ວັນທີ 10 ເມສາ 2020 ຢູ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ບໍລິສັດ ອີທີແອລ ຈຳກັດ ໄດ້ນຳຊິມເນັດ ຈຳນວນ 20 ອັນ ແລະ ຜ້າອັດປາກ-ດັງ ຈຳນວນ 600 ແຜ່ນ ເພື່ອນໍາໃຊ້ເຂົ້າໃນການເຄື່ອນໄຫວວຽກງານປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ-19 ທີ່ກຳລັງແຜ່ລະບາດໃນທົ່ວໂລກ ອຸປະກອນດັ່ງກ່າວແມ່ນມອບໂດຍ ທ່ານ ສະຫັວນ ລາດສະດີ ຮອງຜູ້ອຳນວຍການ ບໍລິສັດ ອີທີແອລ ມະຫາຊົນ ຈຳກັດ ແລະ ຮັບໂດຍ ທ່ານ ສົມສະຫວາດ ພົງສາ ຮອງຫົວໜ້າກົມສື່ມວນຊົນ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ.

ໃນໂອກາດດຽວກັນ ທ່ານ ສົມສະຫວາດ ພົງສາ ໄດ້ສະແດງຄວາມຂອບໃຈ ມາຍັງບໍລິສັດ ອີທີແອລ ຈຳກັດ ທີ່ມີນໍ້າໃຈ ແລະ ໄດ້ໃຫ້ການຊ່ວຍເຫຼືອຕະຫຼອດມາ ເຄື່ອງຊ່ວຍເຫຼືອຄັ້ງນີ້ ກົມສື່ມວນຊົນ ຈະໄດ້ໄປແຈກຢາຍໃຫ້ສື່ມວນຊົນ ໃນການເຄື່ອນໄຫວວຽກງານປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ-19.

Medialaos