ວັນທີ 11 ເມສາ 2020 ພາຍຫລັງສຳເລັດການປະຕິບັດເຮັດວຽກງານໃນເບື້ອງຕົ້ນຢູ່ທີ່ນະຄອນຫລວງວຽງຈັນແລ້ວ,ຄະນະທິມແພດຊ່ຽວຊານ ສສ ຫວຽດນາມ ເຊິ່ງນຳໂດຍ ສະຫາຍ ພົນຈັດຕະວາ ຫງວຽນຮຸງຖັງ ຮອງຫົວໜ້າກົມໃຫຍ່ພະລາທິການກອງທັບ ສສ ຫວຽດນາມພ້ອມດ້ວຍຄະນະ, ໄດ້ສືບຕໍ່ເຄືອນໄຫວເຮັດວຽກເກັບກຳຂໍ້ມູນພ້ອມທັງປະເມີນ ວາງແຜນການຮັບມື ແລະ ການຄວມຄຸມການແຜ່ລະບາດຂອງເຊື້ອພະຍາດໂຄວິດ-19 ຢູ່ 3 ແຂວງພາກກາງຂອງ ສປປລາວປະກອບດ້ວຍ ກອງບັນຊາການທະຫານ ແຂວງບໍລິຄຳໄຊ,ກອງບັນຊາການທະຫານແຂວງຄຳມ່ວນ,ກອງບັນຊາການທະຫານແຂວງສະຫວັນນະເຂດ ແລະ ໂຮງໝໍບໍລິເວນ109 ໃຫ້ກຽດຕ້ອນຮັບໂດຍສະຫາຍພົນຈັດຕະວາ ຈະເລີນ ວົງວິໄຊ ເລຂາຄະນະພັກ, ຫົວໜ້າການເມືອງກອງບັນຊາການທະຫານແຂວງສະຫວັນນະເຂດ,ມີສະຫາຍພົນຈັດຕະວາ ວົງສັກພັນທະວົງ ຮອງຫົວຫນ້າກົມໃຫຍ່ພາລະທິການກອງທັບ,ຄະນະສະເພາະກິດເພື່ອປ້ອງກັນຄວມຄຸມ ແກ້ໄຂການລະບາດເຊື້ອພະຍາດໂຄວິດ-19 ເຂົ້າຮ່ວມ.

ຈາກການລົງຕິດຕາມປະເມີນຜົນຕົວຈິງກ່ຽວກັບການສະກັດກັ້ນພະຍາດອັກເສບປອດສາຍພັນໃໝ່ໂຄວິດ-19, ແລະ ຮັບຟັງການລາຍງານໂດຍຫຍໍ້ຈາກຄະນະສະເພາະກິດຂອງກອງບັນຊາການທະຫານແຂວງ ບໍລິຄຳໄຊ,ກອງບັນຊາການທະຫານແຂວງຄຳມ່ວນ,ກອງບັນຊາການທະຫານແຂວງສະຫວັນນະເຂດ ແລະ ໂຮງໝໍບໍລິເວນ ສະຫາຍ ພົນຈັດຕະວາ ຫງວຽນຮຸງຖັງ ຮອງຫົວໜ້າກົມໃຫຍ່ພະລາທິການກອງທັບ ສສ ຫວຽດນາມ ໄດ້ໃຫ້ທິດຊີ້ນຳວິທີປ້ອງກັນ ແລະ ສະກັດກັ້ນການແຜ່ລະບາດຂອງພະຍາດອັກເສບປອດສາຍພັນໃໝ່ໂຄວິດ-19 ໂດຍແນະນໍາໃຫ້ເອົາໃຈໃສ່ ແລະ ເຂັ້ມງວດພ້ອມກັນປະຕິບັດມາດຕະການຂອງຂັ້ນເທິງກໍຄືຄະນະສະເພາະກິດຂອງກະຊວງສະທາລະນະສຸກ ກ່ຽວກັບການສະກັດກັ້ນ, ສຳຄັນການເຂົ້າ-ອອກປະເທດ, ຕ້ອງເພີ່ມທະວີການຕິດຕາມຄົນທີ່ມາຈາກຕ່າງປະເທດ ເພື່ອສະກັດກັ້ນການນຳເຊື້ອພະຍາດທີ່ຈະແຜ່ລະບາດ, ເອົາໃຈໃສ່ຫຼັກການສຸຂະສຶກສາ ເພື່ອບໍ່ໃຫ້ເກີດມີການຕິດເຊື້ອໃນກຳລັງປ້ອງກັນຊາດ, ຮັບປະກັນສຸຂະພາບຂອງຄະນະນຳ, ພະນັກງານ-ນັກຮົບໃຫ້ແຂງແຮງ.

ໂອກາດນີ້ ສະຫາຍພົນຈັດຕະວາ ຈະເລີນ ວົງວິໄຊ ເລຂາຄະນະພັກ, ຫົວໜ້າການເມືອງກອງບັນຊາການທະຫານແຂວງສະຫວັນນະເຂດໄດ້ສະແດງຄວາມຂອບອົກຂອບໃຈຢ່າງສູງ ທີ່ຄະນະທິມແພດຊ່ຽວຊານ ສສ ຫວຽດນາມໄດ້ໃຫ້ທິດຊີ້ນຳ ແລະ ແບ່ງປັນປະສົບການ ໄດ້ໃຫ້ການປຶກສາ, ແນະນໍາ ແລະນໍາພາຄະນະແພດຂອງ ສປປ ລາວທັງຢູ່ສູນກາງ ແລະ ບັນດາແຂວງໃນການປ້ອງກັນ, ຄວບຄຸມການລະບາດ ລວມໄປເຖິງການຄຸ້ມຄອງກໍລະນີຜູ້ສົງໄສ ແລະການປິ່ນປົວຄົນເຈັບທີ່ເປັນພະຍາດໂຄວິດ-19 ຢ່າງມີຄວາມຮັບຜິດຊອບ, ຕາມທິດທາງຂອງການນໍາສອງປະເທດໃນການສະກັດກັ້ນພະຍາດອັກເສບປອດສາຍພັນໃໝ່ໂຄວິດ-19, ລາວ-ຫວຽດນາມເປັນປະເທດທີ່ມີຊາຍແດນຕິດຈອດກັນແຕ່ເໜືອເຖິງໃຕ້, ໂອກາດທີ່ພະຍາດຈະແຜ່ລະບາດລະຫວ່າງປະເທດແມ່ນມີຄວາມສ່ຽງສູງ, ສະນັ້ນ ທັງສອງປະເທດເວົ້າລວມ, ເວົ້າສະເພາະສອງກອງທັງລາວ-ຫວຽດນາມ ຕ້ອງເພີ່ມທະວີປະສານງານ ແລະ ແລກປ່ຽນປະສົບການໃນການສະກັດກັ້ນການແຜ່ລະບາດຂອງພະຍາດໂຄວິດ-19 ໃຫ້ຜ່ານພົ້ນໄປ

Medialaos