ໃນຕອນເຊົ້າວັນທີ 28 ສິງຫາ 2019ນີ້ຢູ່ຫ້ອງປະຊຸມພະແນກສຶກສາ ແລະ ກິລາແຂວງສະຫວັນນະເຂດໄດ້ຈັດກອງປະຊຸມທົບທວນ ຈັດຕັ້ງປະຕິບັດໂຄງການສົ່ງເສີມໃຫ້ເດັກນ້ອຍທຸກຄົນໄດ້ເຂົ້າຮຽນໃນຊັ້ນປະຖົມສຶກສາ ໄລຍະທີ 2 ແລະ ສະເໜີແຜນການຈັດຕັ້ງປະຕິບັດໃນສົກ 2019-2020ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ຄໍາພູນ ຕຸໄພທູນ ຮອງເຈົ້າແຂວງສະຫວັນນະເຂດ.

ໃນພິທີທ່ານ ນາງຫຼິງທອງ ແສງຕາວັນ ຫົວໜ້າພະແນກສຶກສາທິການ ແລະ ກິລາແຂວງ ກໍ່ໄດ້ກ່າວເປີດກອງປະຊຸມວ່າ:ນັບຕັ້ງແຕ່ໂຄງການ ອາຫານທ່ຽງ ຫລື ໂຄງການສົ່ງເສີມໃຫ້ເດັກນ້ອຍທຸກຄົນໄດ້ເຂົ້າຮຽນໃນຊັ້ນປະຖົມສຶກສາ ໄລຍະທີ 2 ໂດຍໄດ້ຮັບທຶນສະໜັບສະໜູນຊ່ວຍເຫຼືອຫຼ້າຈາກກະຊວງກະສິກຳສະຫະລັດອາເມລິກາ, ອົງການອາຫານໂລກ ແລະ CRS ,ໄດ້ຮັບການອະນຸມັດຈັດຕັ້ງປະຕິບັດຢ່າງເປັນທາງການ ໃນເດືອນ ສິງຫາ 2017, ໂຄງການນີ້ ກໍໄດ້ຂຸ້ນຂ້ຽວໃນການຈັດຕັ້ງປະຕິບັດ ໃຫ້ທ່ວງທັນກັບເວລາທີ່ກໍານົດໄວ້ ໃນບົດສະເໜີໂຄງການໃນຊ່ວງໄລນະ 1 ປີທີ່ຜ່ານ ຖືວ່າເປັນອີກປີໜຶ່ງ ທີ່ທຸກພາກສ່ວນໄດ້ປະກອບສ່ວນໃນການຈັດຕັ້ງປະຕິບັດຢ່າງຕັ້ງໜ້າ ເພື່ອຮັບປະກັນທັງຄຸນນະພາບ, ການມີສ່ວນຮ່ວມ ແລະ ຕາມຂອບເວລາທີ່ກໍານົດໄວ້,ໂດຍລວມພວກເຮົາສາມາດບັນລຸທຸກກິດຈະກໍາທີ່ວາງໄວ້ໃນປີທີ່ຜ່ານມາ ເຖິງວ່າຈະມີບາງກິດຈະກໍາ ທີ່ຕ້ອງໄດ້ດັດປັບວັນເວລາ ແລະ ການປະສານງານທີ່ຂຸ້ນຂ້ຽວ ແຕ່ທ້າຍສຸດພວກເຮົາກໍ່ສາມາດເຮັດຫລ້ອນກິດຈະກໍາເລົ່ານັ້ນ, ເຊິ່ງການປະຊຸມຄັ້ງນີ້ແມ່ນເລີ່ມແຕ່ວັນທີ 29-30 ຈະໃຊ້ເວລາສອງມື້ເຄີ່ງ.

ໂອກາດນີ້ທ່ານ ຄຳ ພູນຕຸ ໄພທູນ ຮອງເຈົ້າແຂວງສະຫວັນນເຂດ ກໍ່ໄດ້ມີຄຳເຫັນຕໍ່ກອງປະຊຸມຄັ້ງນີ້ວ່າ: ໃນສົກຮຽນ 2019-2020 ທີ່ຈະມາເຖິງນີ້ ກໍ່ເປັນບາດກ້າວໜຶ່ງທີ່ພວກເຮົາຈະຕ້ອງໄດ້ຜ່ານຜ່າຕໍ່ບັນດາອຸປະສັກ ແລະ ສິ່ງທ້າທາຍຕ່າງໆ ໂດຍສະເພາະກໍແມ່ນບັນດາເມືອງ, ບ້ານ ທີ່ນອນຢູ່ໃນໂຄງການສົ່ງເສີມໃຫ້ເດັກນ້ອຍທຸກຄົນໄດ້ເຂົ້າຮຽນຊັ້ນປະຖົມນີ້ ເຫັນວ່າຈະຕ້ອງໄດ້ຕັດສິນໃຈບຸກບືນຫຼາຍດ້ານ ເຊິ່ງຂ້າພະເຈົ້າຂໍມີຄຳເຫັນແລກປ່ຽນກັບບັນດາທ່ານໃນບາງວຽກງານສຳຄັນຕໍ່ກັບການບັນຫາຕົວຊີ້ວັດທາງດ້ານການສຶກສາ ເຫັນວ່າໃນ 07 ເມືອງຄື: ອຸທຸມພອນ, ອາດສະພອນ, ພະລານ, ພີນ,ເຊໂປນ, ວິລະບູລີ ແລະເມືອງນອງ ເມືອງເປົ້າໝາຍທີ່ມີໂຄງການນີ້ ຍັງມີຫຼາຍໆບ້ານ ຫຼາຍໂຮງຮຽນທີ່ບໍ່ສາມາດບັນລຸໄດ້ອັດຕາເຂົ້າຮຽນສຸດທິ ແລະ ໄປພ້ອມດຽວກັນນັ້ນ ອັດຕາການປະລະການຮຽນກໍຍັງສູງຢູ່ ສ່ວນຄຸນນະພາບຂອງການຮຽນ-ການສອນແມ່ນຍັງບໍ່ທັນໄດ້ເວົ້າເຖິງຄຸນນະພາບ; ດັ່ງນັ້ນ, ເຮັດແນວໃດເພື່ອຈະແກ້ໄຂບັນຫາດັ່ງກ່າວນີ້ ທາງຫົວໜ້າຫ້ອງການສຶກສາທິການ ແລະ ກິລາ ຕ້ອງສຸມທຸກຄວາມອາດສາມາດເພື່ອສົມທົບກັນກັບພາກສ່ວນອຳນາດການປົກຄອງທ້ອງຖິ່ນ ປຸກລະດົມຂົນຂວາຍໃຫ້ເຂົາເຈົ້າໄດ້ມີສ່ວນຮ່ວມໃນການນຳລູກຫຼານຂອງຕົນທີ່ຢູ່ໃນເກນອາຍຸດັ່ງກ່າວໄດ້ເຂົ້າມາຮ່ຳຮຽນໃຫ້ເປັນປົກກະຕິ ນັບທັງເດັກພິການກໍຄືເດັກທີ່ມີຄວາມຕ້ອງການພິເສດ ດ້ວຍການຍົກເອົາກົດໝາຍການສຶກສາພາກບັງຄັບນີ້ເຂົ້າມາເປັນບ່ອນອີງ.