ວັນ​ທີ 26 ມີນາ​ນີ້ ສະຖານທູດ ສປ ຈີນ​ ປະຈຳ ສປປ ລາວ​ໄດ້​ລາຍ​ງານ​ໃຫ້​ຮູ​້ວ່າ: ພັກ ແລະ ລັດຖະບານ ສປ ຈີນ ໄດ້​ໃຫ້​ຄວາມ​ເອົາໃຈໃສ່ຢ່າງສູງຕໍ່​ການ​ຮ່ວມ​ມື​ກັບ​ຝ່າຍ​ລາວໃນ​ການ​ປ້ອງ​ກັນ ແລະ ຄວບ​ຄຸມພະຍາດ​ໂຄ​ວິດ-19. ມາ​ຮອດ​ປັດຈຸບັນ, ລັດຖະບານ​ຈີນ​ໄດ້​ສະໜອງ​ຢາ​ກວດ​ເຊື້ອ​ໄວ​ຣັດ​ຈຳນວນ 2.016 ຊຸດ​ໃຫ້​ແກ່​ລາວ​ແລ້ວ, ນອກ​ນັ້ນ ຊຸດ​ປ້ອງ​ກັນ 5.000 ຊຸດ, ຜ້າ​ອັດ​ປາກ​ລຸ້ນ N95 ແລະ ຜ້າ​ອັດ​ປາກ​ການ​ແພດ​ທຳ​ມະ​ດາ​ຈຳນວນ 4 ແສນ​ອັນ ພ້ອມ​ກັບ​ຢາ​ກວດ​ເຊື້ອໄວ​ຣັດ 2 ໝື່ນ​ຊຸດ ກຳລັງ​ສົ່ງ​ມາ​ໃຫ້​ລາວ. ໃນຕໍ່ໜ້າ, ລັດຖະບານ​ຈີນ​ຍັງ​ຈະ​ໃຫ້ການ​ຊ່ວຍເຫຼືອ ໂດຍ​ອີງ​ຕາມ​ຄວາມ​ຕ້ອງການ​ຕົວ​ຈິງ​ຂອງ​ລາວ​ໃນ​ການ​ປ້ອງ​ກັນ ​ແລະ​ ຄວບ​ຄຸມພະ​ຍາດ​  ໂຄ​ວິດ-19 ຕື່ມ​ອີກ.

ໃນ​ຂະນະ​ດຽວ​ກັນ, ອົງການ​ປົກຄອງ​ທ້ອງ​ຖິ່ນ​ຕ່າງໆ​ຂອງ​ຈີນ​ເຊັ່ນ:  ແຂວງ​ຢຸນ​ນານ, ຫູ​ໜານ, ນະຄອນ​ສຸ​ງ​ສິງ,  ແຂວງ​ຊານ​ຕົງ  ແລະ  ນະຄອນ​ຊຽງ​ໄຮ້ ເປັນຕົ້ນໄດ້​ຮ່ວມ​ກັບ​ສະມາຄົມ ພັດທະນາ​ເສດຖະກິດ​ອາ​ຊີ​-​ຈີນ, ສະຫະພັນ​ວິ​ສາ​ຫະ​ກິດ​ຈີນ ແລະ ຕ່າງປະເທດ, ທະນາຄານ ICBC ສາຂາ​ນະຄອນຫຼວງ​ວຽງ​ຈັນກໍຄື​ອົງການ​ຈັດ​ຕັ້ງ​ຕ່າງໆ ພ້ອມ​ກັບ​ຊາວ​ຈີນ​ທີ່​ດຳລົງ​ຊີວິດ​ຢູ່​ລາວ  ກໍ​ໄດ້ຕັ້ງໜ້າໃຫ້ການ​ຊ່ວຍເຫຼືອແກ່​ລາວ  ຊຶ່ງ​ອຸປະກອນເຫຼົ່າ​ນີ້ມີ​ສ່ວນ​ໜຶ່ງ​ໄດ້ຖືກສົ່ງ​ມາ​ຮອດ​ລາວ​ແລ້ວ,  ສ່ວນ​ທີ່​ເຫຼືອພວມ ຫ້າງ​ຫາ​ກະກຽມ​ຢູ່.

ຜູ້ຕາງໜ້າ​ສະຖານ​ທູດ ​ສປ ​ຈີນ​ ປະຈຳ ສປປ ລາວ ກ່າວ​ວ່າ: ໃນ​ຖານະ​ຈີນ  ແລະ  ລາວ​ເປັນ​ຄູ່​ຮ່ວມຊາຕາກຳ, ພັກ-ລັດ ແລະ ປະຊາຊົນ​ຈີນ​ມີ​ຄວາມ​ເຫັນອົກເຫັນໃຈ​ຕໍ່​ລາວ​ທີ່​ກຳລັງ​ໄດ້​ຮັບ​ຜົນ​ກະທົບຈາກ​ພະຍາດ ໂຄ​ວິດ-19 ແລະ ຍິນດີ​ຮ່ວມ​ແຮງ​ຮ່ວມ​ໃຈກັບ​ຝ່າຍ​ລາວຜ່ານ​ຜ່າ​ຄວາມ​ຫຍຸ້ງຍາກດັ່ງກ່າວ​ນີ້​ໃຫ້​ໄດ້.

Medialaos MMD