ຕະຫຼາດເທດສະບານເມືອງສາລະວັນ ເຂັ້ມງວດປະຕິບັດຕາມມາດຕະການປ້ອງກັນ ແລະ ຄວບຄຸມພະຍາດໂຄວິດ-19

0
232

ທ່ານ ບຸນອ້ອມ ເດດນະຄອນ ຫົວໜ້າຈັດສັນ ຕະຫຼາດເທດສະບານເມືອງສາລະວັນ ໄດ້ໃຫ້ສໍາພາດຕໍ່ສື່ມວນຊົນແຂວງ ໃນວັນທີ 7 ເມສານີ້ວ່າ: ພາຍຫຼັງທີ່ໄດ້ມີຄໍາສັ່ງນາຍົກ ເລກທີ 06/ນຍ, ລົງວັນທີ 29 ມີນາ 2020 ວ່າດ້ວຍການເພີ່ມທະວີເອົາໃຈໃສ່ສະກັດກັ້ນ ການແຜ່ລະບາດ ຄວບຄຸມ ແລະ ກຽມພ້ອມຮອບດ້ານເພື່ອຕ້ານພະຍາດໂຄວິດ-19, ພວກເຮົາກໍໄດ້ເອົາໃຈໃສ່ໂຄສະນາທາງໂທລະໂຄ່ງແນະນໍາໃຫ້ແມ່ຄ້າຊາວຂາຍ, ພໍ່ແມ່ປະຊາຊົນທີ່ໄດ້ເຂົ້າມາໃນທ້ອງຕະຫຼາດໄດ້ມີສະຕິລະວັງຕົວ, ຮັບຮູ້ເຂົ້າໃຈເຖິງຜົນຮ້າຍ ແລະ ວິທີປ້ອງກັນຂອງເຊື້ອພະຍາດ ໂຄວິດ-19.

ພ້ອມດຽວກັນນີ້ ແນໃສ່ຍົກລະດັບການຈັດຕັ້ງປະຕິບັດມາດຕະການຕ່າງໆໃຫ້ມີປະສິດທິຜົນສູງ ຍັງໄດ້ປະຕິບັດຕາມມາດຕະການ ແລະ ຄວບຄຸມພະຍາດດັ່ງກ່າວຢ່າງເຂັ້ມງວດ ເປັນຕົ້ນໄດ້ເຜີຍແຜ່ບັນດານິຕິກໍາວ່າດ້ວຍການປ້ອງກັນ ແລະ ຄວບຄຸມພະຍາດອັກເສບປອດຂອງລັດຖະບານ, ຂອງກະຊວງສາທາລະນະສຸກ, ຂອງແຂວງ ແລະ ພາກສ່ວນທີ່ກ່ຽວຂ້ອງຢ່າງກວ້າງຂວາງ, ໂດຍສະເພາະຢູ່ພາຍໃນທ້ອງຕະຫຼາດຂອງ ກໍໄດ້ມີການຕິດຕາມການສວຍໂອກາດຂຶ້ນລາຄາສິນຄ້າ, ຈັດສັນສະຖານທີ່ຂາຍເຄື່ອງບໍ່ໃຫ້ແອອັດ, ຕ້ອງໃຫ້ຫ່າງກັນ 1-2 ແມັດ, ຕ້ອງໃສ່ຜ້າອັດປາກ, ອະນາໄມລ້າງມືທໍາຄວາມສະອາດທຸກຄັ້ງໃນເວລາທີ່ຈະເຂົ້າ ຫຼື ອອກຈາກຕະຫຼາດ, ລ້າງມືໃສ່ສະບູ ຫຼືເຈວລ້າງມື, ນອກນັ້ນທາງຕະຫຼາດຂອງພວກເຮົາຍັງໄດ້ມີອ່າງລ້າງມືຂ້າເຊື້ອ 2 ຈຸດ ແລະ ມີພະນັກງານສີດຢາຂ້າເຊື້ອອີກດ້ວຍ.

ໂດຍ: ກິນດາວັນ
medialaos salavan