ເພື່ອເປັນການປະກອບສ່ວນຊ່ວຍເຫຼືອສັງຄົມ ກໍ່ຄືບັນດາແຮງງານລາວ ທີ່ກັບຈາກປະເທດເພື່ອນບ້ານ ແລະນຳໄປກັກກັນເປັນເວລາ 14 ວັນທີ່ສູນກັກກັນຊົ່ວຄາວ ຂອງແຕ່ລະໂຮງຮຽນໃນແຕ່ລະບ້ານ ເພື່ອປ້ອງກັນ ຄວບຄຸມ ແລະ ແກ້ໄຂ ຕ້ານການລະບາດຂອງພະຍາດອັກເສບປອດຈາກເຊື້ອຈຸລະໂລກ ສາຍພັນໃໝ່ ຫຼື ໂຄວິດ 19, ດັ່ງນັ້ນ ໃນຕອນເຊົ້າວັນທີ 6 ເມສາ 2020 ທ່ານ ວັງດິ໊ງ ໄຊຍະວົງ ຜູ້ອຳນວຍການບໍລິສັດທ່ອງທ່ຽວດາວຮຸ່ງ ພ້ອມຄະນະຈາກພັດຕະຄານດາວຮຸ່ງ ກໍໄດ້ນຳເອົາເຂົ້າກ່ອງຈຳນວນ 240 ກ່ອງ ແລະ ນ້ຳດື່ມຈຳນວນ 240 ຕຸກໄປມອບໃຫ້ຄະນະຮັບຜິດຊອບ ແລະ ບັນດາແຮງງານທີ່ສູນກັກກັນຊົ່ວຄາວຕາມໂຮງຮຽນແຫ່ງຕ່າງໆຈຳນວນ 9 ສູນພາຍໃນນະຄອນໄກສອນພົມວິຫານ.

ໃນນັ້ນແມ່ນໄດ້ໄປມອບໃຫ້ແຕ່ລະສູນຄື: ທີ່ໂຮງຮຽນປະຖົມຫົວເມືອງໃຕ້ ມີ 18 ຄົນ ຍິງ 9 ຄົນ, ປະຖົມຫົວເມືອງເໜືອ ມີ 17 ຄົນ ຍິງ 12 ຄົນ, ປະຖົມທ່າອຸດົມ 7 ຄົນ ຍິງ 4 ຄົນ, ມັດທະຍົມສົມບູນທ່າຊະໂນ ມີທັງໝົດ 32 ຍິງ 15 ໃນນັ້ນທັງ 32 ຄົນແມ່ນຖືກກັກກັນຄົບ 14 ວັນພາຍຫຼັງທີ່ມີການກວດອຸນນະພູມ ເຫັນວ່າບໍ່ເປັນໄຂ້ ແລະ ບໍ່ມີອາການທີ່ໜ້າສົງໄສເຊິ່ງແພດໝໍ ແລະ ອຳນາດການປົກຄອງບ້ານໄດ້ເຮັດໃບປົດປ່ອຍ ແລະ ອະນຸຍາດໃຫ້ກັບບ້ານໄດ້, ໂຮງຮຽນປະຖົມບ້ານນ້ຳບໍ່ມີ 19 ຄົນ ຍິງ 10 ຄົນ, ປະຖົມບຶງທະເລມີ 21 ຄົນ ຍິງ 8 ຄົນ, ປະຖົມທ່າຫົວຊ້າງມີ 29 ຄົນ ຍິງ 11 ຄົນ, ປະຖົມ ແລະ ມັດທະຍົມຕົ້ນສະໜາມໄຊ ມີ 23 ຄົນ ຍິງ 13 ຄົນ ແລະໄດ້ເຮັດໃບປົດປ່ອຍໃຫ້ກັບບ້ານໄດ້ ມີ 3 ຄົນ,ຍິງ1 ຄົນ ແລະ ໂຮງຮຽນປະຖົມໂພນສະຫວ່າງໃຕ້ ມີ 26 ຄົນ ຍິງ 16 ຄົນ ໃນນັ້ນມີຕ່າງແຂວງ 3 ຄົນຄື: ແຂວງຈຳປາສັກ, ຄຳມ່ວນ ແລະ ແຂວງຫຼວງພະບາງ.

ສຳລັບນະຄອນໄກສອນພົມວິຫານ ມີສູນກັກກັນຊົ່ວຄາວທັງໝົດ 40 ສູນ ຮອດແລງວັນທີ 5 ເມສາ ມີແຮງານລາວທີ່ກັບຈາກປະເທດໄທ ແລະຖືກກັກກັນທັງໝົດ 1.410 ຄົນ ຍິງ 718 ຄົນ; ໃນນັ້ນອໍານາດການປົກຄອງ ແລະ ແພດໝໍທີ່ປະຈໍາແຕ່ລະສູນ ກໍໄດ້ມີການໂຄສະນາເຜີຍແຜ່ຜົນຮ້າຍ,ວິທີການແຜ່ເຊື້ອ,ການລະບາດ, ວິທີການປ້ອງກັນ ແລະ ຄວບຄຸມພະຍາດໂຄວິດ-19 ຢ່າງຕໍ່ເນື່ອງດ້ວຍການປະຊາສໍາພັນທາງໂທລະໂຄ່ງບ້ານ ແລະ ສູນທີ່ມີແຮງງານ ພັກຊົ່ວຄາວ 14ວັນ ຕາມຫຼັກການ ຂອງອົງການອະນາໄມໂລກ ພ້ອມນີ້ ກໍແນະນໍາໃຫ້ແຮງງານ ດັ່ງກ່າວ ເຂົ້າໃຈ ຈຸດປະສົງ ຂອງຂັ້ນເທິງ ໃນການກັກຕົວແຮງງານລາວ ທີ່ມາຈາກປະເທດໄທ ເພື່ອຕິດຕາມອາການ ໃຫ້ຫຼີກເວັ້ນການແຜ່ລະບາດພະຍາດສູ່ຄອບຄົວ ແລະ ຊຸມຊົນ ເພາະເຂົາເຈົ້າເອງມາຈາກປະເທດທີ່ມີການລະບາດ ໂຄວິດ-19 ຈຶ່ງຖືວ່າເປັນກຸ່ມສ່ຽງ ເຊິ່ງບັນດາແຮງງານທີ່ຖືກກັກກັນຊົ່ວຄາວກໍໃຫ້ຄວາມຮ່ວມມືເປັນຢ່າງດີ.

savanakhet Medialaos