ເຄີຍ​ຂຽນ​ເລື່ອງ​ສື່​ສັງ­ຄົມ​ອອນ​ລາຍ​ມາ​ຫຼາຍ​ແລ້ວ? ແຕ່​ເພື່ອນ​ຜູ້​ອ່ານ​ກໍ່​ຮຽກ­ຮ້ອງ​ໃຫ້​ຂຽນ​ຕື່ມເພື່ອ​ເຕືອນ​ສະ­ຕິ​ຜູ້​ໃຊ້​ວ່າ​ຊັ້ນ !.

ຕ້ອງ​ຍອມ­ຮັບ​ວ່າ: ໃນ​ຍຸກ​ແຫ່ງ​ຂໍ້​ມູນ​ຂ່າວ­ສານ (Information is Power) ມັນ​ຄື​ອຳ­ນາດ​ທີ່​ເຂົ້າ​ມາ​ມີ​ບົດ­ບາດ​ໃນ​ການ​ພັດ­ທະ­ນາ​ທາງ​ການ­ເມືອງ ເສດ­ຖະ­ກິດ ແລະ ວັດ­ທະ­ນະ­ທຳ-ສັງ­ຄົມ ດ້ວຍ​ວ່າ: ໂລກ​ສູ່​ມື້­ນີ້​ມັນ​ສະ­ໜອງ​ຂໍ້​ມູນ​ວ່ອງ­ໄວ​ຫຼາຍ ພຽງ​ແຕ່​ໃຊ້​ນີ້ວ­ມື​ກົດ​ໂທລະ­ສັບ​ມື​ຖື​ທໍ່​ນັ້ນ ກໍ​ຈະ​ເຫັນ​ຂໍ້​ມູນ​ໂປ­ໂລ​ໜ້າ​ອອກ​ມາ​ເຕັມ​ໄປ​ດ້ວຍ​ຄວາມ​ສັບ­ສົນ​ວຸ້ນ­ວາຍບໍ່​ວ່າ: ຄວາມ​ຂັດ​ແຍ່ງ​ຂອງ​ຜູ້​ຄົນ​ໃນ​ລະ­ດັບ​ຊຸມ​ຊົນ ປະ­ເທດ ແລະ ໂລກ… ຄວາມ​ບໍ່​ເທົ່າ​ທຽມ​ກັນ​ໃນ​ການ​ຮັບ​ຮູ້​ຂໍ້​ມູນ​ຂ່າວ­ສານ ສັງ­ຄົມ​ໃນ​ໂລກ​ແຕກ​ແຍກ ມີ​ເລື່ອງ​ເກີດ​ຂຶ້ນ​ສະ­ເພາະ​ກຸ່ມ ຈຶ່ງ​ບໍ່​ມີ​ໃຜ​ສາ­ມາດ​ຮູ້ ແລະ ເຂົ້າ­ໃຈ​ໝົດ​ທຸກ​ເລື່ອງ ຄົນ​ທີ່​ເບິ່ງ​ຄື​ວ່າ​ສະ­ຫຼາດ​ປາດ​ເປືອງ ມີ​ຄຸນ​ວຸດ​ທິ ແຕ່​ຂາດ​ຄວາມ​ເຂົ້າ­ໃຈ​ໃນ​ລະ­ບົບ​ການ­ເມືອງ-ເສດ­ຖະ­ກິດ-ສັງ­ຄົມ ເກັ່ງ​ແຕ່​ເລື່ອງ​ຂອງ​ຕົນ​ເອງ ສ່ວນ​ບັນ­ຫາ​ອື່ນ​ບໍ່​ຮູ້ ບໍ່​ເຂົ້າ­ໃຈ ມີ​ຄວາມ​ອະ­ຄະ­ຕິ​ສູງ ເລືອກ​ຂ້າງ​ຄຽດ​ແຄ້ນ​ຊິງ​ຊັງ​ຝ່າຍ​ອື່ນ ລະ­ບົ­ບອຸປະ­ຖຳ​ບໍ­ລິ­ໂພກ​ນິ­ຍົມ ລະ­ບົບ​ລາ­ຊະ­ການ ລະ­ບົບ​ການ­ເມືອງ ການ​ສຶກ​ສາ​ຕົກ​ຢູ່​ໃນ​ເຄື່ອງ­ມື​ຂອງ​ຜູ້​ມີ​ອຳ­ນາດ ຂໍ້​ມູນ​ທີ່​ເກີດ​ຈາກ​ບັນ­ຫາ​ເຫຼົ່າ​ນີ້ ຫຼື ວ່າ​ກຸ່ມ​ຄົນ​ເຫຼົ່າ​ນີ້​ໂພ​ສ​ຂຶ້ນ​ໃນ​ໜ້າ​ເຟ​ສ​ບຸກ ຖືກ​ໃຊ້​ເປັນ​ເຄື່ອງ­ມື​ສ້າງ​ຄວາມ​ເຊື່ອ… ສ້າງ​ໃຫ້​ມີ​ອະ­ຄະ­ຕິ ແລະ ທຳ­ລາຍ​ລ້າງ​ກັນ… ນັ້ນ​ແມ່ນ​ສິ່ງ​ທີ່​ຊົ່ວ​ຮ້າຍ ມັນ​ມາ​ນຳ​ສື່​ສັງ­ຄົມ​ອອນ​ລາຍ.    

ອີງ​ຕາມ​ແຫຼ່ງ​ຂ່າວ​ຈາກ​ຕ່າງ­ປະ­ເທດ​ໃຫ້​ຮູ້​ວ່າ ນັກ​ຈິດ­ຕະ­ວິ­ທະ­ຍາ ຫຼື ຜູ້​ຮູ້​ທັງ­ຫຼາຍ​ບອກ​ວ່າ ບັນ­ຫາ​ຄວາມ​ວຸ້ນ­ວາຍ ຫຼື ການ​ຂ້າ​ຟັນ​ລັນ​ແທງ​ກັນ​ໃນ​ໂລກ​ສູ່​ມື້­ນີ້ ແມ່ນ​ໄດ້​ຮັບ​ອິດ​ທິ​ພົນ​ຈາກ​ຂໍ້​ມູນ​ທີ່​ມາ​ຈາກ​ສື່​ອອນ​ລາຍ ພວກ​ເພິ່ນ​ຍົກ​ຕົວ­ຢ່າງ ກໍ­ລະ­ນີ​ຫຼ້າ​ສຸດ​ຢູ່​ປະ­ເທດ​ໃກ້​ຄຽງ​ເຮົາ (ໄທ) ທີ່​ຍິງ​ກັນ​ຕາຍ​ຢູ່​ໂຄ​ຣາດ ນັ້ນ​ແມ່ນ​ໄດ້​ຮັບ​ອິດ​ທິ​ພົນ​ຈາກ​ສື່​ອອນ​ລາຍ​ວ່າ​ຊັ້ນ.

ເມື່ອ​ເປັນ​ເຊັ່ນ​ນັ້ນ ມັນ​ຮຽກ­ຮ້ອງ​ໃຫ້​ທົ່ວ​ສັງ­ຄົມ​ລາວ​ເຮົາ​ມີ​ສະ­ຕິ​ເວ­ລາ​ເສບ​ຂໍ້​ມູນ​ຈາກ​ເຟ​ສ​ບຸກ… ຕ້ອງ​ກວດ­ກາ​ຄືນ​ທຸກ​ເທື່ອ​ເມື່ອ​ເຫັນ​ຂໍ້​ມູນ​ໂປ­ໂລ​ຂຶ້ນ​ເທິງ​ໜ້າ​ເຟ​ສ​ບຸກ… ຢ່າ​ຟ້າວ​ສະຫຼຸບ​ແບບ​ງ່າຍໆ ແລ້ວ​ກົດ Line ກົດ Share ຕໍ່ ເປັນ­ຕົ້ນ ແມ່ນ​ຂ່າວ​ທີ່​ຫຼໍ່​ແຫຼມ​ຕໍ່​ສັງ­ຄົມ ຢູ່​ປະ­ເທດ​ເຮົາ ​ກໍ່​ມີ​ນິ­ຕິ​ກຳ​ຄຸ້ມ​ຄອງ​ສື່​ສັງ­ຄົມ​ອອນ​ລາຍ ເປັນ­ຕົ້ນແມ່ນ​ດຳ­ລັດ​ວ່າ​ດ້ວຍ​ການ​ຄຸ້ມ​ຄອງ​ຂໍ້​ມູນ​ຂ່າວ­ສານ​ຜ່ານ​ອິນ​ເຕີ​ເນັດ (ສະ­ບັບ​ເລກ​ທີ 327/ລບ ລົງ​ວັນ​ທີ 16 ກັນ­ຍາ 2014 ເຊິ່ງ​ເຄີຍ​ຂຽນ​ມາ​ແລ້ວ ນອກ­ຈາກ​ດຳ­ລັດ​ນີ້​ແລ້ວ ຍັງ​ມີ​ກົດ­ໝາຍ​ວ່າ​ດ້ວຍ​ການ​ຕ້ານ ແລະ ສະ­ກັດ​ກັ້ນ​ອາ​ຊະ​ຍາ​ກຳ​ທາງ​ລະ­ບົບ​ຄອມ​ພິວ​ເຕີ ສະ­ບັບ​ເລກ​ທີ 61/ສພຊ ລົງ​ວັນ​ທີ 15 ກໍລະກົດ 2016 ໂດຍ​ສະ­ເພາະ ມາດ­ຕາ 62 ມາດ​ຕະ­ການ​ທາງ​ອາ­ຍາ​ໄດ້​ກຳ­ນົດ​ໄວ້​ດັ່ງ­ນີ້:

 ມາດ­ຕາ 62: ມາດ​ຕະ­ການ​ທາງ​ອາ­ຍາ.

  ບຸກ­ຄົນ​ທີ່​ໄດ້​ກະ­ທຳ​ຜິດ​ໃນ​ສະ­ຖານ​ຕໍ່​ລົງ​ໄປ​ນີ້ ຈະ​ຖືກ​ລົງ­ໂທດ​ດັ່ງ­ນີ້:

  1. ການ​ເປີດ­ເຜີຍ​ມາດ​ຕະ­ການ​ປ້ອງ​ກັນ​ການ​ເຂົ້າ​ເຖິງ​ລະ­ບົບ​ຄອມ​ພິວ​ເຕີ ຈະ​ຖືກ​ລົງ­ໂທດ​ຕັດ​ອິດ­ສະ­ຫຼະ­ພາບ​ແຕ່​ໜຶ່ງ​ເດືອນ​ຫາ​ໜຶ່ງ​ປີ ແລະ ຈະ​ຖືກ​ປັບ​ໃໝ​ແຕ່ 1.000.000 ກີບ ຫາ 4.000.000 ກີບ.
  2. ການ​ເຂົ້າ​ເຖິງ​ລະ­ບົບ​ຄອມ​ພິວ​ເຕີ ໂດຍ​ບໍ່​ໄດ້​ຮັບ​ອະ­ນຸ­ຍາດຈະ​ຖືກ​ລົງ­ໂທດ​ຕັດ​ອິດ­ສະ­ຫຼະພາບ​ແຕ່​ສາມ​ເດືອນ ຫາ ໜຶ່ງ​ປີ ແລະ ຈະ​ຖືກ​ປັບ​ໃໝ ແຕ່ 2.000.000 ກີບ ຫາ 5.000.000 ກີບ.
  3. ການ​ຕັດ​ຕໍ່​ເນື້ອ​ໃນຮູບພາບ​ເຄື່ອນ​ໄຫວ ສຽງ ແລະ ວີ​ດີ​ໂອ ໂດຍ​ບໍ່​ໄດ້​ຮັບ​ອະ­ນຸ­ຍາດຈະ​ຖືກ​ລົງ­ໂທດ​ຕັດ​ອິດ­ສະ­ຫຼະ­ພາບແຕ່​ສາມ​ເດືອນ ຫາ ສອງ​ປີ ແລະ ຈະ​ຖືກ​ປັບ​ໃໝແຕ່ 3.000.000 ກີບ ຫາ 10.000.000 ກີບ.
  4. ການ​ລັກ​ເອົາ​ຂໍ້​ມູນ​ໃນ​ລະ­ບົບ​ຄອມ​ພິວ​ເຕີ ໂດຍ​ບໍ່​ໄດ້​ຮັບ​ອະ­ນຸ­ຍາດຈະ​ຖືກ​ລົງ­ໂທດ​ຕັດ​ອິດ­ສະ­ຫຼະ­ພາບ​ແຕ່​ສາມ​ເດືອນ ຫາ ສາມ​ປີ ແລະ ຈະ​ຖືກ​ປັບ​ໃໝແຕ່ 4.000.000 ກີບ ຫາ 20.000.000 ກີບ.
  5. ການ​ສ້າງ​ຄວາມ​ເສຍ​ຫາຍ​ຜ່ານ​ສື່​ສັງ­ຄົມ​ອອນ​ລາຍ ຈະ​ຖືກ​ລົງ­ໂທດ​ຕັດ​ອິດ­ສະ­ຫຼະ­ພາບ ແຕ່​ສາມ​ເດືອນ ຫາ ສາມ​ປີ ແລະ ຈະ​ຖືກ​ປັບ​ໃໝແຕ່ 4.000.000 ກີບ ຫາ 20.000.000 ກີບ.
  6. ການ​ເຜີຍ­ແຜ່​ສິ່ງ​ລາ­ມົກ​ຜ່ານ​ລະ­ບົບ​ຄອມ​ພິວ​ເຕີ ຈະ​ຖືກ​ລົງ­ໂທດ​ຕັດ​ອິດ­ສະ­ຫຼະ­ພາບ ແຕ່​ໜຶ່ງ​ປີ ຫາ ຫ້າ​ປີ ແລະ ຈະ​ຖືກ​ປັບ​ໃໝແຕ່ 5.000.000 ກີບ ຫາ 30.000.000 ກີບ.
  7. ການ​ລົບ​ກວນ​ລະ­ບົບ​ຄອມ​ພິວ​ເຕີ ຈະ​ຖືກ​ລົງ­ໂທດ​ຕັດ​ອິດ­ສະ­ຫຼະ­ພາບ​ແຕ່​ໜຶ່ງ​ປີ ຫາ ຫ້າ​ປີ ແລະ ຈະ​ຖືກ​ປັບໃໝແຕ່ 5.000.000 ກີບ ຫາ 30.000.000 ກີບ.
  8. ການ​ປອມ​ແປງ​ຂໍ້​ມູນ​ຄອມ​ພິວ​ເຕີ ຈະ​ຖືກ​ລົງ­ໂທດ​ຕັດ​ອິດ­ສະ­ຫຼະ­ພາບ ແຕ່​ໜຶ່ງ​ປີ ຫາ ຫ້າ​ປີ ແລະ ຈະ​ຖືກ​ປັບ​ໃໝແຕ່ 5.000.000 ກີບ ຫາ 30.000.000 ກີບ.
  9. ການ​ທຳ­ລາຍ​ຂໍ້​ມູນ​ຄອມ​ພິວ​ເຕີ ຈະ​ຖືກ​ລົງ­ໂທດ​ຕັດ​ອິດ­ສະ­ຫຼະ­ພາບ ແຕ່​ສາມ​ປີ ຫາ ຫ້າ​ປີ ແລະ ຈະ​ຖືກ​ປັບໃໝແຕ່ 10.000.000 ກີບ ຫາ 50.000.000 ກີບ.
  10. ການ​ດຳ­ເນີນ​ກິດ­ຈະ­ການ​ກ່ຽວ​ກັບ​ເຄື່ອງ­ມື​ອາ​ຊະ​ຍາ​ກຳ​ທາງ​ລະ­ບົບ​ຄອມ​ພິວ​ເຕີ ຈະ​ຖືກ​ຕັດ​ອິດ­ສະ­ຫຼະ­ພາບ​ແຕ່​ສາມ​ປີ ຫາ ຫ້າ​ປີ ແລະ ຈະ​ຖືກ​ປັບ​ໃໝ ແຕ່ 10.000.000 ກີບ ຫາ 50.000.000 ກີບ.

ທັງ​ໝົດ​ບັນ­ຫາ​ທີ່​ຍົກ​ຂຶ້ນ​ມາ ກໍ​່ເພື່ອ​ຢາກ​ເຕືອນ​ຜູ້​ໃຊ້​ສື່​ສັງ­ຄົມ​ອອນ​ລາຍ​ທັງ­ຫຼາຍ ເຖິງ​ຜົນ​ຮ້າຍ​ທີ່​ຈະ​ຕາມ​ມາ ຫາກ​ເຮົາ​ໄປ​ຂາດ​ສະ­ຕິ​ໂພ​ສ ບັນ­ຫາ​ໃດ​ໜຶ່ງ​ຂຶ້ນ​ເທິງ​ໜ້າ​ເຟ​ສ​ບຸກ ຫຼື ວ່າ ໄລ​ສົດ ກົດ Line ກົດ Share ກົດ Comment ຕໍ່​ບັນ­ຫາ​ໃດ​ໜຶ່ງ.

ຂໍ​ສະ­ເໜີ​ເປັນ​ການ​ແລກ­ປ່ຽນ.