ໃນບໍ່​ດົນ​ມາ​ນີ້, ບໍ​ລິ​ສັດ ລ້ານ​ຊ້າງ ມີ​ເນ​ໂຣນ​ສ ລິ​ມິ​ເຕັດ ບໍ່​ຄຳທອງ​ເຊ​ໂປນ(ລ​ຊມ​ລ)ໄດ້​ມອບ​ຕູ້​ວາງ​ສະ​ແດງໃຫ້​ຫໍ​ພິ​ພິທະ​ພັນ ​3 ​ພາກ​ສ່ວນ ຄື: ຫໍ​ພິ​ພິ​ທະ​ພັນແຫ່ງ​ຊາດ​ລາວທີ່​ນະ​ຄອນຫລວງວຽງ​ຈັນຫໍ​ພິ​ພິ​ທະ​ພັນ​ ແຂວງ​ສະ​ຫວັນ​ນະ​ເຂດ ແລະ ຫໍ​ວັດ​ທະ​ນະ​ທຳເມືອງວິ​ລະ​ບູ​ລີ ລວມ​ມູນ​ຄ່າ25.000 ໂດ​ລາສະ​ຫະ​ລັດ. ​ເພື່ອ​ປົກ​ປັກ​ຮັກ​ສາ ແລະ ສືບ​ຕໍ່​ສົ່ງ​ເສີມ​ວັດ​ຖຸ​ບູ​ຮານ​ທີ່​ຄົ້ນ​ພົບ​ຢູ່ໃນ​ເຂດ​ຂຸດ​ຄົ້ນບໍ່​ຄຳທອງ​ເຊ​ໂປນ ໃນ​ເຂດເມືອງວິ​ລະ​ບູ​ລີແຂວງ​ສະ​ຫວັນ​ນະ​ເຂດ.

ທ່ານ ສະໝານ ອະເນກາ ຜູ້ອຳນວຍການໃຫຍ່ ແລະ ຜູ້ຈັດການ ພະແນກພົວພັນກັບຜູ້ມີສ່ວນຮ່ວມ ແລະ ຊຸມຊົນຂອງ ລຊມລ ​ແຈ້ງໃຫ້​ຮູ້ວ່າ: ໃນເດືອນກັນຍາ 2019 ທາງ ບໍລິສັດ ລຊມລ ກໍໄດ້ມອບວັດຖຸບູຮານ ກວ່າ 7.800 ລາຍການໃຫ້ແກ່ລັດຖະບານລາວ ລວມມີ ວັດຖຸບູຮານປະເພດທອງ, ທອງແດງ, ຫີນປະດັບເອ້, ເຄື່ອງປັ້ນດິນເຜົາ, ໄມ້ ​ແລະ ອື່ນໆ ທີ່​ຄົ້ນ​ພົບຢູ່ໃນເຂດຂຸດຄົ້ນບໍ່ຄຳ-ທອງເຊໂປນ, ​ເຊິ່ງວັດຖຸບູຮານທີ່ໄດ້ຄົ້ນພົບນັ້ນ​ ໃຫ້​ສົ່ງມອບໃຫ້ລັດຖະບານ ​ເພື່ອ​ປົກ​ປັກ​ຮັກສາວັດຖຸບູຮານ. ນັບຕັ້ງແຕ່ ປີ 2008 ເປັນຕົ້ນມາ, ທາງບໍລິສັດ ໄດ້ລົງທຶນຫລາຍກວ່າ 1,3 ລ້ານໂດລາສະຫະລັດ ເຂົ້າໃນການສະໜັບສະໜູນ ການອະນຸຮັກປະຫວັດສາດລາວ ແລະ ມໍລະດົກວັດທະນະທຳ ກວ່າ 3 ພັນປີ. ຜ່ານການຮ່ວມມືດ້ານການ ຄົ້ນຄວ້າບູຮານຄະດີ ກັບກົມມໍລະດົກ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ມະຫາວິທະຍາໄລແຫ່ງຊາດລາວ ແລະ ມະຫາວິທະຍາໄລເຈມສຄຸກ ຂອງອົສຕຣາລີ. ການຮ່ວມມືດັ່ງກ່າວ, ແມ່ນການສະໜັບສະໜູນ ວຽກງານພາກສະໜາມ ທີ່ໄດ້ເປີດໂອກາດ ໃຫ້ມີອາສາສະໝັກ ຈາກນະຄອນຫລວງວຽງຈັນ, ປະຊາຊົນທ້ອງຖິ່ນ, ນັກສຶກສາຈາກ ປະເທດອົສຕຣາລີ, ນັກສຶກສາລາວ, ນັກບູຮານຄະດີ ແລະ ເຈົ້າໜ້າທີ່ ຈາກກົມມໍລະດົກທີ່ມາປະຈຳຢູ່ບໍ່ຄຳ-ທອງເຊໂປນ ໄດ້ຮ່ວມມືກັນໃນດ້ານ ການປະຕິບັດ ງານພາກສະໜາມ ແລະ ວຽກງານຄົ້ນຄວ້າຕ່າງໆ ຢ່າງໃກ້ຊິດ.

ທ່ານ ທອງໃບ ໂພທິສານ ຫົວໜ້າກົມມໍລະດົກ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກ່າວວ່າ: ການຮ່ວມມືລະຫວ່າງ ກົມມໍລະດົກ ​ແລະ ບໍລິສັດ ລຊມລ ເປັນການຮ່ວມມືທາງ​ດ້ານ​ການ​ຄຸ້ມຄອງ​ວັດ​ຖຸ​ບູນຮານ ທັງ​ເປັນ​ການເພື່ອເຜີຍແຜ່ ມໍລະດົກດ້ານວັດທະນະທຳ ໃຫ້ປະຊາຊົນລາວ ກໍຄືນັກທ່ອງທ່ຽວ, ທີ່ມາເຫັນ ກໍສາມາດເວົ້າຕໍ່ກັນໄປ ແລະ ຢາກກັບມາຢ້ຽມຢາມຕົ້ນກຳເນີດ ຂອງວັດຖຸທີ່ມີຄຸນຄ່າເຫລົ່ານີ້. ຜ່ານມາແມ່ນໄດ້ມີການຄົ້ນພົບ ວັດຖຸບູຮານສຳຄັນຫລາຍຢ່າງ ຢູ່ບໍ່ຄຳ-ທອງເຊໂປນ ໃນບໍ ລິເວນເມືອງວິລະບູລີ ແຂວງສະຫວັນນະເຂດ ເຊິ່ງໃນເດືອນມີນາ ປີ 2018, ທີມງານນັກບູຮານຄະດີ ກໍໄດ້ຄົ້ນພົບຫລັກຖານ ທີ່ເປັນໄມ້ຄ້ຳຫລຸມບໍ່ແຮ່-ບູຮານ ຫລາຍກວ່າ 200 ຂຸມ ທີ່ມີອາຍຸຫລາຍກວ່າ 3.000 ປີ. ການຄົ້ນພົບນີ້, ໄດ້ເຮັດໃຫ້ເມືອງວິລະບູລີ ໄດ້ກາຍເປັນໜຶ່ງໃນເຂດ ທີ່ມີການຄົ້ນພົບຮ່ອງຮອຍ ການຂຸດຄົ້ນບໍ່ແຮ່ ແລະ ການຫລໍ່-ຫລອມໂລຫະ (ໂລຫະກິດ) ໃນຂົງເຂດພາກພື້ນອາຊີຕາເວັນ ອອກສ່ຽງໃຕ້ ໃນຍຸກກ່ອນປະຫວັດສາດ.

Medialaos MMD