ອາທິດຜ່ານມານີ້ຫາກເພື່ອນຜູ້ອ່ານຕິດຕາມຂ່າວຈະເຫັນວ່າຂ່າວປອມເລີ່ມປາກົດຕົວດັ່ງນີ້ ແລະ ເດັ່ນທີ່ສຸດແມ່ນກໍລະນີຂ່າວໂປໂລຂຶ້ນໃນໜ້າເຟສບຸກວ່າມີການລະບາດຂອງພະຍາດ Covid-19 ຢູ່ຕະຫຼາດຊັ່ງຈຽງ ນະຄອນຫຼວງວຽງຈັນ.

ຕໍ່ເຫດການດັ່ງກ່າວນີ້ໄດ້ສ້າງຄວາມແຕກຕື່ນທົ່ວສັງຄົມ… ພວກມືບອນທັງຫຼາຍກໍ່ Share ກັນຢ່າງຊະຊາຍ… ແຕ່ສຸດທ້າຍພາກສ່ວນກ່ຽວຂ້ອງກໍ່ອອກມາຢືນຢັນ ນັບທັງຕົວເຈົ້າຂອງຕະຫຼາດ ກະຊວງສາທາລະນະສຸກ ກົມສື່ມວນຊົນ ແລະ ເຈົ້າໜ້າທີ່ ປກສ… ມີຂ່າວວ່າຜູ້ເຜີຍແຜ່ຂ່າວປອມນັ້ນຖືກກັກຕົວດຳເນີນຄະດີແລ້ວ.

ຄໍລຳພວກເຮົາເຄີຍຂຽນມາຫຼາຍບົດເພື່ອເຕືອນກັນໃຫ້ລະມັດລະວັງຂ່າວປອມ ກໍຄືຜົນຮ້າຍຈະຕາມມາທັງຕໍ່ຜູ້ເສບຂ່າວ ແລະ ຜູ້ປ່ອຍຂ່າວ.

ເວົ້າເລື່ອງພະຍາດນີ້ເຈົ້າໜ້າທີ່ກ່ຽວຂ້ອງໂດຍສະເພາະແມ່ນກົມຄວບຄຸມພະຍາດຕິດຕໍ່ກະຊວງສາທາລະນະສຸກເພິ່ນກໍອອກມາຢືນຢັນວ່າ: ປະເທດເຮົາຍັງບໍ່ມີການລະບາດຂອງພະຍາດນີ້ ແລະ ເພິ່ນຖະແຫຼງກໍ່ມີເຈົ້າໜ້າທີ່ອົງການອະນາໄມໂລກ ຄຽງຂ້າງຢືນຢັນແຕ່ມັນກໍແປກວ່າ: ເປັນຫຍັງຄົນຈຶ່ງບໍ່ເຊື່ອແລ້ວພາກັນຄິດໄປຕ່າງໆ ນາໆ ທາງບໍ່ສ້າງສັນຈົນບາງລາຍກໍຂຸດໄງ້ເຖິງອຸປະກອນທາງການແພດນໍາອີກ.

ສິ່ງທີ່ໜ້າເປັນຫວ່ງນັ້ນແມ່ນການປ່ອຍຂ່າວປອມ ເພື່ອຈຳແນກພີ່ນ້ອງຊາວຈີນ ທີ່ອາໃສຢູ່ ສປປ ລາວ… ລວມໄປເຖິງອ້າຍນ້ອງກຳມະກອນ ທີ່ຢູ່ຕາມໂຄງການກໍ່ສ້າງຕ່າງໆ ໂດຍຂາດເຫດຜົນເພາະພວກເພິ່ນອາໃສຢູ່ລາວມາດົນແລ້ວ… ແລະ ເຂົ້າ-ອອກ ກໍແມ່ນກ່ອນການລະບາດຂອງພະຍາດມາຫຼາຍເດືອນຫຼາຍປີ ບໍ່ທໍ່ນັ້ນເວລາພະຍາດລະບາດຢູ່ເມືອງຈີນພຸ້ນ… ພວກເພິ່ນກໍໄດ້ຮັບການຕິດຕາມດູແລທັງສຸຂະພາບມາຢ່າງເປັນປະຈຳ ສະນັ້ນການເສບຂ່າວຕ້ອງມີສະຕິ ແລະ ເບິ່ງເຫດເບິ່ງຜົນຈຶ່ງຄ່ອຍເຊື່ອ.

ເຫດການປ່ອຍຂ່າວປອມ ແລະ Share ໃນກໍລະນີດັ່ງກ່າວນີ້ເຈົ້າໜ້າທີ່ເພິ່ນປະຕິບັດຕາມກົດໝາຍແລ້ວ ສະນັ້ນຜູ້ກະທຳຜິດຈະຕ້ອງໄດ້ຖືກລົງໂທດຕາມກົດໝາຍຕາມກໍລະນີໜັກ ຫຼື ເບົາ.

ຄໍລຳເຮົາເຄີຍອ້າງອີງລະບຽບການ ແລະ ກົດໝາຍຕ່າງໆ ມາຫຼາຍຄັ້ງແລ້ວ ເມື່ອການນໍາໃຊ້ສື່ສັງຄົມອອນລາຍວ່າມັນມີຜົນດີ ແລະ ຜົນຮ້າຍຫຍັງແດ່? ເຕືອນສະຕິກັນມາໂດຍຕະຫຼອດ ໂດຍສະເພາະແມ່ນກົດໝາຍວ່າດ້ວຍສື່ມວນຊົນ ສະບັບປັບປຸງ ໃນມາດຕາ 66 ໄດ້ມີຂໍ້ຫ້າມໄວ້ວ່າຫ້າມການປ່ອຍຂ່າວທີ່ບໍ່ມີມູນຄວາມຈິງ ເຊິ່ງໄດ້ສ້າງຜົນກະທົບຕໍ່ປະເທດຊາດລວມໝູ່ ແລະ ບຸກຄົນ ບໍ່ຖືກຕ້ອງຕາມກົດໝາຍວ່າດ້ວຍການສະກັດກັ້ນ ແລະ ການກໍ່ອາຊະຍາກຳທາງຄອມພິວເຕີ ນອກຈາກນີ້ຍັງມີດຳລັດນາຍົກລັດຖະມົນຕີ ເລກທີ 327 ຄືຂໍ້ຫ້າມໃນມາດຕາທີ 10 ເຊິ່ງຜ່ານມາກໍມີການລົງໂທດຜູ້ກະທຳຜິດທີ່ປ່ອຍຂ່າວປອມບໍ່ມີມູນຄວາມຈິງມາແລ້ວຫຼາຍຄົນ.

ການຈັດຕັ້ງເລີ່ມຫັນກຽວແລ້ວເນີ! ຊິຫາວ່າບໍ່ເຕືອນ.