ກຳແໜ້ນຄຳສັ່ງເລກທີ 06/ນຍ (29.03.2020)

0
243

ຖືເປັນຄຳສັ່ງລ້າສຸດວ່າດ້ວຍການເພີ່ມທະວີມາດຕະການສະກັດກັ້ນ, ກັນລະບາດ; ຄວບຄຸມ ແລະ ກຽມພ້ອມຮອບດ້ານເພື່ອຕ້ານພະຍາດໂຄວິດ-19 (Covid-19) ທີ່ສົ່ງເຖີງ: ລັດຖະມົນຕີ, ຫົວໜ້າອົງການ; ເຈົ້າຄອງນະຄອນຫຼວງ ແລະ ເຈົ້າແຂວງໃນຂອບເຂດທົ່ວປະເທດ; ພະນັກງານ; ລັດຖະກອນ; ທະຫານ; ຕຳຫຼວດ; ກຳມະກອນ; ນັກຮຽນ; ນັກສຶກສາ; ຜູ້ປະກອບການ; ປະຊາຊົນລາວ; ຊາວຕ່າງດ້າວຜູ້ບໍ່ມີສັນຊາດ ແລະ ຊາວຕ່າງປະເທດ ທີ່ດຳລົງຊີວິດຢູ່ ສປປລາວ.

ເນື້ອໃນຄຳສັ່ງມີທັງໝົດ 18 ຂໍ້ ລ້ວນແຕ່ສຳຄັນທັງນັ້ນ ແຕ່ໝາກຫົວໃຈສໍາຄັນແມ່ນການຈັດຕັ້ງປະຕິບັດເຊີ່ງເລີ່ມແຕ່ຂໍ້ 11 ຈົນເຖີງຂໍ້ສຸດທ້າຍຄືຂໍ້ທີ 18 ສະນັ້ນທຸກພາກສ່ວນໃນທົ່ວສັງຄົມຕ້ອງກໍາແໜ້ນຄຳສັ່ງດັ່ງນີ້:

  1. ໃຫ້ຄະນະສະເພາະກິດເພີ່ມທະວີການປະຕິບັດບົດບາດ, ສິດ ແລະ ໜ້າທີ່ຂອງຕົນໃຫ້ມີປະສິດທິ ພາບ ແລະ ປະສິດທິຜົນສູງ. ເປັນໃຈກາງໃນການປະສານກັບທຸກພາກສ່ວນທີ່ກ່ຽວຂ້ອງ ຊີ້ນຳຕິດຕາມກວດກາ ແລະ ປະເມີນຜົນການຈັດຕັ້ງປະຕິບັດວຽກງານສະກັດກັ້ນ, ກັນ ແລະ ຄວບຄຸມການລະບາດ ພ້ອມທັງການປີ່ນປົວຜູ້ຕິດເຊື້ອ ແລະ ກຽມພ້ອມໃນດ້ານຕ່າງໆ ໃຫ້ໄວ, ພຽງພໍ ແລະ ມີປະສິດທິຜົນສູງ. ວຽກທີ່ຈະຕ້ອງສຸມໃສ່ປະຕິບັດໃຫ້ສຳເລັດໃນໄລຍະຈັດຕັ້ງປະຕິບັດຄຳສັ່ງສະບັບນີ້ ມີ: 1) ເພີ່ມຈຳນວນ ແລະ ຝຶກຊ້ອມບຸກຄະລາກອນທາງການແພດ, ອາສາສະໝັກ, ທະຫານ, ຕຳຫຼວດ ແລະ ເຈົ້າໜ້າທີ່ທີ່ກ່ຽວຂ້ອງ; 2) ສ້າງແຜນ, ຂັ້ນຕອນ ແລະ ລະບົບໃນການດໍາເນີນການກວດຫາຜູ້ສົງໃສຕິດເຊື້ອ ເພື່ອກັກກັນ, ແຍກປ່ຽວ ແລະ ປີ່ນປົວໃນກໍລະນີພົບຜູ້ຕິດເຊື້ອ; 3) ຈັດຫາວັດຖຸອຸປະກອນ,​ ເຄື່ອງມືທາງການແພດລວມທັງເຄື່ອງຊ່ວຍຫາຍໃຈ, ຢາປົວພະຍາດ ແລະ ເຄື່ອງປ້ອງກັນການຕິດເຊື້ອ ເພື່ອກັນລະບາດ ແລະ ກວດຫາຜູ້ຕິດເຊື້ອ; 4) ດໍາເນີນການປັບປຸງສະຖານທີ່ ທີ່ໄດ້ກຳນົດໃຫ້ມີຄວາມພ້ອມໃນການກັກກັນ, ແຍກປ່ຽວ ແລະ ປີ່ນປົວ; 5) ສ້າງແຜນງົບປະມານເພື່ອຈັດຕັ້ງປະຕິບັດບັນດາວຽກງານທີ່ໄດ້ກຳນົດໃຫ້ມີປະສິດທິພາບ ແລະ ປະສິດທິຜົນ; 6) ປະສານສົມທົບກັບພາກສ່ວນທີ່ກ່ຽວຂ້ອງທັງພາຍໃນ ແລະ ຕ່າງປະເທດ ເພື່ອລະດົມການຊ່ວຍ ເຫຼືອໃນດ້ານຕ່າງໆທີ່ຈຳເປັນເປັນຕົ້ນແມ່ນຊ່ຽວຊານ, ແພດໝໍ, ເຄື່ອງມືທາງການແພດ, ອຸປະກອນປ້ອງກັນການຕິດເຊື້ອ, ຊຸດກວດຫາເຊື້ອພະຍາດ, ຢາປົວພະຍາດ, ທຶນຮອນ ແລະ ດ້ານອື່ນໆ ທີ່ຈຳເປັນ.

ພ້ອມກັນນີ້, ໃຫ້ອອກມາດຕະການແນະນຳຢ່າງລະອຽດ ໃນຮູບແບບທີ່ເຂົ້າໃຈງ່າຍເພື່ອເຜີຍແຜ່ຜ່ານສື່ທາງການເປັນຕົ້ນແມ່ນຂ່າວສານປະເທດລາວ (ຂປລ), ໂທລະພາບແຫ່ງຊາດ, ວິທະຍຸກະຈາຍ ສຽງແຫ່ງຊາດ, ວຽງຈັນທາມ ແລະ ເວັບໄຊ www.COVID19.gov.la ເພື່ອໃຫ້ຂະແໜງການ ແລະ ອົງການປົກຄອງທ້ອງຖີ່ນນຳໄປເຜີຍແຜ່ໃຫ້ທົ່ວເຖີງ, ພ້ອມທັງແນະນຳ ແລະ ປຸກລະດົມໃຫ້ທົ່ວສັງຄົມ ຕິດຕາມຂໍ້ມູນຂ່າວສານຜ່ານສື່ທາງການ ແລະ ມີສະຕິໃນການບໍລິໂພກຂໍ້ມູນຂ່າວສານ. ໃຫ້ຄະນະສະ ເພາະກິດຕິດຕາມ, ສະຫຼຸບຕີລາຄາ ແລະ ລາຍງານສະພາບການ ແລະ ການຈັດຕັ້ງປະຕິບັດມາດຕະການຕ່າງໆ ທີ່ລັດຖະບານໄດ້ວາງອອກໃນໄລຍະຜ່ານມາ ແລະ ຄຳສັ່ງສະບັບນີ້ໂດຍກົງ ແລະ ເປັນປົກກະຕິ ຕໍ່ທ່ານ ນາຍົກລັດຖະມົນຕີ ເພື່ອຊີ້ນຳບັນຊາໃຫ້ທັນກັບສະພາບການ.

  1. ໃຫ້ອົງການປົກຄອງນະຄອນຫຼວງວຽງຈັນ ແລະ ແຂວງ ໃນທົ່ວປະເທດ ຊີ້ນໍາບັນຊາພະແນກການແນວລາວສ້າງຊາດ, ອົງການຈັດຕັ້ງມະຫາຊົນ, ອົງການປົກຄອງເມືອງ ແລະ ບ້ານ ທີ່ຂື້ນກັບຄວາມຮັບຜິດຊອບຂອງຕົນ ຈັດຕັ້ງປະຕິບັດບັນດາມາດຕະການທີ່ກໍານົດໃນຄຳສັ່ງສະບັບນີ້, ພ້ອມທັງໃຫ້ການຈັດຕັ້ງໜ່ວຍງານ ຫຼື ເຈົ້າໜ້າທີ່ເຝົ້າລະວັງ ແລະ ຕິດຕາມກວດກາ ການກັກກັນຕົນເອງ ຂອງແຮງງານທີ່ມາຈາກຕ່າງປະເທດ, ລວມທັງຜູ້ທີ່ສຳພັດ ແລະ ໃກ້ຊິດກັບຜູ້ທີ່ຕິດເຊື້ອ, ກວດກາພາຍໃນບໍລິເວນບ້ານ ບໍ່ໃຫ້ມີການຊຸມນຸມ, ການຈັດງານສັງສັນ, ການມົ້ວສຸມ ທີ່ພາໃຫ້ມີຄວາມສ່ຽງຕໍ່ການຕິດເຊື້ອ ແລະ ເພື່ອຮັບປະກັນຄວາມສະຫົງບປອດໄພ; ພ້ອມທັງປະສານສົມທົບກັບພາກ ສ່ວນທີ່ກ່ຽວຂ້ອງເຜີຍແຜ່ຂໍ້ມູນ ກ່ຽວກັບການປ້ອງກັນຕົນເອງຈາກພະຍາດດັ່ງກ່າວ ແລະ ແຈ້ງເບີ ໂທລະສັບຕິດຕໍ່ (ສາຍດ່ວນ) ໃນກໍລະນີຕ້ອງການຄວາມຊ່ວຍເຫຼືອ.
  2. ໃຫ້ກະຊວງແຜນການ ແລະ ການລົງທຶນ ສົມທົບກັບກະຊວງການເງິນ, ກະຊວງອຸດສາຫະກຳ ແລະ ການຄ້າ, ທະນາຄານແຫ່ງ ສປປລາວ, ສະພາການຄ້າ ແລະ ອຸດສາຫະກຳແຫ່ງຊາດລາວ, ຜູ້ປະກອບການ ແລະ ພາກສ່ວນກ່ຽວຂ້ອງປະເມີນຜົນກະທົບຕໍ່ພາກທຸລະກິດ ແລ້ວຄົ້ນຄວ້ານະໂຍ ບາຍດ້ານພາສີ-ອາກອນ, ສິນເຊື່ອທະນາຄານ ແລະ ນະໂຍບາຍອື່ນໆ ທີ່ຈຳເປັນ. ພ້ອມກັນນັ້ນໃຫ້ກະຊວງແຮງງານ ແລະ ສະຫວັດດີການສັງຄົມ ສົມທົບກັບພາກສ່ວນທີ່ກ່ຽວຂ້ອງຄົ້ນຄວ້ານະ ໂຍບາຍດ້ານແຮງງານ ແລະ ສະຫວັດດີການສັງຄົມ ຕໍ່ຜູ້ໄດ້ຮັບຜົນກະທົບຕາມບົດບາດ, ໜ້າທີ່ໂດຍສອດຄ່ອງກັບກົດໝາຍ ແລະ ລະບຽບການ ແລ້ວສະເໜີລັດຖະບານພິຈາລະນາດ່ວນ.
  3. ໃຫ້ກຳລັງປ້ອງກັນຊາດ, ປ້ອງກັນຄວາມສະຫງົບ, ຄະນະສະເພາະກິດ, ຂະແໜງການ, ອົງການປົກຄອງທ້ອງຖິ່ນ ແລະ ທຸກພາກສ່ວນໃນສັງຄົມ ພ້ອມກັນເປັນເຈົ້າການຕິດຕາມກວດກາ, ຮັກສາຄວາມສະຫງົບ, ຮັກສາຄວາມເປັນລະບຽບຮຽບຮ້ອຍໃນສັງຄົມ ແລະ ຈັດຕັ້ງປະຕິບັດມາດຕະການ ທີ່ໄດ້ກຳນົດໃນຄຳສັ່ງສະບັບນີ້ແມ່ນໃຫ້ເຈົ້າໜ້າທີ່ປ້ອງການຄວາມສະຫງົບ ແລະ ເຈົ້າໜ້າທີ່ກ່ຽວ ຂ້ອງດຳເນີນມາດຕະການຕາມກົດໝາຍ ແລະ ລະບຽບການ ຢ່າງເຂັ້ມງວດ.
  4. ໃຫ້ທຸກກະຊວງ, ອົງການຂັ້ນສູນກາງ, ອົງການປົກຄອງທ້ອງຖິ່ນ ແລະ ທຸກພາກສ່ວນປະຕິບັດຄຳສັ່ງສະບັບນີ້ຢ່າງເຂັ້ມງວດຕາມບົດບາດ, ໜ້າທີ່ຂອງຕົນການເພີ່ມທະວີມາດຕະການໃນການສະກັດກັ້ນ ແລະ ກັນການລະບາດຂອງພະຍາດໂຄວິດ-19, ຈະມີຜົນກະທົບຕໍ່ການເຄື່ອນໄຫວ, ການດຳ ເນີນທຸລະກິດ ແລະ ຊີວິດການເປັນຢູ່ຂອງທຸກພາກສ່ວນໃນສັງຄົມ, ແຕ່ເພື່ອປົກປ້ອງຊີວິດ,​ ສຸຂະ ພາບຂອງປະຊາຊົນ ແລະ ຄວາມໝັ້ນຄົງຂອງຊາດ, ລັດຖະບານ ຈຶ່ງຈໍາເປັນຕ້ອງປະກາດໃຊ້ຄໍາສັ່ງສະບັບນີ້ ແລະ ຮຽກຮ້ອງໃຫ້ທຸກພາກສ່ວນໃນທົ່ວສັງຄົມຕື່ນຕົວ, ເປັນເຈົ້າການ,​ ເສຍສະຫຼະ ແລະ ພ້ອມກັນປະຕິບັດຢ່າງເຂັ້ມງວດ.
  5. ໃນການຈັດຕັ້ງປະຕິບັດຕົວຈິງ, ຖ້າມີຄວາມຈຳເປັນກໍ່ມອບໃຫ້ຄະນະສະເພາະກິດ ຫຼື ຂະແໝງການ ຫຼື ອົງການປົກຄອງທ້ອງຖິ່ນ ເປັນຜູ້ອອກນິຕິກຳ ແນະນຳລະອຽດຕາມບົດບາດໜ້າທີ່ ແລະ ຂອບເຂດສິດຂອງຕົນ.
  6. ລັດຖະບານຍິນດີຮັບຟັງຄວາມຄິດເຫັນ ແລະ ຂໍ້ສະເໜີທີ່ສ້າງສັນຂອງທຸກພາກສ່ວນໃນສັງຄົມເພື່ອ ຄົ້ນຄວ້າ ແລະ ພິຈາລະນາຢ່າງສົມເຫດສົມຜົນ.
  7. ຄຳສັ່ງສະບັບນີ້ມີຜົນສັກສິດ ນັບແຕ່ວັນທີ 30 ມີນາ ຫາ ວັນທີ 19 ເມສາ 2020. ໃນກໍລະນີ ມີການປ່ຽນແປງລັດຖະບານຈະແຈ້ງໃຫ້ຊາບຕື່ມເປັນແຕ່ລະໄລຍະ

ຈາກຄຳສັ່ງດັ່ງກ່າວມັນຮຽກຮ້ອງທຸກຄົນໃນສັງຄົມປະຕິບັດຢ່າງເຂັ້ມງວດ; ບຸກທະລຸຈຶ່ງຈະເຮັດໃຫ້ ການປາບພະຍາດ COVID-19 ບັນລຸຜົນສູງສຸດ.

ໂດຍ: ທິດດີ