ປະຕິບັດຄຳສັ່ງເລກທີ 07/ຄລສພ ໃຫ້ສຳເລັດຜົນ

0
714

ປະຕິບັດຄຳສັ່ງເລກທີ 07/ຄລສພ ໃຫ້ສຳເລັດຜົນ

        ຢູ່ປະເທດເຮົາພວມປະເຊີນໜ້າກັບການເລີ້ມຕົ້ນລະບາດຂອງເຊື້ອພະຍາດ Covid-19; ຫາກເພື່ອນຜູ້ອ່ານຕິດຕາມຂ່າວສານ-ບ້ານເມືອງຈະເຫັນວ່າພັກ-ລັດ ຖະບານໄດ້ມີການກະກຽມຄວາມພ້ອມແຕ່ຫົວທີ ເພື່ອເຝົ້າລະວັງສະກັດກັ້ນ; ປ້ອງກັນ ແລະ ຮັບມືແກ້ໄຂການລະບາດ ແຕ່ກໍ່ເປັນເລື່ອງທີ່ບໍ່ສາມາດຫຼີກລ່ຽງໄດ້. ບັນດາທິດຊີ້ນຳ ແລະ ມາດຕະການຕ່າງໆທີ່ພັກ-ລັດວາງອອກ; ໂດຍລວມເຫັນວ່າທົ່ວສັງຄົມໄດ້ໃຫ້ການສະໜັບສະໜູນ ແລະ ເຂົ້າຮ່ວມຂະບວນການເຝົ້າລະວັງ; ປ້ອງກັນ; ສະກັດກັ້ນ ແລະ ແກ້ໄຂພະຍາດ Covid-19 ບໍ່ໃຫ້ເຂົ້າສູ່ຂັ້ນວິກິດ. ແຕ່ຄຽງຄູ່ກັນນັ້ນ ກໍ່ຍັງມີຫຼາຍບັນຫາທີ່ຕ້ອງໄດ້ເພີ່ມທະວີການຊີ້ນຳ ນຳພາຂອງຄະນະພັກ ແລະ ອົງການປົກຄອງແຕ່ລະຂັ້ນ ເພື່ອຮັບປະກັນການເອົາຊະນະໃນບັ້ນຮົບຕ້ານພະຍາດ Covid-19.

        ດ້ວຍຈິດໃຈດັ່ງກ່າວ ຄະນະເລຂາທິການສູນກາງພັກຈີ່ງອອກຄຳສັ່ງເລກທີ 07/ຄລສພ ລົງວັນທີ 6 ເມສາ 2020 ວ່າດ້ວຍເພີ່ມທະວີການນຳພາຊີ້ນຳຕໍ່ການປ້ອງກັນ; ສະກັດກັ້ນ ແລະ ແກ້ໄຂການລະບາດຂອງເຊື້ອພະຍາດຈຸລະໂລກ ອັກເສບປອດສາຍພັນໃໝ່ໂຄວິດ-19. ເຖີງ: ຄະນະພັກກະຊວງ; ອົງການ; ຄະນະພັກແຂວງ; ນະຄອນຫຼວງວຽງຈັນ.

ເນື້ອໃນສຳຄັນຂອງຄຳສັ່ງມີດັ່ງນີ້:

  • ພະຍາດ Covid-19 ແມ່ນໄພອັນຕະລາຍຮ້າຍແຮງທີ່ພວມຂົ່ມຂູ່ຕໍ່ຊີວິດ, ຊັບສິນຂອງປະຊາຊົນ, ການພັດທະນາສ້າງສາ ກໍ່ຄືຄວາມໝັ້ນຄົງຂອງປະເທດຊາດພວກເຮົາ. ທົ່ວພັກ, ລັດ, ກຳລັງປະກອບອາວຸດ ແລະ ທົ່ວປວງຊົນລາວທັງຊາດ ທັງມີຄວາມຮັບຜິດຊອບ, ທັງເປັນພັນທະ,  ໜ້າທີ່ໃນການຕິດຕາມ, ເຝົ້າລະວັງ, ປ້ອງກັນ, ສະກັດກັ້ນ ແລະ ແກ້ໄຂດ້ວຍຄວາມເປັນເຈົ້າການ. ຄະນະພັກ, ອົງການປົກຄອງແຕ່ລະຂັ້ນ ຕ້ອງຖືບັນຫາດັ່ງກ່າວເປັນວຽກສຳຄັນທີ່ມີລັກສະນະຍຸດທະສາດຮີບດ່ວນ ໃນການນຳພາຊີ້ນຳຂອງຕົນ ໃນໄລຍະນີ້, ເຊີ່ງຕ້ອງໄດ້ສຸມການນຳພາ, ຊີ້ນຳ-ບັນຊາ, ກຳລັງຄົນ, ພາຫະນະ, ວັດຖຸ-ເຕັກນິກຢ່າງຈິງຈັງ ແລະ ມີຈຸດສຸມ, ປຽບເໝືອນການຊີ້ນໍາບັນຊາໃນພາວະສົງຄາມ.

ຄາດໝາຍໃຫຍ່ ແມ່ນຕ້ອງເດັດຂາດຕໍ່ມາດຕະການຄວບຄຸມການແຜ່ລະບາດໃຫ້ຢູ່ໃນວົງຈຳກັດທີ່ສຸດ, ເຮັດໃຫ້ການສູນເສຍດ້ານຊີວິດໜ້ອຍທີ່ສຸດເທົ່າທີ່ຈະເຮັດໄດ້, ຮັບປະກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມຢ່າງໜັກແໜ້ນ, ເດັດຂາດບໍ່ໃຫ້ມີຄວາມວຸ້ນວາຍເກີດຂື້ນໃນສັງຄົມ.

  • ໃຫ້ຄະນະພັກແຕ່ລະຂັ້ນ ສືບຕໍ່ນຳພາການເມືອງແນວຄິດໃຫ້ສະມາຊິກພັກ, ພະນັກງານ, ທະຫານ, ຕຳຫຼວດ ແລະ ປະຊາຊົນ ຮັບຮູ້ເຂົົົົ້າໃຈສະພາບຄວາມເປັນຈິງ ແລະ ໄພອັນຕະລາຍຂອງພະຍາດ Covid-19 ແລະ ຕື່ນຕົວເປັນເຈົ້າການປ້ອງກັນຕົນເອງ, ຄອບຄົວ ແລະ ຜູ້ອື່ນ ດ້ວຍການຈັດຕັ້ງປະຕິບັດຢ່າງເຂັ້ມງວດ ຕາມມາດຕະການທີ່ລັດຖະບານ ກໍ່ຄືຄະນະສະເພາະກິດວາງອອກ ເພື່ອຜ່ານຜ່າຄວາມຫຍຸ້ງຍາກ ແລະ ພ້ອມກັນເອົາຊະນະພະຍາດດັ່ງກ່າວ.

ກ່ອນອື່ນໝົດຕ້ອງເລີ່ມຈາກສຳນັກງານ, ອົງການຂອງພັກ-ລັດ (ລວມທັງໝົດລະບົບການເມືອງ) ແຕ່ລະຂັ້ນ, ແຕ່ລະຮາກຖານຕ້ອງຮັບປະກັນການປ້ອງກັນ ແລະ ຕ້ານພະຍາດ Covid-19. ສະມາຊິກພັກແຕ່ລະສະຫາຍຕ້ອງເປັນເຈົ້າການ ແລະ ເປັນແບບຢ່າງນໍາໜ້າ, ເຮັດແທ້ທຳຈິງຕໍ່ການປ້ອງກັນສະກັດກັ້ນ ແລະ ແກ້ໄຂພະຍາດ Covid-19 ຖືບັນຫາດັ່ງກ່າວເປັນຂະບວນການຕົວຈິງໃນການກະກຽມ ແລະ ດຳເນີນກອງປະຊຸມໃຫຍ່ຂອງຄະນະພັກແຕ່ລະຂັ້ນ ກໍ່ຄືຄວາມອາດສາມາດນຳພາຕົວຈິງຂອງຄະນະພັກ, ການຄຸ້ມຄອງ-ບໍລິຫານຂອງອົງການປົກຄອງຢູ່ແຕ່ລະບ່ອນ.

  • ໃຫ້ຄະນະພັກ, ອົງການປົກຄອງແຕ່ລະຂັ້ນກວດກາຄືນດ້ານການຈັດຕັ້ງ, ການນຳພາຊີ້ນຳໂດຍສະເພາະ ການແຕ່ງຕັ້ງຄະນະສະເພາະກິດຂັ້ນຂອງຕົນ (ແຕ່ຂັ້ນກະຊວງ, ອົງການ, ແຂວງ, ເມືອງ ຮອດຂັ້ນບ້ານ) ເຊີ່ງປະກອບດ້ວຍພາກສ່ວນກ່ຽວຂ້ອງ ພາຍໃຕ້ການນຳພາໂດຍກົງຂອງສະຫາຍເລຂາຄະນະພັກ ເພື່ອນຳພາປະຕິບັດຕົວຈິງ, ເຮັດໃຫ້ການແກ້ໄຂບັນຫາມີຄວາມຮັດກຸມ, ແທດຕົວຈິງ ແລະ ໄດ້ຮັບຜົນສຳເລັດ.
  • ໃຫ້ຄະນະພັກ, ອົງການປົກຄອງແຕ່ລະຂັ້ນນຳພາການຄຸ້ມຄອງ, ກວດກາ ແລະ ຈັດຕັ້ງສະ ໜອງສິນຄ້າທີ່ຈຳເປັນໃຫ້ແກ່ສັງຄົມ, ຫຼີກເວັ້ນການສວຍໂອກາດໃນທຸກຮູບແບບໃນຍາມຂັບຂັນ, ຫຍຸ້ງຍາກ, ທຸກການລະເມີດຕ້ອງໄດ້ຮັບການລົງໂທດຕາມກົດໝາຍ.

ສະເໜີໃຫ້ລັດຖະບານສືບຕໍ່ຄົ້ນຄ້ວາ, ມີນະໂຍບາຍດ້ານຕ່າງໆຮອງຮັບທີ່ສົມເຫດສົມຜົນ ຕໍ່ບັນດາພາກສ່ວນເສດຖະກິດ, ຫົວໜ່ວຍທຸລະກິດ, ຜູ້ປະກອບການກໍ່ຄືຜູ້ອອກແຮງງານທີ່ຖືກຜົນກະທົບຈາກ Covid-19 ດ້ວຍມາດຕະການຕົວຈິງທີ່ເປັນຮູບປະທໍາ, ພ້ອມກັນນັ້ນກໍ່ໃຫ້ມີການພິຈາລະນາຢ່າງຖີ່ຖ້ວນ, ຮອບດ້ານ ຕໍ່ມາດຕະການຕ່າງໆທີ່ຈະວາງອອກໃໝ່ ເພື່ອບໍ່ສ້າງຄວາມກົດດັນ ຫຼື ສ້າງຜົນເສຍຫາຍຕໍ່ລະບົບການຜະລິດ-ທຸລະກິດ.

  • ໃຫ້ເອົາໃຈໃສ່ ແລະ ເພີ່ມທະວີການສະໜອງຮອບດ້ານ ວິທະຍາສາດ, ເຕັກນິກ-ຂ່າວສານ. ດ້ານນຶ່ງແມ່ນຮັບປະກັນຄວາມໄວໃນການນຳພາ ແລະ ເຜີຍແຜ່ຂ່າວສານ ທີ່ຖືກຕ້ອງ, ຊັດເຈນໃຫ້ທົ່ວສັງຄົມຮັບຮູ້ເຂົ້າໃຈ ແລະ ເຂົ້າຮ່ວມປະຕິບັດຢ່າງພ້ອມພຽງ; ດ້ານສອງ ແມ່ນຮັບປະກັນໃຫ້ເຈົ້າໜ້າທີ່, ພະນັກງານຂອງພັກ-ລັດ ແຕ່ລະຂັ້ນ ກໍ່ຄືສັງຄົມໄດ້ເຄື່ອນໄຫວວຽກງານຜ່ານເຄື່ອງມືຂອງລະບົບອຸປະກອນທັນສະໄໝ, ແກ້ໄຂບັນຫາຢ່າງວ່ອງໄວ, ທັນການ ໂດຍບໍ່ປະໃຫ້ວຽກຖືກແກ່ຍາວ.
  • ໃຫ້ເອົາໃຈໃສ່ເປັນພິເສດ ຕໍ່ຖັນແຖວແພດໝໍ ທີ່ເປັນນັກຮົບປະຈັນບານຕໍ່ສູ້ໂດຍກົງກັບພະຍາດ Covid-19 ເປັນຕົ້ນ ການປະກອບເຄື່ອງມື, ອຸປະກອນການແພດ ແລະ ການປ້ອງກັນຕິດເຊື້ອຢ່າງເປັນລະບົບ, ຄົບຊຸດ. ພ້ອມນັ້ນກໍ່ຕ້ອງໃຫ້ກຳລັງໃຈ, ປະຕິບັດນະໂຍບາຍທີ່ເໝາະສົມ, ທັນການຕໍ່ເຂົາເຈົ້າ ເພື່ອເຮັດໜ້າທີ່ ທີ່ສຳຄັນນີ້.

ໃຫ້ຈັດຕັ້ງດຳເນີນມາດຕະການປ້ອງກັນ, ສະກັດກັ້ນ ແລະ ປີ່ນປົວພະຍາດຕາມມາດຕະຖານດ້ານສາທາລະນະສຸກຢ່າງເຂັ້ມງວດ, ບໍ່ໃຫ້ມີການລະເມີດ ຫຼື ຝ່າຝືນ ເຊີ່ງຈະນຳຜົນເສຍຫາຍຕໍ່ສັງຄົມໃນວົງກ້ວາງ, ໃຫ້ເຈົ້າໜ້າທີ່ປົກຄອງ, ທະຫານ, ຕຳຫຼວດທຸກຂັ້ນ ດຳເນີນມາດຕະການບໍລິຫານທີ່ເຂັ້ມງວດ, ເດັດຂາດ, ຕໍ່ບຸກຄົນ, ການຈັດຕັ້ງ, ພາກສ່ວນຕ່າງໆທີ່ລະເມີດຄຳສັ່ງ ກໍ່ຄືມາດຕະການຂອງລັດຖະບານ, ຂອງຄະນະສະເພາະກິດ ແລະ ຂອງອົງການປົກຄອງທ້ອງຖີ່ນວາງອອກ.

  • ໃຫ້ຄະນະພັກ-ຄະນະບັນຊາ ຂອງກຳລັງປ້ອງກັນຊາດ-ປ້ອງກັນຄວາມສະຫງົບ ມີການຊີ້ນຳ ແລະ ສັ່ງກຳລັງຢູ່ໃນທ່າກຽມພ້ອມ ເພື່ອຊ່ວຍໜູນການແກ້ໄຂບັນຫາໃນກໍລະນີສະພາບການຜັນແປໄປ ແລະ ມີຄວາມຮຸນແຮງເພີ່ມຂື້ນ.
  • ໃຫ້ຄະນະປະຈຳພັກແຂວງ, ຄະນະປະຈຳພັກນະຄອນຫຼວງວຽງຈັນ ກໍ່ຄືຄະນະພັກກະຊວງ, ອົງການລາຍງານປະຈໍາອາທິດ ກ່ຽວກັບສະພາບການນໍາພາຊີ້ນໍາແກ້ໄຂພະຍາດ Covid-19 ກໍ່ຄືການແກ້ໄຂບັນຫາເສດຖະກິດ-ສັງຄົມໃນໄລຍະນີ້ ຕໍ່ຄະນະເລຂາທິການສູນກາງພັກ ໂດຍຜ່ານຫ້ອງວ່າການສູນກາງພັກ ເພື່ອລາຍງານກົມການເມືອງສູນກາງພັກ ໃຫ້ທິດຊີ້ນຳຢ່າງເປັນລະບົບ, ຕໍ່ເນື່ອງ ແລະ ມີປະສິດທິຜົນ.
  • ທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ຈົ່ງເຊີດຊູມານະຈິດປະຕິວັດ, ນໍ້າໃຈຮັກຊາດ, ຄວາມເປັນເຈົ້າຕົນເອງ, ເປັນເຈົ້າປະເທດຊາດ, ເສີມຂະຫຍາຍມູນເຊື້ອສາມັກຄືເປັນປຶກແຜ່ນຂອງປະຊາຊົນລາວ, ຊາດລາວ ພາຍໃຕ້ການນຳພາຂອງພັກ-ລັດ, ຈົ່ງໄດ້ຮ່ວມແຮງ, ຮ່ວມໃຈກັນປະຕິບັດກົດໝາຍ, ຄຳສັ່ງ, ລະບຽບການຕ່າງໆ, ມີຄວາມເສຍສະລະ, ປະກອບສ່ວນສຳຄັນເຂົ້າໃນການຊ່ວຍປະເທດຊາດ, ບໍ່ແຕກຕື່ນ, ແຕ່ກໍ່ມີສະຕິທຸ່ນທ່ຽງ, ບໍ່ປະໝາດ, ບໍ່ສ້າງຄວາມສັບສົນຫຍຸ້ງຍາກ, ບໍ່ໃຊ້ອາລົມ ແຕ່ໃຊ້ເຫດຜົນໃນການແກ້ໄຂບັນຫາຕ່າງໆ. ເດັດດ່ຽວເຂົ້າຮ່ວມພາລະກິດປ້ອງກັນ, ສະກັດກັ້ນ ແລະ ແກ້ໄຂການລະບາດຂອງພະຍາດ Covid-19 ໃຫ້ຜ່ານພົ້ນໄປ ແລະ ມີຜົນສໍາເລັດຢ່າງຈົບງາມ.

ຂໍຮຽກຮ້ອງໃຫ້ພາກສ່ວນກ່ຽວຂ້ອງເປັນເຈົ້າການປະຕິບັດຄຳສັ່ງເລກທີ 07/ຄລສພ ບົນຈິດໃຈບຸກທະລຸ ເພື່ອພ້ອມກັນຜ່ານຜ່າເຫດການວິກິດໄປດ້ວຍດີ.

ໂດຍ: ທິດດີ.