ພັກ-ລັດ ເອົາໃຈໃສ່ຢ່າງຈິງຈັງ ຕິດຕາມເຝົ້າລະວັງ ແລະ ປ້ອງກັນ ພະຍາດໂຄວິດ-19

0
373

ນັບແຕ່ມີການແຜ່ລະບາດ ຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ ໂຄວິດ-19 ຢູ່ເມືອງອູຮັນ ແຂວງຫູເປີ່ຍ ສປ ຈີນ ເມື່ອເດືອນທັນວາ 2019 ຜ່ານມາ, ຊຶ່ງໄດ້ແຜ່ລະບາດໄປຍັງຫລາຍປະເທດ ໃນທົ່ວໂລກ ອັນໄດ້ສົ່ງຜົນກະທົບຕໍ່ເສດຖະກິດ ແລະ ສ້າງຄວາມເສຍຫາຍ ຕໍ່ຊີວິດຂອງ ປະຊາຊົນຈຳນວນ ຫລວງຫລາຍ. ເຖິງວ່າ ສປປ ລາວ ຍັງບໍ່ມີການລາຍງານການແຜ່ລະບາດ ແລະ ກໍລະນີຕິດເຊື້ອພະຍາດດັ່ງກ່າວ, ແຕ່ພັກ-ລັດຖະບານ ລວມທັງພາກສ່ວນກ່ຽວຂ້ອງ ໄດ້ເອົາໃຈໃສ່ ຢ່າງຈິງຈັງ ແລະ ຕັ້ງໜ້າໃນການເຝົ້າລະວັງ, ປ້ອງກັນ ແລະ ສະກັດກັ້ນ ບໍ່ໃຫ້ພະຍາດນີ້ແຜ່ລະບາດຢູ່ປະເທດ, ທັງມີຄວາມເປັນຫ່ວງ ເປັນໄຍຕໍ່ ປະຊາຊົນບັນດາເຜົ່າ ຕະຫລອດເຖິງພະນັກງານ ທະຫານ-ຕຳຫລວດ ທຸກຖ້ວນໜ້າ ເພາະ ສປປ ລາວມີຄວາມສ່ຽງສູງ ທີ່ອາດຈະເກີດມີການແຜ່ລະບາດ ຂອງໂຄວິດ-19.

ຕະຫລອດໄລຍະສາມເດືອນກວ່າ ທີ່ມີການລະບາດຂອງພະຍາດໂຄວິດ-19 ຜ່ານມາ, ລັດຖະ ບານ ກໍຄື ກະຊວງສາທາລະນະສຸກ ໄດ້ມີມາດຕະການເຝົ້າລະວັງ ຫລາຍຈຸດທີ່ມີຄວາມສ່ຽງ ເປັນຕົ້ນ ສະໜາມບິນສາກົນ ວັດໄຕ, ສະໜາມສາກົນ ຫລວງພະບາງ ແລະ ດ່ານສາກົນອີກຫລາຍແຫ່ງ; ພ້ອມທັງຊີ້ນຳສື່ມວນຊົນລາວທຸກຂະແໜງການ ເອົາໃຈໃສ່ໂຄສະນາເຜີຍແຜ່ ຂໍ້ມູນ-ຂ່າວສານ ໃຫ້ກວ້າງຂວາງ ໂດຍສະເພາະການປະຕິບັດ ຫລັກອະນາໄມ ແລະ ວິທີການປ້ອງກັນ ໂຄວິດ-19 ຢ່າງຕໍ່ເນື່ອງ. ຈາກນັ້ນ, ລັດ ຖະບານຍັງໄດ້ແຕ່ງຕັ້ງ ຄະນະສະເພາະກິດ ເພື່ອປ້ອງກັນຄວບຄຸມ ແລະ ແກ້ໄຂການລະບາດ ຂອງພະ ຍາດໂຄວິດ-19 ໂດຍໄດ້​ອອກ​ແຈ້ງ​ການ ​ເຖິງ​ພາກສ່ວນ​ກ່ຽວຂ້ອງ​ ປະຕິບັດ​ມາດ​ຕະການ​ກັນ, ຄວບ​ຄຸມ ​ແລະ ຕອບ​ໂຕ້ ບໍ່ໃຫ້ມີ​ການລະບາດ​ຢູ່​ໃນ ສປປ ລາວ ​ເນື່ອງ​ຈາກ​ພະຍາດໂຄ​ວິດ-19 ​ໄດ້ລະບາດໃນ​ຫລາຍ​ປະ​ເທດ ແລະ ​ຂະຫຍາຍ​ເປັນ​ວົງ​ກວ້າງ, ສື​ບຕໍ່​ມີ​ກໍລະນີ​ຕິດ​ເຊື້ອ ​ແລະ ​ເສຍ​ຊີວິດ​ເພີ່ມ​ຂຶ້ນ​ໃນ​ແຕ່​ລະ​ວັນ. ສ່ວນກະຊວງການຕ່າງປະເທດ ແລະ ກະຊວງສຶກສາທິການ ແລະ ກິລາ ກໍໄດ້ເອົາໃຈໃສ່ຕິດຕາມ ຢ່າງໃກ້ຊິດ ທັງໃຫ້ການຊ່ວຍເບິ່ງແຍງ ບັນດານັກສຶກສາລາວ ທີ່ ສປ ຈີນ ລວມທັງຢູ່ເມືອອູຮັນ ເພື່ອສ້າງຄວາມເຂົ້າໃຈແກ່ຜູ້ປົກຄອງ ຕະຫລອດໄລຍະທີ່ມີການລະບາດ ມາຮອດປັດຈຸບັນທຸກຄົນ ມີຄວາມປອດໄພ. 

​ເພື່ອ​ປ້ອງ​ກັນ, ຄວບ​ຄຸມ ​ແລະ ​ແກ້​ໄຂການລະບາດ​ຂອງພະຍາດ​ ໂຄ​ວິດ-19 ຄະນະ​ສະ​ເພາະ​ກິດ ຍັງ​ໄດ້ ​ສະ​ເໜີ​ມາ​ຍັງ​ລັດຖະມົ​ນຕີ, ຫົວໜ້າ​ອົງການ, ສຳນັກງານ​ພາກ​ລັດ ​ແລະ ​ເອກະ​ຊົນ ພິຈາລະນາ ​ການ​ອະນຸມັດ​ ໃຫ້​ພະນັກງານ​ເດີນທາງ ​ໄປ​ປະຕິບັດ​ວຽກ​ງານ ​ຢູ່​ບັນດາ​ປະ​ເທດ​ທີ່​ມີ​ການລະບາດ ​ຂອງ​ພະຍາດ​ດັ່ງກ່າວ; ແຈ້ງ​ການ​ເຖິງ​ເຈົ້າ​ຄອງ ​ນະຄອນຫລວງ​ວຽງ​ຈັນ, ​ເຈົ້າ​ແຂວງ, ອຳນາດ​ການ​ປົກຄອງ​ທ້ອງ​ຖິ່ນ​ທຸກ​ພາກສ່ວນ ​ແລະ ປະຊາຊົນ​ລາວ​ບັນດາ​ເຜົ່າ​ທົ່ວ​ປະ​ເທດ ​ໂຈະ, ​ເລື່ອນ​ຊົ່ວຄາວ ຫລື ຈຳກັດຜູ້​ເຂົ້າ​ຮ່ວມ​ການຈັດ​ງານ​ປະ​ເພນີ, ງານດອງ, ງານ​ສ້າງສັນ ​ແລະ ກິດຈະກຳ​ອື່ນໆ ທີ່​ມີ​ຈຳນວນ​ພົນ​ເຂົ້າຮ່ວມ​ຫລາຍ ລວມທັງ​ການຈັດ​ງານ ​ແຂ່ງຂັນ​ກິລາ​ຕ່າງໆ​ ຈົນ​ກວ່າ​ສະພາບ​ການລະບາດ ​ຂອງ​ພະຍາດໂຄ​ວິດ-19 ສາມາດຄວບ​ຄຸມ​ໄດ້; ແນະນຳບັນດາຫົວໜ້າ​ບໍລິສັດ​ທ່ອງ​ທ່ຽວ ​ໃນ​​ທົ່ວ​ປະ​ເທດ​ໃຫ້​ເລື່ອນ​ ການ​ຈັດ​ທົວ​ ໄປ​ທ່ອງ​ທ່ຽວ​ປະ​ເທດ​ຕ່າງໆ ທີ່​ມີ​ການລະບາດ​ ​ແລະ ​ເລື່ອນ​ການ​ຮັບທົວຈາກ​ປະ​ເທດ​ຕ່າງໆ ທີ່​ມີ​ການລະບາດ​ມາ​ທ່ຽວ​ລາວ​​ໃນ​ໄລຍະ​ນີ້; ແຈ້ງເຖິງຜູ້ຕາງໜ້າ ອົງການຈັດຕັ້ງສາກົນ, ທູດ, ອຸປະທູດ ທີ່ປະຈໍາການຢູ່ ສປປ ລາວ ​ແລະ ຜູ້ປະກອບການທຸລະກິດທຸກພາກສ່ວນ, ທຸກໂຄງການ ທັງພາກລັດ ແລະ ເອກະຊົນ ທີ່ມີບຸກຄາລາກອນ ຕ່າງປະເທດ ປະຕິບັດຕາມຂໍ້ແນະນໍາ ແລະ ໃຫ້ການຮ່ວມມືກັບເຈົ້າໜ້າທີ່; ສິ່ງສຳຄັນໄດ້ແຈ້ງເຕືອນ ໃຫ້ທຸກຄົນເອົາໃຈໃສ່ຕິດຕາມຕົນເອງ ກ່ຽວກັບໝວດອາການ ທີ່ຄິດວ່າອາດຕິດ ເຊື້ອພະຍາດ COVID-19 ເຊັ່ນ: ໄຂ້, ໄອ ແລະ ຫາຍໃຈຍາກ, ທັງເປີດສາຍດ່ວນ 166 ເພື່ອຂໍຄໍາແນະນໍາຕື່ມອີກ.

ໃນວັນທີ 12 ມີນາ 2020, ທ່ານ ພັນຄຳ ວິພາວັນ ຜູ້ປະຈຳການເລຂາທິການສູນກາງພັກ ຮອງປະທານປະເທດ ໄດ້ແຈ້ງຍົກເລີກການ ຈັດງານໂຮມຊຸມນຸມ ເພື່ອສະເຫລີມສະຫລອງ ວັນສຳຄັນຕ່າງໆ ຂອງພັກ ແລະ ຂອງຊາດ ລວມທັງກິດຈະກຳຕ່າງໆ ທີ່ມີຄົນເຂົ້າຮ່ວມຈຳນວນຫລາຍ; ໃນຂະນະທີ່ ເຈົ້າ ເມືອງຈັນທະບູລີ ກໍໄດ້ແຈ້ງຂໍ້ຫ້າມ ໃນໂອກາດສະຫລອງບຸນປີໃໝ່ລາວ ເຊັ່ນ: ຫ້າມຕັ້ງເຕັ້ນ, ຊຸມແຊວ-ຫົດນ້ຳ, ດື່ມສິ່ງມຶນເມົາຢູ່ໜ້າຮ້ານ ຕາມສອງຝາກທາງ ຖະໜົນສາມແສນໄທ ແລະ ເສດຖາທິລາດ; ບໍ່ໃຫ້ຈັບຈອງ-ເຊົ່າສະຖານທີ່ໜ້າເຮືອນ, ຫ້າງຮ້ານ, ທາງຍ່າງ ເພື່ອເປັນບ່ອນຈັດກິດຈະກຳ ສະຫລອງປີໃໝ່ ລາວ ທີ່ພາໃຫ້ເກີດສະພາບ ສັນຈອນແອອັດ ຕາມເສັ້ນທາງດັ່ງກ່າວ ຄືປີຜ່ານມາ; ສ່ວນເຈົ້າ ແຂວງຫລວງພະບາງ ສະເໜີຂໍທິດຊີ້ນຳ ຈາກລັດຖະບານ ເພື່ອຍົກເລີກ 4 ກິດຈະກໍາ ຄື: ງານປະກວດນາງສັງຂານ, ການຈັດຕະຫລາດມວນຊົນ ຕາມເສັ້ນທາງກາງເມືອງ, ການລົງຕົບພະທາດຊາຍ ທີ່ດອນຊາຍມຸງຄຸນ ແລະ ປະເພນີແຫ່ວໍ່ ທີ່ມີມວນຊົນເຂົ້າຮ່ວມ ຢ່າງຫລວງຫລາຍ; ເຊັ່ນດຽວກັບ ເຈົ້າເມືອງປາກລາຍ ແຂວງໄຊຍະບູລີ ກໍໄດ້ແຈ້ງຍົກເລີກງານປະເພນີ ຜີໂຂນ; ເມືອງໂພນໂຮງ ແຂວງວຽງຈັນ ກໍໄດ້ໂຈະເລື່ອນ ຫລື ຈຳກັດການຈັດງານບຸນປະເພນີ, ງານດອງ, ງານສ້າງສັນ ແລະ ຈິດຈະກຳອື່ນໆ ເພື່ອຫລີກເວັ້ນການເຂົ້າຮ່ວມຂອງມວນຊົນຈຳນວນຫລາຍ. ໃນວັນທີ 12 ມີນາ 2020 ເຈົ້າແຂວງຫົວພັນ ໄດ້ແຈ້ງປິດ 10 ດ່ານປະ ເພນີ ແລະ ໃຫ້ບໍລິການພຽງ 4 ດ່ານ ຄື: ດ່ານນ້ຳໂສຍ, ບ້ານດ່ານ, ປ່າຮ່າງ ແລະ ດ່ານສົມຫວັງ. ທັງນີ້ ນອກຈາກຈະເປັນ ການຮັກສາ ຄວາມເປັນລະບຽບຮຽບຮ້ອຍ ແລະ ຄວາມສະຫງົບປອດໄພ ແລ້ວ ຍັງເປັນການສະກັດກັ້ນ ແລະ ປ້ອງພະຍາດໂຄວິດ-19 ອີກດ້ວຍ.

ຢ່າງໃດກໍຕາມຫລ້າສຸດ ທ່ານ ນາຍົກລັດຖະມົນຕີ ທອງລຸນ ສີສຸລິດ ໄດ້ມີຄຳສັ່ງໃຫ້ກະຊວງສຶກສາທິການ ແລະ ກິລາ ປິດໂຮງຮຽນລ້ຽງເດັກ ແລະ ໂຮງຮຽນອານຸບານຊົ່ວຄາວ, ທັງມີການຄົ້ນຄວ້າ ເພື່ອດຳເນີນປິດໂຮງຮຽນລະດັບຊັ້ນປະຖົມ, ມັດທະຍົມ ແລະ ມະຫາວິທະຍາໄລຕໍ່ໄປ; ຄະນະສະເພາະກິດ ເພື່ອປ້ອງກັນຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ-19 ໄດ້ຍົກລະດັບມາດຕະການ ກັນ ແລະ ຄວບຄຸມການລະບາດ ຂອງພະຍາດໂຄວິດ-19 ເພື່ອຫລຸດຜ່ອນຄວາມສ່ຽງທີ່ອາດເກີດການຕິດເຊື້ອ ແລະ ການແຜ່ລະບາດຂອງ ໂຄວິດ-19 ມາສູ່ ສປປ ລາວ ເນື່ອງຈາກປະເທດເພື່ອນບ້ານ ໃກ້ຄຽງມີການ ລະບາດແລ້ວ. ສໍາລັບບັນດາມາດຕະການ ທີ່ໄດ້ຮັບການຍົກລະດັບປະກອບ ມີ: ທຸກຄົນທີ່ເດີນ ທາງເຂົ້າມາ ສປປ ລາວ ຫາກມີອາການໄຂ້, ໄອ ຫລື ຫາຍໃຈຍາກ ແລະ ມີປະ ຫວັດການເດີນທາງມາຈາກເຂດທີ່ມີການລະບາດ ຫລື ມີປະຫວັດການສຳຜັດ ກັບຜູ້ທີ່ໄດ້ຮັບການຢັ້ງຢືນວ່າຕິດເຊື້ອ ຕ້ອງໄດ້ຮັບການແຍກປ່ຽວ ຢູ່ໂຮງໝໍມະໂຫສົດ, ເສດຖາທິລາດ, ໂຮງໝໍມິດຕະພາບ, ໂຮງໝໍ 103 ແລະ ໂຮງໝໍແຂວງທົ່ວປະເທດ; ທຸກຄົນທີ່ເດີນທາງເຂົ້າມາ ສປປ ລາວ ຫາກມີອາການເຂົ້າກັບເງື່ອນໄຂ ເຊັ່ນ: ມາຈາກປະເທດທີ່ມີຊາຍແດນຕິດຈອດ ຫລື ບໍ່ມີຊາຍແດນຕິດຈອດກັບ ສປປ ລາວ, ລວມທັງບຸກຄົນທີ່ມີປະຫວັດການສຳຜັດກັບຜູ້ ທີ່ໄດ້ຮັບການຢັ້ງຢືນວ່າຕິດເຊື້ອ ຕ້ອງປະຕິບັດມາດຕະການ ຈຳກັດບໍລິເວນ ຢູ່ສະຖານທີ່ພັກເຊົາຂອງຕົນເອງເປັນເວລາ 14 ວັນ; ທຸກຄົນທີ່ເດີນທາງເຂົ້າມາ ສປປ ລາວ ຫາກບໍ່ມີອາ ການ ແລະ ບໍ່ເຂົ້າກັບເງື່ອນໄຂແຍກປ່ຽວ ລວມທັງການຈຳກັດບໍລິເວນ ແມ່ນໃຫ້ປະຕິບັດ ມາດຕະການຕິດຕາມຕົນເອງ 14 ວັນ.

Medialaos MMD