ພັກປະຊາຊົນປະຕິວັດລາວ ອຳນວຍຄວາມສະດວກ ໃຫ້ການດຳເນີນທຸລະກິດພາຍໃນ

0
49

ຕະຫລອດໄລຍະ 65 ປີທີ່ຜ່ານມາ, ພັກປະຊາຊົນປະຕິວັດລາວ ໄດ້ເຮັດທຸກສິ່ງທຸກຢ່າງ ເພື່ອສ້າງເງື່ອນໄຂເອື້ອອຳນວຍຄວາມດວກສະບາຍ ໃຫ້ແກ່ການດຳເນີນທຸລະກິດ ຫລື ກິດຈະການຕ່າງໆ ຢູ່ພາຍໃນ ສປປ ລາວ ເພື່ອພ້ອມກັນສ້າງສາ ແລະ ພັດທະນາປະເທດຊາດ ໃຫ້ຈະເລີນຮຸ່ງເຮືອງ.

      ສະມາຄົມລົດຕູ້ຂົນສົ່ງໂດຍສານ-ໃຫ້ເຊົ່າ-ເໝົາ ຢູ່ນະຄອນຫລວງວຽງຈັນ ກໍເປັນໜຶ່ງທຸລະກິດ ທີ່ໄດ້ຮັບການຊີ້ນຳ-ນຳພາຢ່າງໃກ້ຊິດ ແລະ ຄວາມເປັນຫ່ວງເປັນໄຍ ຈາກການນຳພັກ-ລັດ ຕະຫລອດມາ ຈົນເຮັດໃຫ້ທຸລະກິດ ມີການພັດທະນາ, ເຕີບໃຫຍ່ ຂະຫຍາຍຕົວຢ່າງຕໍ່ເນື່ອງ ທາງດ້ານປະລິມານ ແລະ ຄຸນນະພາບ.

      ທ່ານ ບຸນຄ້ຳ ລາດຊະວົງ ປະທານສະມາຄົມ ລົດຕູ້ຂົນສົ່ງໂດຍສານ-ໃຫ້ເຊົ່າ-ເໝົາ ນະຄອນຫລວງວຽງຈັນ, ໄດ້ໃຫ້ສຳພາດຕໍ່ນັກຂ່າວ ໃນວັນທີ 23 ມີນາ 2020 ນີ້ວ່າ: ນັບແຕ່ສະມາຄົມໄດ້ຮັບການສ້າງ ຕັ້ງເປັນຕົ້ນມາ ການດຳເນີນກິດຈະການ ດ້ານການບໍລິການ ຂົນສົ່ງຜູ້ໂດຍສານ ກໍມີບາດກ້າວຂະຫຍາຍຕົວຢ່າງຕໍ່ເນື່ອງ ເຫດການສຳຄັນທີ່ພົ້ນເດັ່ນ ແມ່ນການຮັບໃຊ້ງານມະຫາກຳກິລາຕ່າງໆ ແລະ ໃນໄລຍະໜຶ່ງ ສະມາຄົມ ເກີດມີບັນຫາທາງດ້ານລະບົບການເງິນ ຈົນບໍ່ສາມາດດຳເນີນ ກິດຈະການຕໍ່ໄປໄດ້ ຈາກນັ້ນພາກລັດ ກໍໄດ້ເຂົ້າມາຊ່ວຍເຫລືອເພື່ອມາຊີ້ນຳ, ຄຸ້ມຄອງ ແລະ ປັບປຸງແກ້ໄຂລະບົບການຈັດຕັ້ງ ແລະ ການບໍລິຫານຕ່າງໆ ເປັນເວລາ 2 ປີ ຈົນເຮັດໃຫ້ສະມາຄົມເຕີບໃຫຍ່ເຂັ້ມແຂງ ແລະ ມີການພັດທະນາຈົນຮອດປັດຈຸບັນ. ກຸ່ມລູກຄ້າຫລັກ ແມ່ນນັກທ່ອງທ່ຽວຕ່າງປະເທດ, ການບໍລິການຂອງພວກເຮົາ ຈະເນັ້ນໃສ່ຈັນຍາບັນ ແລະ ຄຸນນະພາບເປັນຫລັກ ເພື່ອສ້າງຄວາມປະທັບໃຈໃຫ້ຜູ້ໃຊ້ບໍລິການ ແລະ ສ້າງຊື່ສຽງໃຫ້ກັບປະເທດຊາດ ເນື່ອງຈາກວ່າການບໍລິການ ດ້ານຂົນສົ່ງ ກໍຖືວ່າເປັນປ້ອມ ດ້ານໜ້າໃນການ ຕ້ອນຮັບແຂກຕ່າງດ້າວທ້າວຕ່າງເມືອງ ກໍຄື ບັນດານັກທ່ອງທ່ຽວທີ່ເຂົ້າມາ ສປປ ລາວ. ຖ້າການບໍລິການ ສາມາດສ້າງຄວາມເພິ່ງພໍໃຈ ແລະ ຄວາມປະທັບໃຈ ກໍຈະສ່ວນໜຶ່ງທີ່ສຳຄັນໃນການ ດຶງດູດນັກທ່ອງທ່ຽວ ໃຫ້ເຂົ້າມາປະເທດເຮົານັບມື້ນັບຫລາຍຂຶ້ນ. ຄຽງຄູ່ກັບການດຳເນີນທຸລະກິດ, ສະມາດຄົມດັ່ງກ່າວ ກໍໄດ້ໃຫ້ການສະໜັບສະໜູນຊຸກຍູ້ ຂະບວນການຕ່າງໆ ຂອງພັກ-ລັດ ຢ່າງສະໝ່ຳສະເໝີ ແລະ ມອບພັນທະໃຫ້ລັດຖະບານ ໂດຍສະເລ່ຍປີໜຶ່ງ ປະມານ 500 ລ້ານກີບ.

ສະມາຄົມລົດຕູ້ຂົນສົ່ງໂດຍສານ-ໃຫ້ເຊົ່າ-ເໝົາ ນະຄອນຫລວງວຽງຈັນ, ຕັ້ງຢູ່ບ້ານສົມສະໜຸກ ເມືອງຫາດຊາຍຟອງ ນະຄອນຫລວງວຽງຈັນ, ຖືກສ້າງຕັ້ງຂຶ້ນໃນປີ 2002 ໂດຍມີ ລົດ 4-5 ຄັນໃນເບື້ອງຕົ້ນ ແລະ ມາຮອດປີ 2019 ມີລົດ 260 ກວ່າຄັນ ແລະ ປັດຈຸບັນ ໄດ້ຮ່ວມມືກັບໂລກາ (LOCA) ເຊິ່ງເປັນບໍລິການເອີ້ນລົດຮັບສົ່ງໂດຍສານ ຜ່ານແອັບພລິເຄຊັນເທິງມືຖື ເພື່ອຫັນການບໍລິການລົດຕູ້ໃນ ສປປ ລາວ ໃຫ້ເປັນທັນສະໄໝ, ເພີ່ມຄວາມສະດວກສະບາຍ ແລະ ມີຄວາມໂປ່ງໃສ ດ້ານລາຄາ ແລະ ໃຫ້ບໍລິການ 24 ຊົ່ວໂມງ.

Medialaos MMD