ມີພັກນຳພາທີ່ສະຫລາດສ່ອງໃສ ປະຊາຊົນຈຶ່ງພົ້ນທຸກ ແລະ ມີການດຳລົງຊີວິດທີດີ

0
135

ປະຊາຊົນບ້ານຂຸນຕາທ່າ ເມືອງສີໂຄດຕະບອງ ນະຄອນຫລວງວຽງຈັນ 140 ກວ່າຄອບ ຄົວ ໄດ້ຫລຸດພົ້ນອອກຈາກຄວາມທຸກຍາກ ແລະ ມີການດຳລົງຊີວິດທີ່ດີຂຶ້ນເທື່ອລະກ້າວ. ທັງນີ້, ກໍຍ້ອນການຊີ້ນຳ-ນຳພາ ທີ່ສະຫລາດສ່ອງໃສ ຂອງພັກປະຊາຊົນປະຕິວັດລາວ.

ທ່ານ ຈັນເພັງ ບຸນສຸລິວັນ ເລຂາພັກບ້ານ, ນາຍບ້ານຂຸນຕາທ່າ ໄດ້ໃຫ້ສຳພາດໃນວັນທີ 20 ມີນາ 2020 ນີ້ວ່າ: ຕະຫລອດໄລຍະຜ່ານມາ ພວກເຮົາໄດ້ສຸມທຸກຄວາມພະຍາຍາມ ເພື່ອປັບປຸງ ແລະ ແກ້ໄຂຊິວິດການເປັນຢູ່ ຂອງພໍ່ແມ່ປະຊາຊົນ ບັນດາເຜົ່າ ພາຍໃນບ້ານ ມາຮອດປັດຈຸບັນ ສາມາດລົບລ້າງຄອບຄົວທຸກຍາກໄດ້ 100% ເຖິງແນວໃດກໍດີ ພວກເຮົາກໍຍັງໄດ້ສືບຕໍ່ເຜີຍແຜ່ ແນວທາງນະໂຍບາຍຂອງພັກ ແລະ ລັດຖະບານ ໃຫ້ປະຊາຊົນ ເພື່ອພັດທະນາຕົນເອງ, ພັດທະນາບ້ານ ກໍຄື ປະເທດຊາດ ໃຫ້ນັບມື້ນັບດີຂຶ້ນ ແລະ ມີການພັດທະນາຢ່າງຕໍ່ເນື່ອງ.    ພ້ອມດຽວກັນນັ້ນ, ກໍໄດ້ເອົາໃຈໃສ່ຊີ້ນໍາວຽກງານປ້ອງກັນ ຊາດ-ປ້ອງກັນຄວາມສະຫງົບພາຍໃນບ້ານ ເພື່ອເຮັດໃຫ້ປະຊາຊົນ ມີການດຳລົງຊີວິດທີ່ສະດວກສະບາຍ ແລະ ປອດໄພ ກໍຄື ເຮັດໃຫ້ສັງຄົມ ແລະ ປະເທດຊາດຂອງພວກເຮົາມີຄວາມສະຫງົບ ແລະ ເປັນລະບຽບຮຽບຮ້ອຍ.

ຂ້າພະເຈົ້າຂໍສະແດງຄວາມຮູ້ບຸນຄຸນມາຍັງ ພັກ ແລະ ລັດຖະບານ ທີ່ໄດ້ເອົາໃຈໃສ່ ແລະ ທຸ່ມເທ ທຸກເຫື່ອແຮງ ແລະ ສະຕິປັນຍາ ເຂົ້າໃນການຊີ້ນຳ-ນຳພາ ປວງຊົນລາວທັງຊາດ ເພື່ອປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອເຮັດໃຫ້ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ສັງຄົມມີຄວາມສາມັກຄີປອງດອງ, ຍຸຕິທໍາ ແລະ ສີວິໄລ.

ໃນໂອກາດດຽວກັນ, ທ່ານ ນາງ ໄລລີລອນ ທະລັງສີ ຮອງເລຂາພັກບ້ານ, ຮອງນາຍບ້ານຂຸນຕາທ່າ ກໍໄດ້ແຈ້ງໃຫ້ຮູ້ວ່າ: ບ້ານຂຸນຕາທ່າ ຍັງໄດ້ເອົາໃຈໃສ່ສຶກສາອົບຮົມ ພໍ່ແມ່ປະຊາຊົນ ໂດຍສະເພາະເພດຍິງ ໃຫ້ຖືສຳຄັນໃນການ ຮັກສາວັດທະນະທຳ ແລະ ຮີດຄອງປະເພນີອັນດີງາມຂອງຊາດລາວ, ພ້ອມທັງເຊີດຊູນ້ຳໃຈຮັກຊາດ ແລະ ພາລະບົດບາດຂອງແມ່ຍິງລາວ. ຂ້າພະເຈົ້າ ມີຄວາມຮູ້ສຶກດີໃຈຫລາຍທີ່ໄດ້ປະກອບສ່ວນເຂົ້າໃນ ວຽກງານປົກປັກຮັກສາ ແລະ ສ້າງສາພັດທະນາ ປະເທດຊາດ ຕະຫລອດໄລຍະຜ່ານມາ ແລະ ຂໍສະແດງຄວາມຮູ້ບຸນຄຸນຢ່າງຈິງໃຈ ມາຍັງພັກປະຊາຊົນປະຕິວັດລາວ ທີ່ໄດ້ກໍ່ສ້າງຕົນເອງໃນການດຳລົງຊີວິດ ທີ່ປອດໃສຂາວສະອາດ, ມີຄວາມອຸ່ງອ່ຽງທຸ່ນທ່ຽງ, ມີຄວາມຮູ້ຄວາມສາມາດ. ຂ້າພະເຈົ້າ ຈະສຸມທຸກເຫື່ອແຮງ ແລະ ສະຕິປັນຍາ ເພື່ອສືບຕໍ່ປະກອບສ່ວນເຂົ້າໃນ ການສ້າງສາ ແລະ ພັດທະນາບ້ານຂຸນຕາທ່າ ໃຫ້ນັບມື້ນັບຈະເລີນຮຸ່ງເຮືອງສີວິໄລ.

Medialaos MMD