ສຸຂະພາບດີທຸກຄົນລ້ວນແຕ່ຕ້ອງການ ໃນປະຈຸບັນນີ້ມີການກະຕຸ້ນຫຼາຍຢ່າງ ເຊັ່ນວ່າ: ອາຫານການກິນ, ການນຳໃຊ້ສື່ສັງຄົມ, ບໍ່ມີເວລາອອກກໍາລັງກາຍ ສີ່ງເຫຼົ່ານີ້ແມ່ນສາເຫດທີ່ເຮັດໃຫ້ສຸຂະພາບຂອງພວກເຮົາເສື່ອມໂຊມ ສະນັ້ນວິທີງ່າຍໆ ທີ່ຈະສ້າງສຸຂະພາບທີ່ດີໃຫ້ແກ່ທ່ານ ມີດັ່ງນີ້:

1. ການເລືອກກິນອາຫານ

ບໍ່ສາມາດປະຕິເສດໄດ້ ອາຫານແມ່ນປັດໃຈໜຶ່ງທີ່ສຳຄັນຕໍ່ຮ່າງກາຍ ບໍ່ວ່າຈະເປັນຜົນດີ ຫຼື ບໍ່ດີກໍ່ຕາມ ຂື້ນກັບການເລືອກອາຫານທີ່ເໝາະສົມ ເພາະວ່າຮ່າງກາຍໄດ້ຮັບການພັດທະນາ ແລະ ສ້ອມແປງໃນສ່ວນຕ່າງໆ ຄວນຫຼຸດອາຫານທີ່ມີພະລັງງານສູງ ເຊັ່ນ: ປີ້ງ ຫຼື ອາຫານທີ່ມີໄຂມັນສູງ ເພາະຮ່າງກາຍບໍ່ສາມາດເຜົາຜານໄດ້ໝົດ ແລະ ໃນທີ່ສຸດມັນກໍ່ຈະກາຍເປັນການສະສົມໄຂມັນໃນຮ່າງກາຍ ວິທີທີ່ດີທີ່ສຸດແມ່ນການກິນອາຫານໃຫ້ຄົບ 5 ໝູ່ໃນຈໍານວນທີ່ເໝາະສົມ ແລະ ເລືອກອາຫານທີ່ດີຕໍ່ສຸຂະພາບເທົ່ານັ້ນ.

2. ການບໍລິຫານສະໝອງ

ການບໍລິຫານສະໝອງແມ່ນອີກວິທີໜຶ່ງທີ່ຈະຊ່ວຍສົ່ງເສີມໃຫ້ມີສຸຂະພາບດີ ພະຍາຍາມຫາເກມການຝຶກສະໝອງ ເຊັ່ນວ່າ: ເກມອັກສອນໄຂວ່ກັນ, ເກມທີ່ມີຕຳແໜ່ງຂອງຮູບພາບ, ເກມຈັບຜິດ, ເກມ Sudoku ຫຼື ເກມໝາກຮຸກຈີນເປັນຕົ້ນ ຫຼັງຈາກນັ້ນກໍ່ຄວນຫັນມາກິນໝາກໄມ້, ໝາກກ້ຽງ, ໝາກອະງຸ່ນ, ແລະ ອື່ນໆ ຕື່ມອີກ ເພາະວ່າໝາກໄມ້ຊະນິດນີ້ມີສານຕ້ານອະນຸມູນອິດສະຫຼະເພື່ອຫຼຸດຜ່ອນອາການລືມໄວ ຫຼື ຍີ້ມກໍ່ສາມາດຊ່ວຍໃຫ້ເລືອດໄຫຼວຽນໄດ້ດີຂື້ນເຊັ່ນກັນ ເພາະວ່າຮ່າງກາຍຈະປ່ອຍສານເຄມີໃນລະບົບປະສາດເພື່ອຜ່ອນຄາຍ ເຊີ່ງຈະມີຜົນດີຕໍ່ຮ່າງກາຍ, ຈິດໃຈ ແລະ ຄົນອ້ອມຂ້າງທ່ານກໍ່ຈະມີຄວາມສຸກຄືກັນ.

3. ການພັກສາຍຕາຈາກການນຳໃຊ້ສື່ສັງຄົມ.

ໃນປັດຈຸບັນບໍ່ວ່າທ່ານຈະໄປບ່ອນໃດ ຫຼື ເຮັດຫຍັງທ່ານຕ້ອງຖ່າຍຮູບ ຫຼື ບາງເທື່ອກໍ່ອາດຈະແບ່ງປັນຂໍ້ມູນ ແລະ ບໍ່ພາດເຫດການສຳຄັນຕ່າງໆ ເຊີ່ງຖ້າຖືກນຳໃຊ້ໃນຈຳນວນທີ່ເໝາະສົມກໍ່ຈະເປັນປະໂຫຍດຕໍ່ທ່ານ ແຕ່ຖ້າໃຊ້ຫຼາຍເກີນໄປ ນອກຈາກການເປັນຄົນຕິດສັງຄົມແລ້ວ ອາດຈະເຮັດໃຫ້ກ້າມຊີ້ນຕາເມື່ອຍ ຫຼື ຕາແຫ້ງ ເພາະຕ້ອງໄດ້ແນມເບິ່ງໜ້າຈໍເປັນເວລາດົນນານ ອາດເຮັດໃຫ້ສາຍຕາມົວ, ອາການເບີ ຫຼື ເບິ່ງບໍ່ເຫັນ ວິທີດີທີ່ສຸດແມ່ນການພັກຜ່ອນສາຍຕາ ແລະ ບໍລິຫານດວງຕາ ເຊັ່ນ: ກະພິບຕາເລື້ອຍໆ, ຫຼຽວຕາໄປ-ມາ ເພື່ອປ້ອງກັນຕາແຫ້ງ ຫຼື ເບິ່ງວັດຖຸໄກໆ ຈະຊ່ວຍຜ່ອນຄາຍສາຍຕາ ຖ້າຫາກຫຼຸດຜ່ອນສື່ສັງຄົມກໍ່ຈະເຮັດໃຫ້ບໍ່ຄຽດ ແລະ ບໍ່ກົດດັນຈາກເສບຂ່າວສຸຂະພາບຈິດກໍ່ຈະດີ.

4. ການອອກກຳລັງກາຍ

ການອອກກຳລັງກາຍນອກຈາກຈະມີສຸຂະພາບດີ ອະໄວຍະວະຕ່າງໆ ພາຍໃນຮ່າງກາຍເຮັດວຽກໄດ້ມີປະສິດທິພາບແລ້ວ ຍັງເຮັດໃຫ້ເຮົາມີພູມຕ້ານທານຫ່າງໄກຈາກພະຍາດຕ່າງໆ ແລະ ສຸຂະພາບຈິດກໍ່ດີເຊັ່ນກັນ ຄວນອອກກຳລັງກາຍຢ່າງໜ້ອຍ 30 ນາທີ ຕໍ່ມື້ຫຼັງຈາກເລີກວຽກ ທົດລອງຍ່າງ ແລະ ອອກກຳລັງກາຍຢູ່ສວນສາທາລະນະໃກ້ເຮືອນຂອງທ່ານ ຫຼື ການແລ່ນ ແລະ ເຕັ້ນແອໂລບິກທັງໝົດ ສາມາດເຮັດໃຫ້ຮ່າງກາຍຂອງທ່ານມີສຸຂະພາບດີ ແຕ່ຖ້າໃຜທີ່ບໍ່ມີເວລາອອກກຳລັງກາຍແທ້ໆ ການເຮັດວຽກກໍ່ອາດຊ່ວຍໄດ້ເຊັ່ນກັນ ໂດຍສະເພາະແມ່ນການເຮັດສວນ, ກວາດເຮືອນ, ຖູເຮືອນ, ລ້າງລົດ, ເຊິ່ງຖືວ່າເປັນການອອກ ກຳລັງກາຍໃນຕົວເອງ ຍັງເຮັດໃຫ້ເຮືອນສະອາດ ແລະ ກະທັດຮັດເຊັ່ນດຽວກັນ.

5. ການພັກຜ່ອນໃຫ້ພຽງພໍ

ເມື່ອວຽກງານປະຈຳວັນຕ່າງໆ ໄດ້ສຳເລັດ ການພັກຜ່ອນທີ່ດີທີ່ສຸດແມ່ນການນອນຫຼັບ ເພາະຮ່າງກາຍສາມາດຟື້ນຟູໄດ້ຢ່າງເຕັມທີ່ ຄວນນອນ 8 ຊົ່ວໂມງ ແລະ ນອນເປັນເວລາ ເພາະຖ້າທ່ານນອນເດິກເກີນໄປຮ່າງກາຍອາດຈະເມື່ອຍ ມັນຍັງມີຜົນສະທ້ອນ ເຊັ່ນ: ຮອຍຫ່ຽວ, ຄວາມສ່ຽງຂອງພະຍາດຕ່າງໆ ຄວນພັກຜ່ອນໃຫ້ພຽງພໍ ແລະ ເມື່ອຕື່ນນອນຮ່າງກາຍກໍ່ຈະສົດຊື່ນ ສຸຂະພາບທາງດ້ານຮ່າງກາຍກໍ່ຈະດີຂື້ນ.

ພຽງແຕ່ວິທີງ່າຍໆ ນີ້ສາມາດເຮັດໃຫ້ທ່ານມີສຸຂະພາບແຂງແຮງ ທ່ານອາດຈະຕ້ອງການຄວາມພະຍາຍາມເລັກນ້ອຍ ແລະ ຮູ້ສຶກລັງເລໃຈພຽງເລັກນ້ອຍໃນຕອນທຳອິດ ແຕ່ຂ້າພະເຈົ້າສາມາດຮັບປະກັນວ່າຄວາມພະຍາຍາມແມ່ນບໍ່ເປັນສູນແນ່ນອນຍັງຖືວ່າເປັນກຳໄລນຳອີກ!