ອີງຕາມການຖະແຫລງຊ່າວຂອງຄະນະສະເພາະກິດ ປ້ອງກັນ ຄວບຄຸມ ແລະ ແກ້ໄຂພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ COVID-19 ໃນຕອນບ່າຍເວລາ 14:30 ຂອງວັນທີ 26/03/2020 ນີ້ໃຫ້ຮູ້ວ່າ ລາວເຮົາພົບຜູ້ຕິດເຊື້ອອີກ 3 ກໍລະນີ. ທ່ານ ພູທອນ ເມືອງປາກ ໄດ້ແຈ້ງໃຫ້ຮູ້ວ່າມື້ວານນີ້ໄດ້ກວດວິເຄາະຫາເຊື້ອ 33 ກໍລະນີ ແລະພົບວ່າຕິດເຊື້ອ 3 ກໍລະນີ, ເຊິ່ງ ສອງກໍລະນີ ແມ່ນມາຈາກແຂວງ ຫລວງພະບາງ ແລະ ໄດ້ສຳພັດໃກ້ຊິດກັບກໍລະນີຜູ້ນຳທ່ຽວຄື: 1, ເປັນເພດຊາຍ ອາຍຸ 42 ປີ, ຢູ່ບ້ານ ປ່ອງຄຳ, ນະຄອນຫລວງພະບາງ, ແຂວງ ຫລວງພະບາງ ເປັນຄົນຂັບລົດໃຫ້ແກ່ກຸ່ມທົວ; 2, ເປັນເພດຊາຍ ອາຍຸ 52ປີ ຢູ່ບ້ານວິຊຸນ, ນະຄອນຫລວງພະບາງ ເປັນຄົນຂັບລົດໃຫ້ແກ່ກຸ່ມທົວ ; 3, ເປັນເພດຊາຍ ອາຍຸ 41 ປີ, ຢູ່ບ້ານ ຈຳປາ, ເມືອງສີໂຄດຕະບອງ, ແຂວງ ນະຄອນຫລວງວຽງຈັນ,ເປັນຜູ້ສຳພັດໄກ້ຊິດກັບກໍລະນີຕິດເຊື້ອ ຜູ້ທີ 3. ມາຮອດປະຈຸບັນນີ້ແມ່ນມີຜູ້ຕິດເຊື້ອ 6ກໍລະນີ ຈາກການກວດວິເຄາະຫາເຊື້ອທັງໝົດ 181 ກໍລະນີ.