ແລະ ສິ່ງທ້າຍທາຍຕ່າງໆ.

ຂ້າພະເຈົ້າແມ່ນຜູ້ໜຶ່ງ ທີ່ມີຄວາມຈົ່ງຮັກພັກດີ ແລະ ມີຄວາມເຊື່ອໝັ້ນຢ່າງຕາຍໃຈຕໍ່ການຊີ້ນຳ-ນຳພາຂອງພັກ ປະຊາຊົນປະຕິວັດລາວ ແລະ ເອົາໃຈໃສ່ຕັ້ງໜ້າປະຕິບັດນະໂຍບາຍຕ່າງໆຂອງພັກໃຫ້ເຂົ້າສູ່ລວງເລິກ ແລະ ປະກົດຜົນຈິງໃນທຸກໆດ້ານ. ເພື່ອປະກອບສ່ວນເຂົ້າໃນວຽກງານຂອງພັກໃຫ້ນັບມື້ນັບມີບົດບາດ ແລະ ເຕີບໃຫຍ່ເຂັ້ມແຂງ ຂ້າພະເຈົ້າໄດ້ຕັ້ງໜ້າປະຕິບັດໜ້າທີ່ຂອງຕົນຈົນສຸດຄວາມສາມາດໃນການສິດສອນລູກຫລານ-ນ້ອງນັກຮຽນໃຫ້ຮູ້ເຖິງຄຸນສົມບັດສິນທຳປະຕິວັດ, ຄວາມຈົງຮັກພັກດີຕໍ່ປະເທດຊາດ, ຄວາມສາມັກຄີປອງດອງ, ຄວາມເສຍສະຫລະ,​ ລວມທັງປູກຈິດສໍານຶກໃຫ້ເຂົາເຈົ້າຮູ້ເຖິງບຸນຄຸນຂອງພໍ່ແມ່, ຄູບາອາຈານ, ຮັກປະເທດຊາດ ແລະ ທ່ານຜູ້ນຳຂອງ ພັກ-ລັດເຮົາ. ພ້ອມດຽວກັນນັ້ນ, ກໍໄດ້ເອົາໃຈໃສ່ຢ່າງຕັ້ງໜ້າໃນການສ້າງມະຫາຊົນກ້າວໜ້າ ແລະ ຂະຫຍາຍສະມາຊິກພັກໄປພ້ອມກັບການເຜີຍແຜ່ບັນດາເອກະສານສຳຄັນຕ່າງໆຂອງພັກ-ລັດ ທີ່ຂັ້ນເທິງມອບໝາຍໃຫ້ເປັນປົກກະຕິ.

ເນື່ອງໃນໂອກາດສະເຫລີມສະຫລອງວັນສ້າງຕັ້ງ ພັກປະຊາຊົນ ປະຕິວັດລາວ ຄົບຮອບ 65 ປີ (22 ມີນາ 1955 – 22 ມີນາ 2020) ທີ່ຈະມາເຖິງນີ້, ຂ້າພະເຈົ້າ ຂໍເປັນສ່ວນໜຶ່ງໃນການ ປຸກລະດົມສະມາຊິກພັກໃຫ້ມີສະຕິລະວັງຕົວ, ຮູ້ຈຳແນກມິດ-ສັດຕູ, ປະຢັດມັດທະຍັດ, ຫລີກເວັ້ນການຫລີ້ນກິນແບບຟຸມເຟືອຍ, ມີຄວາມຈົງຮັກພັກດີຕໍ່ປະເທດຊາດ ແລະ ຮັກອາຊີບ, ພ້ອມປະຕິໜ້າທີ່ວຽກງານຕາມຂັ້ນເທິງວາງອອກຢ່າງເຂັ້ມງວດ, ທັງເປັນແບບຢ່າງທີ່ດີໃຫ້ແກ່ມະຫາຊົນ ແລະ ເປັນພົນລະເມືອງດີຂອງສັງຄົມ.

Medialaos MMD