ມອບ-ຮັບ ຜ້າອັດປາກອະນາໄມ 300.000 ອັນ ໃຫ້ແກ່ບັນດາກະຊວງຕ່າງໆ ຂອງ ສປປ ລາວ

0
551

ປະຈຸບັນ ການແຜ່ລະບາດຂອງພະຍາດອັກເສບປອດສາຍພັນໃໝ່ (Covid-19) ທີ່ເກີດຂື້ນໃນທົ່ວໂລກ ໄດ້ສະແດງໃຫ້ເຫັນວ່າ ມວນມະນຸດແມ່ນຕົກຢູ່ໃນສະຕາກຳອັນດຽວກັນ. ພະຍາດອັກເສບປອດສາຍພັນໃໝ່ (Covid-19) ເປັນເຊື້ອໄວຣັດທີ່ບໍ່ມີພົມແດນ, ເປັນສັດຕູຂອງມະນຸດຊາດ ແລະ ຈຳເປັນຕ້ອງໄດ້ຮັບການແກ້ໄຂໃຫ້ປະຊາຄົມໂລກ ຕໍ່ຕ້ານ“ດ້ວຍການເອົາຊະນະກັບການລະບາດຂອງເຊື້ອໄວລັດ Covid-19 ນີ້” ເຊິ່ງໝາຍເຖິງຄວາມປອດໄພ ແລະ ສຸຂະພາບຂອງຜູ້ຄົນທຸກປະເທດ ກໍຄືທົ່ວໂລກ, ດ້ວຍການຮ່ວມແຮງຮ່ວມໃຈກັນ,ຮ່ວມມືສາມັກຄີກັນ ເປັນກຳລັງອາວຸດທີ່ເຂັ້ມແຂງທີ່ສຸດໃນການຕໍ່ສູ້ກັບພະຍາດດັ່ງກ່າວ.

ໃນໄລຍະມີການແຜ່ລະບາດເກີດຂື້ນຢູ່ທີ່ປະເທດຈີນ, ລັດຖະບານລາວ ແລະ ກະຊວງປ້ອງກັນປະເທດ ໄດ້ມີການຊ່ວຍເຫຼືອເງິນໃຫ້ກັບປະເທດຈີນ ເພື່ອສະໜັບສະໜູນຈີນໃນການຕໍ່ສູ້ກັບການແຜ່ລະບາດຂອງເຊື້ອໄວຣັດ Covid-19. ສະແດງໃຫ້ເຫັນເຖິງມິດຕະພາບຮ່ວມທຸກຮ່ວມສຸກລະຫວ່າງສອງຊາດ ລາວ-ຈີນ. ທ່ານ ທອງລຸນ ສີສຸລິດ ນາຍົກລັດຖະມົນຕີ ສປປ ລາວ ແລະ ທ່ານ ສະເຫຼີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ໄດ້ຄ່ຽງບ່າຄ່ຽງໄຫລ່ ກັບ ທ່ານ  ຫວາງອີ້ ເພື່ອເປັນແຮງກຳລັງແຮງໃຈໃຫ້ປະຊາຊົນຊາວຈີນຕໍ່ສູ້ກັບເຊື້ອດັ່ງກ່າວ!

ສປປ ລາວ – ສປ ຈີນ ໄດ້ຊ່ວຍເຫຼືອເຊິ່ງກັນ ແລະ ກັນຕະຫຼອດມາ ສອງປະເທດ ລາວ-ຈີນ ມີພູຜາ, ແມ່ນ້ຳລຳເຊທີ່ຕິດຈອດກັນ, ເປັນບ້ານໃກ້ເຮືອນຄຽງທີ່ມີມູນເຊື້ອຮັກແພງກັນ, ເປັນເພື່ອນບ້ານທີ່ດີ, ໝູ່ທີ່ດີ, ມິດສະຫາຍທີ່ດີ, ຄູ່ຮ່ວມພັນທະມິດທີ່ດີ, ເຊິ່ງເປັນຄູ່ຮ່ວມສະຕາກໍາອັນດຽວກັນທີ່ໝັ້ນຄົງທະນົງແກ່ນທີ່ບໍ່ສາມາດທຳລາຍໄດ້. ສປ ຈີນ ຍິນດີຈັບມືຄ່ຽງບ່າຄ່ຽງໄຫຼ່ກັບ ສປປ ລາວ ຕະຫຼອດເວລາ ແລະ ເຮັດທຸກຄວາມພະຍາຍາມ ເພື່ອປະກອບສ່ວນວຽກງານການປ້ອງກັນການແຜ່ລະບາດຂອງເຊື້ອພະຍາດ Covid-19. ປັດຈຸບັນສະຖານະການໃນ ສປປລາວ ກຳລັງເລີ່ມແຜ່ລະບາດເຊື້ອພະຍາດນີ້, ສປ ຈີນ ກຳລັງໃຫ້ການຊ່ວຍເຫຼືອ ສປປ ລາວ ເພື່ອຄວບຄຸມປ້ອງກັນການແຜ່ລະບາດຂອງພະຍາດດັ່ງກ່າວ.

ມື້ທີ່ຜ່ານມານີ້, ປະເທດລາວໄດ້ກວດພົບກໍລະນີຜູ້ທີ່ຕິດເຊື້ອພະຍາດ (Covid-19), ສຳລັບຜ້າອັດປາກອະນາໄມ ແລະ ອຸປະກອນປ້ອງກັນການລະບາດຂອງເຊື້ອພະຍາດ (Covid-19) ຍັງບໍ່ພຽງພໍ ແລະ ສະຖານະການການແຜ່ລະບາດໃນທ່ົວໂລກຍັງຮ້າຍແຮງ. ການປະເຊີນໜ້າກັບສະຖານະການການແຜ່ລະບາດຂອງເຊື້ອພະຍາດ (Covid-19) ທີ່ນັບມື້ນັບຮຸນແຮງ ແລະ ຫຍຸ້ງຍາກສັບສົນ, ສະນັ້ນສະມາຄົມພັດທະນາເສດຖະກິດອາຊີ-ຈີນ ຈຶ່ງໄດ້ຊ່ວຍເຫຼືອ ຜ້າອັດປາກອະນາໄມ ຈຳນວນ 300.000 ອັນ. ໂດຍແມ່ນ ທ່ານ ມ໋າ ຣູ້ຍຫາວ, ຮອງປະທານຜູ້ບໍລິຫານສະມາຄົມພັດທະນາເສດຖະກິດອາຊີ-ຈີນ ເປັນຜູ້ຕາງໜ້າໃຫ້ແກ່ ສະມາຄົມພັດທະນາເສດຖະກິດອາຊີ-ຈີນ ປະຈຳ ສປປ ລາວ ເພີື່ອມອບຜ້າອັດປາກອະນາໄມໃຫ້ແກ່ ກະຊວງປ້ອງກັນປະເທດ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກະຊວງແຜນການ ແລະ ການລົງທຶນ, ຫ້ອງການປົກຄອງນະຄອນຫຼວງວຽງຈັນ, ກະຊວງການຕ່າງປະເທດ, ກະຊວງພະລັງງານ ແລະ ບໍ່ແຮ່, ກະຊວງປ້ອງກັນຄວາມສະຫງົບ, ກະຊວງຍຸດຕິທຳ ແລະ ກົມການບິນພົນລະເຮືອນ ພ້ອມທັງບັນດາພະແນກການທີ່ກ່ຽວຂ້ອງ.

ທ່ານ ຈ່ຽງຈ້າຍຕົງ ເອກອັກຄະລັດຖະທູດ ສປ ຈີນ ປະຈຳ ສປປ ລາວ, ໄດ້ເຂົ້າຮ່ວມພິທີ ມອບ – ຮັບ ຜ້າອັດປາກອານະໄມ ໃຫ້ແກ່ ກະຊວງປ້ອງກັນປະເທດ ສປປ ລາວ, ພ້ອມທັງສະແດງຄວາມຂອບໃຈຕໍ່ ກະຊວງປ້ອງກັນປະເທດ ແລະ ກອງທັບປະຊາຊົນລາວ ທີ່ໄດ້ໃຫ້ການສະໜັບສະໜູນຢ່າງຈິງຈັງຕໍ່ການຕ້ານການລະບາດຂອງເຊື້ອພະຍາດ COVID-19 ທີ່ ສປ ຈີນ ໃນໄລຍະຜ່ານມາ. ທ່ານຍັງໄດ້ລາຍງານໂດຍຫຍໍ້ກ່ຽວກັບຜົນສຳເລັດຂອງ ສປ ຈີນ ໃນການຕ້ານກັບການແຜ່ລະບາດຂອງເຊື້ອພະຍາດດັ່ງກ່າວ. ສປ ຈີນ ໄດ້ຊ່ວຍເຫຼືອອຸປະກອນນຳໃຊ້ຕ້ານການແຜ່ລະບາດຊຸດທຳອິດໃຫ້ແກ່ ສປປ ລາວ.

ທ່ານເອກອັກຄະລັດຖະທູດ ໄດ້ກ່າວຕື່ມອີກວ່າ: ການຊ່ວຍເຫຼືອຊຸດທີສອງມີ ເຄື່ອງນຸ່ງປ້ອງກັນ 5.000 ຊຸດ, ຜ້າອັດປາກອະນາໄມ 40.000 ອັນ, ເຄື່ອງກວດພະຍາດ 20.000 ອັນ ແລະ ເຄື່ອງບໍລິຈາກອື່ນໆ.  ປະຈຸບັນ ຊ່ຽວຊານແພດ-ໝໍ ຂອງ ສປ ຈີນ ກຳລັງປະຕິບັດໜ້າທີ່ວຽກງານ ປ້ອງກັນການແຜ່ລະບາດຂອງເຊື້ອໄວຣັດ COVID-19 ຢູ່ ສປປ ລາວ ຢ່າງຕັ້ງໜ້າ.

ສປ ຈີນ – ສປປ ລາວ ເປັນເພື່ອນມິດຍຸດທະສາດ ແລະ ຄູ່ຮ່ວມຊະຕາກຳອັນດຽວກັນ, ສະມາຄົມພັດທະນາເສດຖະກິດອາຊີ-ຈີນ ຈະສືບຕໍ່ຊ່ວຍເຫຼືອ ສປປ ລາວ ເພື່ອຕ້ານການແຜ່ລະບາດຂອງເຊື້ອພະຍາດ ຈົນກວ່າສະພາບຈະປົກກະຕິ. ສິ່ງດັ່ງກ່າວນີ້ ເປັນການຢັ້ງຢືນເຖິງມິດຕະພາບອັນເລິກເຊິ່ງລະຫວ່າງ ສປ ຈີນ – ສປປ ລາວ ແລະ ສະແດງເຖິງ ຄູ່ຮ່ວມຊະຕາກຳ ຢ່າງຈະແຈ້ງ ລະຫວ່າງ ສປ ຈີນ – ສປປ ລາວ.

ທ່ານ  ພົນເອກ ຈັນສະໝອນ ຈັນຍາລາດ, ລັດຖະມົນຕີ ກະຊວງປ້ອງກັນປະເທດ ໄດ້ຕາງໜ້າລັດຖະບານລາວ ສະແດງຄວາມຂອບອົກຂອບໃຈຢ່າງສູງ ມາຍັງທ່ານ ຈ່ຽງຈ້າຍຕົງ, ເອກອັກຄະລັດຖະທູດ ສປ ຈີນ ປະຈຳ ສປປ ລາວ ແລະ ທ່ານ ມ໋າຣຸ້ຍຫາວ, ຮອງປະທານ ສະມາຄົມພັດທະນາເສດຖະກິດອາຊີ-ຈີນ ພ້ອມຄະນະ.

ຕາງໜ້າຝ່າຍ ສປ ຈີນ ທີ່ເຂົ້າຮ່ວມພິທີມອບເຄື່ອງຊ່ວຍເຫຼືອມີ: ທ່ານ ພັນເອກ ເສິນຢົງຈິ້ງ, ທູດທະຫານຂອງ ສປ ຈີນ ປະຈຳ ສປປ ລາວ, ເລຂາທິການໃຫຍ່ຄະນະກຳມະການຮ່ວມມື ຈີນ-ລາວ ຂອງສະມາຄົມພັດທະນາເສດຖະກິດອາຊີ-ຈີນ, ທ່ານ ນາງ ຫວງ ຊິວເວີນ  ຮອງປະທານ ເຂດເສດຖະກິດພິເສດບຶງທາດຫຼວງ ແລະ ພາກສ່ວນອື່ນໆ.

Medialaos MMD