ວັນທີ 31/03/2020 ໜ້າອອນລາຍພວກເຮົາໄດ້ລົງພິມບົດໃນຫົວຂໍ້: ກຳແໜ້ນຄຳສັ່ງເລກທີ 06/ນຍ ( 29/03/2020).

        ເນື້ອໃນຂອງບົດໄດ້ນຳເອົາເນື້ອໃນສຳຄັນຂອງຄຳສັ່ງລົງລະອຽດພໍສົມຄວນ; ແຕ່ຕ້ອງຍອມຮັບວ່າໃນການຈັດຕັ້ງປະຕິບັດມີການລະເມີດ ແລະ ສວຍໃຊ້ຄຳສັ່ງດັ່ງທີ່ພວກເຮົາເຫັນຕາມ ໜ້າຂ່າວທາງການ ແລະ ໜ້າເຟດສບຸກ. ການລະເມີດພົ້ນເດັ່ນແມ່ນຂໍ້ທີ່ 7 ເຊີ່ງຫ້າມຈັດກິດຈະກຳ, ປະຊຸມ ຫຼື ໂຮມຊຸມນຸມຕ່າງໆທີ່ມີຜູ້ເຂົ້າຮ່ວມຫຼາຍກ່ວາສິບຄົນ…. ໃນນັ້ນເພີ່ນເນັ້ນງານລ້ຽງສັງສັນຕ່າງໆ ຈຸດນີ້ລະຄົນລະເມີດ ເລີຍພາໃຫ້ການແຜ່ເຊື້ອວ່ອງໄວຫຼາຍຂື້ນຢູ່ນະຄອນຫຼວງວຽງຈັນ… ນອກນັ້ນຢູ່ຕ່າງແຂວງຍັງມີການຊຸມແຊວ; ຈັດງານບຸນປະເພນີ ແລະ ມໍ່ໆມານີ້ກໍ່ເຫັນບາງເມືອງຍັງເຮັດພິທີສົງພະຢູ່ວັດທີ່ມີຫຼາຍຄົນ. ຕໍ່ການລະເມີດນີ້ ເວລາເຈົ້າໜ້າທີ່ລົງກວດກາການລົງໂທດບໍ່ຄ່ອຍເຂັ້ມງວດປານໃດ. ມີການໂຍະຍານກັນໂພດ ເລີຍພາໃຫ້ຄົນບໍ່ເກງກົວ ມີຄຳເຫັນວ່າ: ສຳລັບຜູ້ຊຸມແຊວສັງສັນຕ່າງໆທີ່ແຜ່ເຊື້ອໃສ່ຄົນອື່ນນັ້ນ ເວລາປີ່ນປົວເຊົາອອກໂຮງໝໍແລ້ວ ຕ້ອງນຳມາປັບໃໝ ແລະ ລົງໂທດຕັດອິດສະຫຼະພາບ ເຊັ່ນດຽວກັນກັບພວກໂພດສຂ່າວປອມປັ່ນປ່ວນສັງຄົມວ່າຊັ້ນ…. ສ່ວນການຈັດງານປະເພນີ, ງານສົງພະບຸນປີໃໝ່ລາວ ກໍ່ຄວນລົງໂທດເຈົ້າໜ້າທີ່ ຜູ້ມີອໍານາດ ທີ່ໃຫ້ອະນຸມັດດ້ວຍການຕຳນິຢ່າງໜັກ…. ປົດຕຳແໜ່ງ ຫຼື ຍົກຍ້າຍໄປຮັບໜ້າທີ່ ທີ່ຕໍ່າກ່ວາເກົ່າ.

        ປະກົດການລະເມີດທີ່ສັງຄົມກ່າວຂານ ແລະ ໃຫ້ຄວາມສົນໃຈ ແມ່ນແຈ້ງການເກັບຄ່າທຳນຽມຕ່າງໆໃນການອອກເອກະສານເຂົ້າ-ອອກເມືອງ ແລະ ບ້ານ ກໍ່ຄືການປັບໃໝປະຊາຊົນ ເຊີ່ງສັງຄົມຖືວ່າເປັນການສວຍໂອກາດໃນຍາມຊາດ-ບ້ານເມືອງເກີດວິກິດຈາກພະຍາດລະບາດ Covid-19. ປະກົດການນີ້ແຜ່ລາມຈົນວ່າ ຫ້ອງວ່າການສໍານັກງານນາຍົກອອກແຈ້ງການເລກທີ 479/ຫສນຍ ລົງວັນທີ 13/4/2020 ຫ້າມເກັບເງິນຄ່າທໍານຽມເຫຼົ່ານັ້ນ. ຜ່ານມາການອອກແຈ້ງການ ແລະ ການລຶບລ້າງແຈ້ງການໂດຍໃຫ້ເຫດຜົນຕ່າງໆນາໆ ນັ້ນກໍ່ເຫັນວ່າຍັງບໍ່ສົມເຫດສົມຜົນເທົ່າໃດ! ມີຄຳເຫັນວ່າ: ຂັ້ນເທີງຂອງຜູ້ເຊັນແຈ້ງການຄວນຕຳນິຕິຊົມ. ໃຫ້ຂຽນໃບສຳຫຼວດ… ປົດຕຳແໜ່ງ ຫຼື ຍົກຍ້າຍໄປຮັບໜ້າທີ່ອື່ນທີ່ຕໍ່າກ່ວາເກົ່າ. ໃນຖານະຜູ້ບໍລິຫານ ຕ້ອງເປັນແບບຢ່າງວ່າຊັ້ນ! ນັ້ນຄືຫາງສຽງຕໍ່ຜູ້ລະເມີດຄຳສັ່ງເລກທີ 06/ນຍ ນໍ! ແຕ່ວ່າໃນພາກປະຕິບັດຕົວຈິງ ການຈັດຕັ້ງເພີ່ນກໍ່ເບີ່ງເຫດ ເບີ່ງຜົນທີ່ແນ່ນອນກໍ່ຕ້ອງລົງວິໃນ ໃສ່ລະບຽບຕາມກົດໝາຍບ້ານເມືອງ.

        ຜູ້ລະເມີດຄຳສັ່ງເລກທີ 06/ນຍ ຕ້ອງຖືກລົງໂທດ… ບໍ່ມີໃຜດອກຊິລອດເນີ!

ໂດຍ: ທິດດີ.