ການຢູ່ຫ່າງແບບແຍກກັນຊົ່ວຄາວນີ້ ເປັນສີ່ງທີ່ພວກເຮົາທຸກຄົນຕ້ອງມີສະຕິລະວັງຕົວສູງ; ຫຼີກເວັ້ນຂີ້ໃຈນ້ອຍບໍ່ເຂົ້າໃຈຜິດຍາດພີ່ນ້ອງຫຼືຄູ່ຮັກ ເພາະວ່າພະຍາດໄວຣັດທີ່ແຜ່ລະບາດນີ້ມັນຈະຮູ້ຜົນ ຫຼື ອອກອາການຊ້າ ເຊີ່ງຢ່າລືມອີກວ່າຜູ້ທີ່ຕິດເຊື້ອແຕ່ບໍ່ອອກອາການເຮັດໃຫ້ຕົວເອງເຂົ້າໃຈຜິດ; ຄົນອ້ອມຂ້າງກໍ່ເຂົ້າໃຈຜິດ ນີ້ຄືປະເດັນທີ່ຕ້ອງໃສ່ໃຈ, ເມື່ອຫຼົງເຂົ້າໃຈຜິດວ່າບໍ່ຕິດເຊື້ອໄວຣັດ Covid-19 ຈີ່ງພົບປະສັງສັນມ່ວນຊື່ນ ແທ້ຈິງແລ້ວຜູ້ຕິດເຊື້ອບໍ່ອອກອາການນີ້ກໍ່ສາມາດແຜ່ເຊື້ອ ໃສ່ຄົນອື່ນແບບບໍ່ຮູ້ສຶກຕົວ.

        ການແຍກຢູ່ຫ່າງ (Social distancing) ຈີ່ງເປັນທາງແກ້ທີ່ດີເພື່ອກັນໄວ້ແຕ່ຫົວທີ; ການມີສະຕິສູງປ້ອງກັນໄວ້ ຖືເປັນການບໍ່ປະໝາດ ເຊີ່ງຂໍຝາກເຕືອນອີກວ່າ ບາງປະເທດທີ່ຕິດເຊື້ອໄວຣັດ  Covid-19 ຫຼາຍ ແລະ ຕາຍຫຼາຍ ກໍ່ມີສາເຫດເກີດມາຈາກການປະໝາດນີ້ເອງ; ການເລືອກຢູ່ບ້ານ-ເຮືອນ ຕາມການແນະນຳຂອງຄະນະສະເພາະກິດຕ້ານໄວຣັດ Covid-19 ຖືເປັນສີ່ງທີ່ທຸກຄົນຕ້ອງປະຕິບັດ; ທາງພຸດທະສາດສະໜາຈື່ງສອນຊີ້ແຈງຢູ່ເລື້ອຍໆວ່າ: ສະຕິເປັນທຳມະຂໍ້ສຳຄັນເຮັດໃຫ້ຄົນເຮົາຮູ້ຕົວເອງ ແລະ ຫຼັກທຳມະ; ສະຕິນີ້ເອງທີ່ເຮັດໃຫ້ຫຼາຍຄົນລອດພົ້ນຈາກຫາຍະນະໄພພິບັດຕ່າງໆ ເຊີ່ງກົງກັນຂ້າມກັບຜູ້ທີ່ຂາດສະຕິກໍ່ເທົ່າກັບເປັນການປະໝາດຍ່ອມຕົກສູ່ຄວາມທຸກຢ່າງບໍ່ຕ້ອງສົງໃສ.

        ການກັກຕົວຢູ່ກັບບ້ານ-ເຮືອນ ແລ້ວຄອຍຕິດຕາມສະພາບຂ່າວຢ່າງມີສະຕິຮູ້ເທົ່າທັນ ຍັງດີກ່ວາ ການເສບຂ່າວຢ່າງຕື່ນຕົກໃຈ; ເສບຂໍ້ມູນຂ່າວສານຢ່າງມີສະຕິ ເພື່ອໃຫ້ຮູ້ຄວາມຈິງ ບໍ່ແມ່ນເຮັດພຽງເພື່ອສະໜອງກິເລດຢາກຮູ້-ຢາກເຫັນ, ເພີດເພີນ ເພາະມັນເປັນພຽງລະດັບສັນຊາດຕະຍານຂອງມະນຸດ; ອ່ານ-ຕິດຕາມ Fake news ບໍ່ແມ່ນສົ່ງຕໍ່ Fake news; ບໍ່ເປັນແນວຮ່ວມແຜ່ຂໍ້ມູນປອມ ສ້າງຄວາມແຕກແຍກໃນສັງຄົມຕາມນິໃສເຄີຍຊີນໃນຍາມວິກິດ; ເຂົາຕ້ອງໃຊ້ວາຈາມ່ວນໃຈ ບໍ່ແມ່ນດູຖູກຢຽດຫຍາມຊໍ້າເຕີມ.

        ຂໍສະຫຼຸບວ່າ: ໄລຍະພັກກັກຕົວເອງຢູ່ບ້ານ-ເຮືອນ (Stay home) ໃຫ້ເກີດປະໂຫຍດສູງສຸດ ນັ້ນຄືການຝຶກສະມາທິພາວະນາ; ຈັດສັນບ້ານ-ເຮືອນໃຫ້ສະອາດໜ້າຢູ່; ໃຊ້ເວລາບອກສອນລູກຫຼານໃຫ້ຮູ້ທັນແກ່ນສານຂອງຊີວິດ; ຝຶກໃຫ້ເຂົາອ່ານຄົ້ນຄ້ວາດ້ວຍຕົນເອງບໍ່ແມ່ນນັ່ງນອນຫຼີ້ນໄປມື້ໆຢ່າງໄຮ້ຄ່າ; ບໍ່ຢາກເຫັນໂລງສົບແລ້ວຫຼັ່ງນໍ້າຕາ ກໍ່ຕ້ອງມີສະຕິ.

ໂດຍ: ດັ້ນກີບເມກ.