ນາຍົກລັດຖະມົນຕີ ຮຽກຮ້ອງໃຫ້ພໍ່ແມ່ປະຊາຊົນຫລຸດຜ່ອນ ການໂຮມຊຸມນຸມ ເພື່ອຫລຸດຜ່ອນການແຜ່ເຊື້ອໂຄວິດ-19

0
57

ໃນ​ວັ​ນ​ທີ 25 ມີ​ນາ 2020, ທີ່​ສຳ​ນັກ​ງານ​ນາ​ຍົກ​ລັດ​ຖະ​ມົນ​ຕີ ທ່ານ ທອງ​ລຸນ ສີ​ສຸ​ລິດ ນາ​ຍົກ​ລັດ​ຖະ​ມົນ​ຕີ ​ແຫ່ງ ສ​ປ​ປ ລາ​ວ ພ້ອມ​ດ້ວ​ຍ​ຄະ​ນະ​ສະ​ເພາະ​ກິດ​ ຕ້ານ ແລະ ສະ​ກັດ​ກັ້ນ​ພະ​ຍາດ​ໂຄວິດ-19 ໄດ້​ຖະ​ແຫລງ​ຂ່າວ ແລະ ແຈ້ງ​ສະ​ພາບ ​ກ່ຽວ​ກັບ​ການ​ລະ​ບາດ ​ຂອງ​ພະ​ຍາ​ດ​ໂຄວິດ-19 ພ້ອມ​ທັງ​ຮຽກ​ຮ້ອງ​ໃຫ້​ປະ​ຊາ​ຊົນ​ລາວ​ບັນ​ດາ​ເຜົ່າ​ ຫລຸດ​ຜ່ອນ​ການ​ໂຮມ​ຊຸມ​ນຸ​ມ​ ເພື່ອ​ຫລຸດ​ຜ່ອນ​ການ​ແຜ່​ເຊື້ອ​ພະ​ຍາດ ແລະ ດ້ວ​​ຍຄວາມ​ເປັນ​ຫ່ວງ​ເປັນ​ໃຍ ​ພໍ່​ແມ່​ປະ​ຊາ​ຊົນ​ລາວ​ທຸກ​ຄົນ.

ທ່ານ ນາ​ຍົກ​ລັດ​ຖະ​ມົນ​ຕີ ໄດ້​ໃຫ້​ຮູ້​ວ່າ: ປັດ​ຈຸ​ບັນໄດ້​ມີ​ການ​ຫລັ່ງ​ໄຫລ​ ຂອງ​ແຮງ​ງານ​ລາວ ​ຈຳ​ນວນ​ຫລວງ​ຫລ​າຍ ທີ່​ມາ​ຈາກ​ຕ່າງ​ປະ​ເທດ ໂດຍ​ສະ​ເພາະ​ແມ່ນ​ ມາ​ຈາກ​ປະ​ເທດ​ໄທ ພວກ​ເຮົາ​ບໍ່​ສາ​ມາດ​ຄວບ​ຄຸມ ຕາມ​ລະ​ບຽບ​ການ ​ທີ່​ພວກ​ເຮົາ​ວາງ​ອອກ​ໄດ້ ເຊິ່ງ​ບັນ​ດາ​ແຂວງ​ຕ່າງໆ​ ກໍ​ໄດ້​ເອົາ​ໃຈ​ໃສ່​ກວດ​ກາ ຕິດ​ຕາມ ແລະ ວັດ​ອຸນ​ຫະ​ພູມ​ຮ່າງ​ກາຍ, ເຊິ່ງ​ຜູ້​ທີ່​ເປັນ​ໄຂ້​​ໄດ້​ນຳ​ໄປ​ແຍກ​ຕົວ, ສຳ​ລັບ​ຜູ້​ທີ່​ບໍ່​ໄດ້​ມີ​ການ​ອາ​ການ​ຫຍັງ ກໍ​ໄດ້​ສົ່ງ​ກັບ​ໄປ​ທ້ອງ​ຖິ່ນ​ຂອງ​ເຂົາ​ເຈົ້າ ແລະ ໄດ້​ແນະ​ນຳ​ໃຫ້​ກັກ​ໂຕ​ເອງ​ຢູ່​ເຮືອນ ​ເປັນ​ເວ​ລາ 14 ວັນ, ເຊິ່ງນັບ​ຈາກ​ນີ້​ຕໍ່​ໄປ ​ພວກ​ເຮົາ​ຈະ​ປະ​ຕິ​ບັດ​ຢ່າງ​ ເຂັ້ມ​ງວດ​ກວ່າ​ເກົ່າ​ ກ່ຽວ​ກັບ​ມາດ​ຕະ​ການ​ທີ່​ລັດ​ຖະ​ບານ​ໄດ້​ວາງ​ອອກ ແລະ ຂ້າ​ພະ​ເຈົ້າ​ຂໍ​ຮຽກ​ຮ້ອງ​ຕື່ມ ​ໃຫ້​ປະ​ຕິ​ບັດ​ບັນ​ດາ​ມາດ​ຕະ​ການ ແລະ ຮຽກ​ຮ້ອງໃຫ້​ບັນ​ດາ​ຜູ້​ທີ່​ມາ ​ແຕ່​ຕ່າງ​ປະ​ເທດ​ ກັກ​ໂຕ​ເອງ​ຢູ່​ເຮືອນ​ເປັນ​ເວ​ລາ 14 ວັນ ແລະ ມອບ​ໃຫ້​ອຳ​ນາດ​ການ​ປົກ​ຄອງ, ຄະ​ນະ​ພັກ​ຂອງ​ບ້ານ ຮັບ​ຜິດ​ຊອບ​ໂດຍ​ກົງ ໂດຍ​ປຸກ​ລະ​ດົມ​ກຳ​ລັງ​ແຮງ​ ຂອງ​ອົງ​ການ​ຈັດ​ຕັ້ງ​ມະ​ຫາ​ຊົນ ​ແລະ ກອງ​ຫລອນ ເພື່ອ​ຄຸ້ມ​ຄອງ​ໃຫ້​ເປັນ​ໄປ ​ຕາມ​ລະ​ບຽບ​ທີ່​ວາງ​ອອກ​ໃຫ້​ເຂັ້ມ​ງວດ, ຂໍ​ໃຫ້​ປະ​ຕິ​ບັດ​ຫລັກ​ການ​ປ້ອງ​ກັນ​ໂຕ​ເອງ ຕາມ​ທີ່​ແພດ​ໃຫ້​ວາງ​ອອກ ເປັນ​ຕົ້ນ ​ໃສ່​ໜ້າ​ກາ​ກ​ອາ​ນາໄມ ​ປິດ​ປາກ, ດັງ, ໝັ່ນ​ລ້າງ​ມື​ດ້ວຍ​ສະ​ບູ ຫລື ນ້ຳ​ຢາ​ຂ້າ​ເຊື້ອ. ໃຫ້​ທຸກ​ພາກ​ສ່ວນ​ນັບ​ແຕ່​ທ້ອງ​ຖິ່ນຮອດ​ສູນ​ກາງ ຄິດ​ໄລ່​ເບິ່ງ​ການ​ເຄື່ອນ​ໄຫວ ​ຂອງ​ສຳ​ນັກ​ງານ​ ອົງ​ການ​ຂອງ​ຕົນ​ເອງວ່າ ສົມ​ຄວນ​ຢຸດ​ຕິ​ການ​ປະ​ຊຸມ, ການ​ຮ່ວມ​ກັນ​ຫລາຍ​ຄົນ ໂດຍ​ບໍ່​ໃຫ້​ມີ​ການ​ໃກ້​ຊິດ​ກັນ, ຖ້າ​ມີ​ຄວາມ​ສາ​ມາດ​ເຮັດ​ວຽກ​ຢູ່​ເຮືອນ ແຕ່​ສາ​ມາດ​ຕິດ​ຕໍ່​ຫາ​ກັນ​ ຜ່ານ​ສື່​ອອນ​ລາຍ​ຕ່າງໆ ກະ​ຂໍ​ໃຫ້​ພາ​ກັນ​ປະ​ຕິ​ບັດ ແລະ ບໍ່​ໃຫ້​ມີ​ການ​ຈັດ​ກອງ​ປະ​ຊຸມ​ຕ່າງ​ໆ ​ໃນ​ໄລ​ຍະ​ນີ້, ສຳ​ລັບ​ງານດອງ ງານ​ບຸນ​ປະ​ເພ​ນີ ​ກໍ​ໄດ້​ຫ້າມ​ໄປ​ແລ້ວ.

ນອກ​ຈາກ​ນີ້, ການ​ເດີນ​ທາງ​ໄປ​ມາ​ຫາ​ສູ່ ​ກັນ​ລະ​ຫວ່າງ​ບ້ານ​ຕໍ່​ບ້ານ, ເມືອງ​ຕໍ່​ເມືອງ ຫລື ຕໍ່​ສຳ​ນັກ​ງານ ແມ່ນ​ໃຫ້​ຫລຸດ​ຜ່ອນ​ລົງ​ ໂດຍ​ການ​ໃຊ້​ໂທ​ລະ​ສັບ​ຫາ​ກັນ ຖ້າ​ຫາກ​ພົບ​ອາ​ການ​ຜິດ​ປົກ​ກະ​ຕິ​ ແມ່ນ​ຮີບ​ດ່ວນ​ໃຫ້​ໂທ​ຫາ​ແພດ​ສາຍດ່ວນ 166, ພ້ອມ​​ນີ້, ຄະ​ນະ​ສະ​ເພາະ​ກິດ​ ຈະ​ໄດ້​ອອກ​ຂໍ້​ກຳ​ນົດ​ຕື່ມ​ອີກ ເພື່ອ​ໃຫ້​ສັງ​ຄົມ​ປະ​ຕິ​ບັດ​ຢ່າງ​ເຂັ້ມ​ງວດ ເພື່ອ​ປົກ​ປັກ​ຮັກ​ສາ​ຊີ​ວິດ​ຂອງ​ປະ​ຊາ​ຊົນ ແລະ ຮຽກ​ຮ້ອງ​ໃຫ້​ສັງ​ຄົມ​ທຸກ​ພາກ​ສ່ວນ​ຈົ່ງ​ຮ່ວມ​ມື​ກັນ ເພື່ອ​ຕໍ່​ສູ້​ເອົາ​ຊະ​ນະ​ກັ​ບ​ ພະ​ຍາດ​ທີ່​ລະ​ບາດ​ໂຄວິດ-19 ນີ້ໃຫ້​ໄດ້.

Medialaos MMD