81 ກໍລະນີສົງໄສກວດບໍ່ພົບເຊື້ອ ໂຄວິດ-19 ອີກ 4 ກໍລະນີ ຍັງລໍຖ້າຜົນກວດ

0
263

(ພາບປະກອບ)

ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະ ນະສຸກ ໃຫ້ສຳພາດ ໃນວັນທີ 17 ມີນາ ນີ້ວ່າ:ປັດຈຸບັນ, ສປປ ລາວ ມີກໍລະນີສົງໄສຕິດເຊື້ອພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ ຫລື ໂຄວິດ-19 ທັງໝົດ 85 ກໍລະນີ (ເປັນຕົວເລກສະສົມ) ແລະ ໄດ້ເກັບຕົວຢ່່າງມາກວດທັງໝົດແລ້ວ, ໃນນັ້ນ 81 ກໍລະນີ ແມ່ນກວດບໍ່ພົບເຊື້ອພະຍາດ, ສ່ວນອີກ 4 ກໍລະນີ ຍັງລໍຖ້າຜົນກວດ; ພາຍຫລັງໄດ້ຮັບຜົນກວດແລ້ວ ຈະໄດ້ແຈ້ງໃຫ້ສັງຄົມຊາບໃນທັນທີ.

ທ່ານ ດຣ. ຣັດຕະນະໄຊ ເພັດສຸວັນ ລະບຸເຖິງສາເຫດທີ່ມີກໍລະນີສົງໄສ ເພີ່ມຂຶ້ນເລື້ອຍໆ ເນື່ອງຈາກວ່າ ປະເທດລາວຍັງບໍ່ທັນ ໄດ້ປິດດ່ານທັງໝົດ ບັນດາສະໜາມບິນສາກົນຕ່າງໆ ກໍຍັງມີຄົນເຂົ້າມາເລື້ອຍໆ ແລະ ບຸກຄົນໃດທີ່ເຂົ້າເງື່ອນໄຂ ແລະ ນິຍາມ ເຊັ່ນ: ໄຂ້, ໄອ, ຫາຍໃຈຍາກ ແລະ ມາຈາກປະເທດທີ່ມີການລະບາດ ແມ່ນຈະຖືກເກັບຕົວຢ່າງມາກວດ ດັ່ງນັ້ນ ຕົວເລກຈຶ່ງມີການເພີ່ມຂຶ້ນ. ການເພີ່ມຂຶ້ນຂອງ ຈຳນວນກໍລະນີສົງໄສ ໃນແຕ່ລະມື້ ກໍຍ້ອນວ່າ ສປປ ລາວ ມີມາດຕະການທີ່ເຄັ່ງຄັດ ທຸກຄົນທີ່ເຂົ້າມາປະເທດ ແມ່ນຈະຖືກກວດອຸນຫະພູມທັງໝົດ ແລະ ຖ້າເຂົ້າຂ່າຍນິຍາມ ແມ່ນຈະຕ້ອງນຳຕົວຢ່າງໄປກວດຫາ ເຊື້ອພະຍາດດັ່ງກ່າວທັນທີ.

ປັດຈຸບັນ, ສະພາບການລະບາດຂອງ ໂຄວິດ-19 ມາຮອດເວລາ 24:00 ໂມງຂອງວັນທີ 16 ມີນາ 2020, ມີທັງໝົດ 158 ປະເທດທົ່ວໂລກ, ມີລາຍງານການຕິດເຊື້ອ ແລະ ຢັ້ງຢືນຜູ້ຕິດເຊື້ອພະຍາດແລ້ວ 182.412 ກໍລະນີ ແລະ ເກືອບທັງໝົດກໍລະນີໃໝ່ແມ່ນຢູ່ນອກ ສປ ຈີນ, ໃນນັ້ນ ເສຍຊິວິດ 7.157 ແລະ ປິ່ນປົວດີ 79.211 ຄົນ.

Medialaos MMD