ອີງຕາມການໃຫ້ຂໍ້ມູນຂອງທ່ານ ອ່ອນລຳພັນ ບົວສີແກ້ວ ເຈົ້າເມືຶອງໄຊບູລີ ໃນຄັ້ງວັນທີ 10 ເມສາ 2020 ນີ້ ໃຫ້ຮູ້ວ່າ: ປັດຈຸບັນທົ່ວເມືອງໄຊບູລີ ແມ່ນໄດ້ເອົາໃຈໃສ່ຈັດຕັ້ງຜັນຂະຫຍາຍຄຳສັ່ງແນະນຳເລກທີ 06 ຂອງນາຍົກລັດຖະມົນຕີ ແລະ ຄຳສັ່ງແນະນຳເລກທີ 758 ຂອງທ່ານເຈົ້າແຂວງ ສຫວັນນະເຂດ ຢ່າງເຄັ່ງຄັດ ເຊິ່ງທາງເມືອງແມ່ນໄດ້ອອກແຈ້ງການວ່າດ້ວຍ ຂໍ້ຫ້າມ ແລະ ມາດຕະການ ແນໃສ່ສະກັດກັ້ນປ້ອງກັນການລະບາດ,ຄວບຄຸມ ແລະ ກຽມຄວາມພ້ອມເພື່ອຕ້ານພະຍາດໂຄວິດ 19 ພ້ອມທັງເພີ່ມມາດຕະການໃນການຄຸ້ມຄອງລາຄາສິນຄ້າໃນທົ່ວເມືອງ ເພື່ອບໍ່ໃຫ້ສວຍໂອກາດກັກຕຸນສິນຄ້າໃນໄລຍະການແຜ່ລະບາດຂອງພະຍາດໂຄວິດ 19 ພ້ອມກັນນີ້ທາງເມືອງຍັງໄດ້ມີມາດຕະການເພີ່ມຂຶ້ນອີກ ໂດຍການຕັ້ງດ່ານກວດຄົນ ແລະ ພາຫະນະເຂົ້າອອກເມືອງ 2 ຈຸດຄື: ຈຸດກວດກາບ້ານເຄືອເຂົາກາດ ຫາ ເມືອງເຊບັ້ງໄຟ ແລະ ຈຸດກວດກາບ້ານປາກເຊບັ້ງໄຟ ຫາ ເມືອງໜອງບົກ,ເອົາໃຈໃສ່ໃນການໂຄສະນາເຄື່ອນທີ່ເຊິ່ງຈະໄດ້ມີການລົງໂຄສະນາເຜີຍແຜ່ນັບແຕ່ວັນທີ 14 ເມສາ 2020 ເປັນຕົ້ນໄປຈົນຄົບ 54 ບ້ານໃນທົ່ວເມືອງ ແລະ ແຕ່ງຕັ້ງໜ່ວຍໂຄສະນາຂອງສາທາລະນະສຸກເມືອງ ໃນການເຄື່ອນທີ່ໂຄສະນາຢູ່ແຕ່ລະສູນກັກກັນແຮງງານຈົນຄົບ 13 ສູນໃນທົ່ວເມືອງ.

ໃນວັນທີ 10 ເມສາ 2020 ໄດ້ຕົກລົງສ້າງຕັ້ງສູນຂອງເມືອງຕື່ມອີກ ຢູ່ຫ້ອງການສຶກສາທິການ ແລະ ກິລາເມືອງ ເພື່ອຮອງຮັບເອົາແຮງງານລາວ ທີ່ລັກລອບເຂົ້າມາໂດຍບໍ່ຖືກຕ້ອງເຂົ້າສູນຂອງເມືອງຈົນຄົບ 14 ວັນຈຶ່ງຈະສົ່ງກັບບ້ານ. ໃນນັ້ນທົ່ວເມືອງມີສູນກັກກັນແຮງງານທີ່ມາຈາກປະເທດກຸ່ມສ່ຽງທັງໝົດ 13 ສູນ,ມີແຮງງານເຂົ້າສູນແຕ່ວັນທີ 24 ມີນາ ຈົນຮອດວັນທີ 10 ເມສາ ມີທັງໝົດ 1.337 ຄົນ,ຍິງ 677 ຄົນ ອອກຈາກສູນແລ້ວ 975 ຄົນ,ຍິງ515 ຄົນ ຍັງຄ້າງສູນປັດຈຸບັນ 362,ຍິງ 162 ຄົນ ແລະ ທາງເມືອງກໍ່ໄດ້ກະກຽມສະຖານທີ່ຮອງຮັບກໍລະນີມີການລະບາດ 2 ຈຸດຄື: ຢູ່ໂຮງຮຽນອະນຸບານເມືອງ ແລະ ສຸກສາລາບ້ານເວີນ. ທັງນີ້ກໍ່ເພື່ອກຽມຄວາມພ້ອມຮອບດ້ານໃນການເຝົ້າລະວັງ ແລະ ປ້ອງກັນການລະບາດຂອງພະຍາດໂຄວິດ 19 ພາຍໃນເມືອງໄຊບູລີ ໃຫ້ມີປະສິດທິພາບສູງຂຶ້ນກວ່າເກົ່າ.

ຂ່າວ: ອັກສອນສິນ ພົມມະຈັນ
savannakhet Medialaos