ໃນໄລຍະທີ່ ພະຍາດປອດອັກເສບຮຸນແຮງຈາກເຊື້ອຈຸລາໂລກສາຍພັນໃໝ່ ໂຄໂຣນາ 19 ຫລື ໂຄວິດ 19(Covid 19)ກໍາລັງແຜ່ລະບາດໃນທົ່ວໂລກ ແລະ ພວມແຜ່ລະບາດໃນ ສປປລາວ, ພັກ ແລະ ລັດຖະບານແຫ່ງ ສປປ ລາວ ໄດ້ກໍານົດນະໂຍບາຍ, ອອກມະຕິ, ຄໍາສັ່ງ, ຄໍາແນະນໍາ ແລະ ມາດຕະການ ທີ່ ລະອຽດ, ຈະແຈ້ງ ແລະ ຮັດກຸມ ໃຫ້ທຸກພາກສ່ວນໃນສັງຄົມລາວ ພ້ອມກັນຈັດຕັ້ງປະຕິບັດ ເພື່ອ ສະກັດກັ້ນ, ກັນ, ຄວບຄຸມການແຜ່ລະບາດຂອງ ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ19 ຂັ້ນສູນກາງ ແລະ ທ້ອງຖິ່ນໄດ້ປະຕິບັດໜ້າທີ່ຂອງຕົນຢ່າງຕັ້ງໜ້າ ແລະ ມີຜົນສໍາເລັດຫລາຍດ້ານ ເປັນຕົ້ນແມ່ນ ມີການຖະແຫລງຂ່າວລາຍງານສະພາບການປ້ອງກັນ ແລະ ຄວບຄຸມພະຍາດ, ການປິ່ນປົວຜູ້ຕິດເຊື້ອ. ຄະນະສະເພາະກິດຂັ້ນບ້ານໄດ້ອອກແຮງເຜີຍແຜ່ແນະນໍາການປ້ອງກັນຕົນເອງ,  ແນະນໍາວິທີແຍກປ່ຽວ, ແນະນໍາຫາກມີອາການໄຂ້ໃຫ້ໄປພົບແພດດ່ວນ.

ສັງລວມໄດ້ວ່າ ມາຮອດປະຈຸບັນ ເຫັນວ່າ ປະຊາຊົນລາວບັນດາເຜົ່າໄດ້ໃຫ້ການສະໜັບສະໜູນ ແລະ ຮ່ວມມືໄມ້ຮ່ວມມືກັນໃນການປະຕິບັດ ຄໍາສັ່ງ ເລກທີ 06/ນຍ, ລົງວັນທີ 29/3/2020 ແລະ ຄໍາແນະນໍາອື່ນໆ ເຊິ່ງໄດ້ເຮັດໃຫ້ ສປປລາວ ສາມາດຈໍາກັດການລະບາດຂອງພະຍາດໄດ້ໃນລະດັບດີສົມຄວນ.

ໃນຂະນະທີ່ເຈົ້າໜ້າທີ່ສະເພາະກິດທຸກຝ່າຍທັງຢູ່ສູນກາງ ແລະ ທ້ອງຖິ່ນກໍາລັງປະຕິຍບັດໜ້າທີ່ຢ່າງໜັກໜ່ວງໂດຍໄດ້ຮັບການສະໜັບສະໜູນຈາກທົ່ວປວງຊົນ ແລະ ວົງຄະນາຍາດສາກົນນັ້ນ ໄດ້ມີຄົນຈໍານວນໜຶ່ງ ເຊັ່ນກໍລະນີ ນາງ ຕຸກຕາ ຂັນຕິສາລີ ຂາດສະຕິ ໃນການໃຊ້ໂທລະສັບມືຖືຂອງຕົນ ຂຽນຂ່າວອະກຸສົນຕ່າງໆນານາ ສ້າງຄວາມສັບສົນ ແລະ ສ້າງຄວາມປັ່ນປວນໃນສັງຄົມ ເປັນຕົ້ນ ແມ່ນປ່ອຍຂ່າວວ່າ ພະນັກງານທະນາຄານແຫ່ງໜຶ່ງຕິດເຊື້ອ ຫລື ມີກໍລະນີປ່ອຍຂ່າວວ່າ ມີຄອບຄົວນັກທຸກລະກິດຕິດເຊື້ອ ແລະ ປ່ອຍຂ່າວວ່າຍອດຈໍານວນຜູ້ຕິດເຊື້ອໄດ້ເພີ່ມຂຶ້ນ.

ຕໍ່ໜ້າສະພາບການດັ່ງກ່າວ ເຈົ້າໜ້າທີ່ທີ່ກ່ຽວຂ້ອງ ສົມທົບກັບອໍານາດການປົກຄອງທ້ອງຖິ່ນ ແລະ ພໍ່ແມ່ປະຊາຊົນຊັ້ນຄົນຕ່າງໆ ໄດ້ສົມທົບກັນ ຕິດຕາມຕົວ ບຸກຄົນດັ່ງກ່າວ ມາສຶກສາອົບຢ່າງທັນການ. ສ່ວນໃຫ່ຍ ບຸກຄົນດັ່ງກ່າວໄດ້ອອກມາຍອມຮັບຜິດຕໍ່ສັງຄົມ. ສ່ວນ ຈໍານວນທີ່ ບອກບໍ່ຢ່າ ວ່າບໍ່ຟັງ ກໍຈະໄດ້ດໍາເນີນຄະດີຕາມກົດໝາຍຕໍ່ໄປ.

ໂທລະສັັບມືຖືເປັນເຄື່ອງມືສື່ສານເພື່ອສົ່ງຂໍ້ມູນຂ່າວສານທີ່ມີສາລະປະໂຫຍດທີ່ຈໍາເປັນໄປຫາບຸກຄົນອື່ນທີ່ກ່ຽວຂ້ອງ ຫລື ສົ່ງຂໍ້ມູນໄປທົ່ວສາທາລະນະຊົນ. ສະນັ້ນ ພົນລະເມືອງລາວທຸກຄົນ ຈົ່ງມີສະຕິ ແລະ ແນ່ໃຈສະເໝີວ່າ ຂໍ້ມູນທີ່ເຮົາສົ່ງອອກໄປນັ້ນຕ້ອງຖືກຕ້ອງຕາມກົດໝາຍ, ມີສາລະປະໂຫຍດ, ບໍ່ສ້າງຄວາມເສຍຫາຍໃຫ້ກຽດສັກສີຂອງການຈັດຕັ້ງ ແລະ ບຸກຄົນອື່ນ. ຢຸດໃຊ້ໂທລະສັບມືຖືເພື່ອສ້າງຄວາມປັ່ນປວ່ນໃນສັງຄົມ.

ໂດຍ: ຂປລ.