ຕອນແລງ ວັນທີ 10 ເມສາ 2020 ທີ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ບໍລິສັດ ລາວໂທລະຄົມມະນາຄົມ ມະຫາຊົນ ໄດ້ມອບອຸປະກອນຈຳເປັນໃນການເຄື່ອນໄຫວວຽກງານສື່ມວນຊົນ ໃນການຕ້ານພະຍາດໂຄວິດ-19 ອຸປະກອນຄັ້ງນີ້ປະກອບມີ: ຜ້າປິດປາກ-ດັງ ແລະ ຊິມເນັດຈໍານວນໜື່ງ ເຊີ່ງໃຫ້ກຽດມອບໂດຍ ທ່ານ ສຸພົນ ຈັນທະວີໄຊ ຜູ້ອຳນວຍການໃຫຍ່ ບໍລິສັດ ລາວໂທລະຄົມມະນາຄົມ ມະຫາຊົນ ແລະ ຕາງໜ້າກ່າວຮັບໂດຍ ທ່ານ ສົມສະຫວາດ ພົງສາ ຮອງຫົວໜ້າກົມສື່ມວນຊົນ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ.

ໂອກາດນີ້ ທ່ານ ສົມສະຫວາດ ພົງສາ ຕາງໜ້າສື່ມວນຊົນ ໄດ້ສະແດງຄວາມຂອບໃຈ ແລະ ຮູ້ບຸນຄຸນມາຍັງບໍລິສັດ ລາວໂທລະຄົມມະນາຄົມ ມະຫາຊົນ ທີ່ໄດ້ມອບອຸປະກອນຈຳເປັນດັ່ງກ່າວໃນຄັ້ງນີ້ ເພື່ອເປັນການຊ່ວຍເຫຼືອຊຸກຍູ້ສື່ມວນຊົນຂອງພວກເຮົາໃນວຽກງານ, ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ-19.