ຈາກການກວດພົບຜູ້ຕິດເຊື້ອພະຍາດ Covid-19 ແລະ ມີຄວາມສ່ຽງທີ່ຈະແຜ່ລະບາດໃນທົ່ວປະເທດ ສະນັ້ນຄະນະເລຂາທິການສູນກາງພັກຈີ່ງມີແຈ້ງການເລກທີ 02/ຄລສພ .ລົງວັນທີ 31/03/2020 ເຖີງ: ເລຂາຄະນະບໍລິຫານງານພັກແຂວງ-ນະຄອນຫຼວງວຽງຈັນ; ເລຂາຄະນະພັກກະຊວງ-ອົງການ ໃນທົ່ວປະເທດ. ເລື່ອງ: ໃຫ້ໂຈະການດຳເນີນກອງປະຊຸມໃຫຍ່ ແລະ ທຸກກິດຈະກຳກ່ຽວກັບການກະກຽມດຳເນີນກອງປະຊຸມໃຫຍ່ໃນທົ່ວອົງຄະນະພັກຂັ້ນຕົ້ນ.

ເນື້ອໃນຈິດໃຈສຳຄັນຂອງແຈ້ງການມີດັ່ງນີ້:

  1. ໃຫ້ໂຈະການດຳເນີນກອງປະຊຸມໃຫຍ່ ແລະ ທຸກກິດຈະກຳກ່ຽວກັບການກະກຽມດຳເນີນກອງປະຊຸມໃຫຍ່ຂອງອົງຄະນະພັກແຕ່ລະຂັ້ນ ຈົນຮອດວັນທີ 24 ເມສາ 2020.
  2. ໃຫ້ຄະນະພັກ; ອົງການປົກຄອງແຕ່ລະຂັ້ນສູມໃສ່ຊີ້ນຳ-ນຳພາສຶກສາອົບຮົມພະນັກງານ; ສະມາຊິກພັກ ແລະ ປະຊາຊົນ ເຫັນໄດ້ໄພອັນຕະລາຍຂອງພະຍາດ  Covid-19 ເພື່ອພ້ອມກັນສະກັດກັ້ນ ແລະ ກັນພະຍາດດັ່ງກ່າວ ດ້ວຍການຈັດຕັ້ງປະຕິບັດບັນດາມາດຕະການຕ່າງໆ ທີ່ລັດຖະບານໄດ້ກຳນົດອອກຢ່າງເດັດຂາດ ແລະ ເຂັ້ມງວດ.

                                   ແຈ້ງການ ໄດ້ແຈ້ງໃຫ້ຮູ້ວ່າ:

ໃນໄລຍະຜ່ານມາຄະນະພັກ; ຄະນະປະຈຳກະຊວງ-ອົງການ; ແຂວງ-ນະຄອນຫຼວງວຽງຈັນ ໄດ້ເອົາໃຈໃສ່ຊີ້ນຳ-ນຳພາ ໃນການກະກຽມ ແລະ ດຳເນີນກອງປະຊຸມໃຫຍ່ອົງຄະນະພັກຕົນ ໂດຍເລີ້ມແຕ່ຮາກຖານຂື້ນມາ; ສຳລັບຢູ່ຂັ້ນທ້ອງຖີ່ນ ໄດ້ດຳເນີນກອງປະຊຸມໃຫຍ່ອົງຄະນະພັກເມືອງ-ແຂວງ ສຳເລັດເປັນສ່ວນຫຼາຍ ແລະ ພວມກ້າວເຂົ້າສູ່ການກະກຽມດຳເນີນກອງປະຊຸມໃຫຍ່ອົງຄະນະພັກແຂວງ-ນະຄອນຫຼວງວຽງຈັນ; ຢູ່ຂັ້ນກະຊວງ-ອົງການ ກໍ່ພວມຮັບຕໍ່ສຸມໃສ່ກະກຽມດຳເນີນກອງປະຊຸມໃຫຍ່ຮາກຖານພັກ ທີ່ຂື້ນກັບອົງຄະນະພັກກະຊວງ-ອົງການຕົນ ເພື່ອກ້າວສູ່ກອງປະຊຸມໃຫຍ່ອົງຄະນະພັກກະຊວງ-ອົງການ ຕາມແຜນທີ່ກຳນົດໄວ້; ແຕ່ເນື່ອງຈາກວ່າສະພາບການແຜ່ລະບາດຂອງເຊື້ອພະຍາດ Covid-19 ຍັງສືບຕໍ່ເພີ້ມຂື້ນໃນຫຼາຍປະເທດໃນໂລກ. ສຳລັບ ສປປ ລາວ ເຖີງວ່າພັກ-ລັດຖະບານໄດ້ມີມາດຕະການສະກັດກັ້ນ ແລະ ກັນການລະບາດພະຍາດນີ້ຢ່າງຈິງຈັງໃນຜ່ານມາ ແຕ່ກໍ່ໄດ້ພົບຜູ້ຕິດເຊື້ອ ແລະ ມີຄວາມສ່ຽງທີ່ຈະມີການແຜ່ລະບາດໃນທົ່ວປະເທດ; ເພື່ອເປັນການສະກັດກັ້ນ ແລະ ກັນການລະບາດພະຍາດດັ່ງກ່າວ. ດັ່ງນັ້ນຄະນະເລຂາທິການສູນກາງພັກ ຈີ່ງມີແຈ້ງການສະບັບດັ່ງກ່າວນີ້ອອກມາ.

ສະນັ້ນພາກສ່ວນທີ່ກ່ຽວຂ້ອງທັງຫຼາຍ ຈົ່ງພ້ອມກັນຈັດຕັ້ງປະຕິບັດແຈ້ງການເລກທີ 02/ຄລສພ .ລົງວັນທີ 31/03/2020 ຢ່າງເຂັ້ມງວດ ເພື່ອບັນລຸຜົນສຳເລັດສູງສຸດໃນການສະກັດກັ້ນ ແລະ ກັນການລະບາດຂອງພະຍາດ Covid-19 ໃນຄັ້ງນີ້ດ້ວຍ.

ໂດຍ: ທິດດີ.