ຊົມເຊີຍນໍ້າໃຈເອື້ອເຟື້ອເພື່ອແຜ່ຂອງຄົນລາວ

0
200

ໃນຍາມວິກິດເຊັ່ນນີ້; ເຫັນຂະບວນຊ່ວຍເຫຼືອເກື້ອກູນກັນຂອງຄົນລາວເຮົານໍ້າຕາຕົກ… ຢູ່ຕ່າງແຂວງມີຜູ້ເອົານໍ້າ; ເອົາເຂົ້າ; ຊີ້ນ-ປາ ໄປຢາຍໃຫ້ຜູ້ອອກແຮງງານລາວທີ່ກັບມາຈາກປະເທດໃກ້ຄຽງ… ເຫັນຂະບວນລົດໄປຮັບສູ່ສະຖານທີ່ກັກກັນພະຍາດ… ຢູ່ນະຄອນຫຼວງເຫັນຜູ້ໃຈບຸນແຈກຢາຍໄຂ່… ແຈກຢາຍຜ້າອັດປາກ… ບໍລິສັດຫ້າງຮ້ານໃຫຍ່ໆອຸປະຖຳເງິນມູນຄ່າສູງຊ່ວຍຄະນະສະເພາະກິດ….

ເຫດການຂ້າງເທີງນັ້ນ… ເປັນພຽງບາງເຫດການທໍ່ນັ້ນ ອາດຍັງມີຫຼາຍເຫດການທີ່ຜູ້ຂຽນເລົ່າບໍ່ໝົດ ເຊັ່ນວ່າ: ການປີ່ນປົວຈາກແພດໝໍຮັບໃຊ້ອຶດຕາຫຼັບ ຂັບຕານອນ ເພື່ອຊ່ວຍຜູ້ຕິດເຊື້ອໃຫ້ລອດພົ້ນຈາກເຫດການໃນຄັ້ງນີ້.

ປະກົດການທີ່ຊາບຊື້ງໃນຄັ້ງນີ້ ຄວນໄດ້ຮັບການຍ້ອງຍໍສັນລະເສີນ ແລະ ຖືເປັນແບບຢ່າງທີ່ດີຂອງເພື່ອນຮ່ວມຊາດທີ່ມີຕໍ່ກັນໃນຍາມວິກິດການເຊັ່ນນີ້.

ຜູ້ຂຽນຄິດວ່າ: ຫາກການຈັດຕັ້ງ ໂດຍສະເພາະແມ່ນຊາວໜຸ່ມ-ແມ່ຍິງ ເຂົ້າມາມີສ່ວນຮ່ວມຍີ່ງຈະເປັນການດີ ແຕ່ຕ້ອງໄດ້ລະມັດລະວັງປະຕິບັດຕາມຄຳແນະນຳຂອງແພດໝໍຢ່າງເຄັ່ງຄັດ.

ໃນເວລາສັບສົນຈົນຕາແຈແນວນີ້ ທຸກການຊ່ວຍເຫຼືອແມ່ນມີຄຸນຄ່າມະຫາສານຕໍ່ຜູ້ຢູ່ໃນເຫດການ ຄືດັ່ງພວກເຮົາຮັບຮູ້ຜ່ານຂໍ້ມູນຂ່າວສານ… ພວກເຮົາບໍ່ຄວນຈຳແນກວ່າເຊື້ອມາຈາກໃຜ? ການກັກກັນແມ່ນການປະຕິບັດທາງວິທະຍາສາດເພື່ອຊີວິດຂອງຫຼາຍຄົນໃນສັງຄົມ.

ຂໍຮຽກຮ້ອງໃຫ້ຄົນລາວເຮົາໝົດທຸກຄົນຈົ່ງເຊີດຊູມູນເຊື້ອທີ່ດີງາມຂອງຊາດລາວ-ຂອງຄົນລາວພວກເຮົາ ຊ່ວຍເຫຼືອເກື້ອກູນກັນຕາມຄວາມສາມາດຕົວຈິງດັ່ງບົດເພງປະຕິວັດ ²ເຜົ່າລາວເອີຍ² ພວກເຮົາຈະຕ້ອງຜ່ານຜ່າວິກິດການໃນຄັ້ງນີ້ໄປໃຫ້ໄດ້.

ຂໍເປັນກຳລັງໃຈ ສູ້ຕໍ່ໄປ.

ໂດຍ: ທິດດີ.