ຫົວຂໍ້ຂອງບົດນີ້ແມ່ນຄຳຂວັນທີ່ທ່ານນາຍົກລັດຖະມົນຕີທອງລຸນ ສີສຸລິດ ຖະແຫຼງກ່ຽວກັບສະພາບການສະກັດກັ້ນ ແລະ ຕ້ານການລະບາດຂອງພະຍາດ Covid-19 ຢູ່ ສປປ ລາວ ຄັ້ງວັນພຸດ; ວັນທີ 15 ເມສາ 2020 ທີ່ຫ້ອງການສຳນັກງານນາຍົກລັດຖະມົນຕີ.

ເນື້ອໃນຄຳຖະແຫຼງ ມີບາງຈຸດສຳຄັນດັ່ງນີ້:

        ມື້ນີ້ຂ້າພະເຈົ້າ ແລະ ການນຳຂອງລັດຖະບານໄດ້ຮັບລາຍງານຈາກຄະນະສະເພາະກິດຂັ້ນສູນກາງ ກ່ຽວກັບສະພາບການລະບາດຂອງ Covid-19 ໃນທົ່ວປະເທດ ແລະ ການຕີລາຄາ, ທົບທວນຜົນຂອງການປະຕິບັດຄຳສັ່ງສະບັບເລກທີ 06/ນຍ ລົງວັນທີ 29 ມີນາ 2020 ນີ້. ໃນ 2 ອາທິດທີ່ຜ່ານມາ… ຂ້າພະເຈົ້າຮັບຮູ້ຢ່າງເລີກເຊີ່ງວ່າ: ພາຍໃຕ້ການນຳພາ-ຊີ້ນຳຂອງຄະນະພັກທຸກຂັ້ນ ແລະ ການອຳນວຍຄວບຄຸມຂອງອຳນາດການປົກຄອງຂັ້ນຕ່າງໆ ແຕ່ສູນກາງຮອດທ້ອງຖີ່ນ, ການປະຕິບັດຄຳສັ່ງໄດ້ດຳເນີນໄປຢ່າງຂຸ້ນຂ້ຽວ ແລະ ມີປະສິດທິຜົນດີ, ທຸກໆຄົນໃນສັງຄົມໄດ້ເຂົ້າຮ່ວມ ແລະ ຮັບຜິດຊອບຕາມພາລະບົດບາດຂອງຕົນເອງ. ສ້າງໄດ້ຂະບວນການທີ່ເປັນຮູບປະທຳຢ່າງແທ້ຈິງ ຍ້ອນເຫັນໄດ້ຄວາມສຳຄັນ ແລະ ຄວາມຈຳເປັນພາວະວິໄສ ຂອງບັນດາມາດຕະການຂອງຄຳສັ່ງສະບັບນີ້ ຊຶ່ງທຸກໆອົງການຈັດຕັ້ງແຕ່ເທີງລົງລຸ່ມ. ໄດ້ຜັນຂະຫຍາຍຢ່າງມີຄວາມຮັບຜິດຊອບ ແລະ ປະດິດສ້າງໄປໃນທາງທີ່ຖືກຕ້ອງ ແລະ ເປັນເອກະພາບກັນ. ຍ້ອນແນວນັ້ນພວກເຮົາ ຈຶ່ງສາມາດຍາດໄດ້ຜົນສຳເລັດເບື້ອງຕົ້ນໃນການຕໍ່ສູ້ກັບພະຍາດ Covid-19.

ຕາງໜ້າລັດຖະບານ, ຂ້າພະເຈົ້າຂໍຊົມເຊີຍດ້ວຍຄວາມຈິງໃຈ ມານະໂອກາດນີ້. ພິເສດ  ຂ້າພະເຈົ້າຢາກຂໍຝາກຄວາມຊົມເຊີຍ ແລະ ຮູ້ບຸນຄຸນໄປຍັງພະນັກງານແພດໝໍໃນທົ່ວປະເທດ ທີ່ໄດ້ເຮັດວຽກແຂ່ງກັບເວລາໂດຍບໍ່ຮູ້ອິດຮູ້ເມື່ອຍ, ດ້ວຍຄວາມເສຍສະຫຼະ, ຄວາມຮັບຜິດຊອບສູງ ທີ່ເຕັມໄປດ້ວຍຄວາມທ້າທາຍ ແລະ ຄວາມສ່ຽງເພື່ອປ້ອງກັນ ແລະ ປີ່ນປົວຄົນເຈັບ ໃນໄລຍະທີ່ຜ່ານມາຈົນຮອດປະຈຸບັນ ແລະ ພວກເພີ່ນກໍ່ຮູ້ຢູ່ສະເໜີວ່າ ພາລະກິດຂອງຕົນນີ້ຍັງຈະໄດ້ສືບຕໍ່ໄປຈົນເຖີງທີ່ສຸດຢ່າງບໍ່ທໍ້ຖອຍ.

        ຂ້າພະເຈົ້າ ຂໍຝາກຄວາມຂອບໃຈ ແລະ ຄວາມເຊື່ອໝັ້ນອັນໜັກແໜ້ນໄປຍັງຄະນະສະເພາະກິດ ທັງຂັ້ນສູນກາງ ແລະ ທ້ອງຖີ່ນ, ກຳລັງປ້ອງກັນຊາດ, ປ້ອງກັນຄວາມສະຫງົບ ແຕ່ສູນກາງເຖີງທ້ອງຖີ່ນ ທີ່ໄດ້ເຮັດວຽກຢ່າງມີຄວາມຮັບຜິດຊອບສູງຕະຫຼອດມາ, ໂດຍສະເພາະໃນ 2 ອາທິດທີ່ເຄັ່ງຮ້ອນມານີ້.

        ຂໍສະແດງຄວາມຂອບໃຈຢ່າງຈິງໃຈ ມາຍັງສື່ມວນຊົນທັງຫຼາຍ ທີ່ໄດ້ມີຄວາມພະຍາຍາມສູງ ເຮັດໜ້າທີ່ສຳຄັນໃນການເກັບກຳຂໍ້ມູນເຜີຍແຜ່ຂໍ້ມູນຂ່າວສານ ເພື່ອສື່ສານໃຫ້ປະຊາຊົນຢ່າງເປັນປະຈຳ. ໃຫ້ສັງຄົມໄດ້ຮັບຮູ້ຢ່າງຖືກຕ້ອງ, ທັນການ ແລະ ທົ່ວເຖີງ ທັງຍັງມີການໃຫ້ຄວາມຮູ້ ແລະ ແນະນຳກ່ຽວກັບວິທີທາງປະຕິບັດຕົນເອງ ທີ່ຖືກຕ້ອງໃຫ້ປະຊາຊົນຕະຫຼອດເວລາອີກດ້ວຍ.

        ພໍ່ແມ່ພີ່ນ້ອງທີ່ຮັກແພງ,

        ຂ້າພະເຈົ້້າ ມີຄວາມພາກພູມໃຈເປັນຢ່າງຍີ່ງ ແລະ ຮູ້ສຶກປະທັບໃຈທີ່ເຫັນວ່າ ໃນສະພາບການທີ່ຄັບຂັນນີ້ ນອກຈາກປະຊາຊົນເຮົາສ່ວນຫຼວງຫຼາຍໄດ້ຕື່ນຕົວປະຕິບັດຄຳສັ່ງ, ຄຳແນະນຳ ແລະ ຂໍ້ກຳນົດກົດລະບຽບຕ່າງໆ ທີ່ລັດຖະບານໄດ້ວາງອອກແລ້ວ ນັກທຸລະກິດ, ຜູ້ປະກອບການ, ບໍລິສັດ, ຫ້າງຮ້ານ, ບຸກຄົນ, ພົນລະເມືອງຈຳນວນບໍ່ໜ້ອຍຍັງໄດ້ສະແດງອອກເຖີງນໍ້າໃຈ ເອື້ອເຟື້ອເພື່ອແຜ່ ໂດຍໄດ້ເສຍສະຫຼະຊັບສິນເງິນຄຳຂອງຕົນ ຊ່ວຍສັງຄົມຜ່ານຫຼາກຫຼາຍຮູບແບບ, ຂ້າພະເຈົ້າຂໍສະແດງຄວາມຊົມເຊີຍ ແລະ ຮູ້ບຸນຄຸນເປັນຢ່າງຍີ່ງມານະໂອກາດນີ້.

        ນອກຈາກນັ້ນ, ໃນສະພາບກຳລັງຄັບຂັນຫຼໍແຫຼມນີ້ ບັນດາປະເທດເພື່ອນມິດຂອງພວກເຮົາ, ອົງການຈັດຕັ້ງສາກົນ ກໍ່ໄດ້ຍື່ນມືເຂົ້າມາຊ່ວຍເຫຼືອ ດ້ວຍຄວາມຫ່ວງໄຍ ແລະ ນໍ້າໃຈທີ່ເປັນມິດຢ່າງຈິງໃຈ, ພວກເຮົາຂໍຮັບເອົາການຊ່ວຍເຫຼືອອັນລໍ້າຄ່ານັ້ນ ແລະ ຂໍໃຫ້ການຊ່ວຍເຫຼືອນັ້ນນຳໄປໃຊ້ຢ່າງຖືກຈຸດໝາຍຢ່າງແທ້ຈິງ, ທັນການ ແລະ ຂໍໃຫ້ປະຊາຊົນເຮົາທຸກຄົນຈົ່ງພາກັນຮູ້ບຸນຄຸນຕໍ່ການຊ່ວຍເຫຼືອດັ່ງກ່າວ.

ບັນດາທ່ານ ບັນດາສະຫາຍ, ພໍ່ແມ່ພີ່ນ້ອງ ທີ່ຮັກແພງທັງຫຼາຍ.

        ຂ້າພະເຈົ້າຂໍຮຽນມາຍັງທຸກໆທ່ານໃຫ້ຊາບວ່າ ສະໜາມຮົບແຫ່ງສົງຄາມການຕ້ານສັດຕູໂຕຮ້າຍກາດ Covid-19 ຍັງບໍ່ທັນຈົບລົງເທື່ອ ຫາກຍັງເປັນໄປໄດ້ວ່າ ຈະດຸເດືອດ, ຂ້ຽວຂາດກ່ວານີ້ກໍ່ເປັນໄດ້, ເພາະປະເທດເຮົາ ແລະ ປະຊາຊົນເຮົາຍັງຢືນຢູ່ຕໍ່ໜ້າຄວາມສ່ຽງຫຼາຍດ້ານ ທີ່ຈະປະເຊີນໃນວັນຕໍ່ໜ້າທີ່ຈະມາເຖີງນີ້. ດັ່ງນັ້ນ ຂ້າພະເຈົ້າໃນນາມຕາງໜ້າລັດຖະບານ ຈຶ່ງຂໍໃຫ້ທຸກໆຄົນໃນທົ່ວສັງຄົມ ສືບຕໍ່ປະຕິບັດຢ່າງເຂັ້ມງວດ ແລະ ຖືກຕ້ອງຕາມຄຳສັ່ງເລກທີ 06/ນຍ, ລົງວັນທີ 29 ມີນາ 2020, ບັນດານິຕິກຳ, ຂໍ້ແນະນຳຂອງຄະນະສະເພາະກິດໃນການປ້ອງກັນ, ສະກັດກັ້ນ ແລະ ແກ້ໄຂການລະບາດຂອງ Covid-19 ຈະແກ່ຍາວໄປຕື່ມອີກ 14 ວັນ ຈົນຮອດວັນທີ 03 ພຶດສະພາ 2020. ຖ້າມີການປ່ຽນແປງແນວໃດ ຈຶ່ງແຈ້ງຕາມທີ່ຫຼັງ

        ການຕື່ນຕົວປະຕິບັດບັນດານິຕິກຳ ທີ່ປະກາດໃຊ້ມາແລ້ວ ແລະ ອາດປະກາດໃຊ້ຕື່ມອີກ ຕາມສະຖານະການທີ່ຜັນແປໃນເວລາຕໍ່ໜ້ານັ້ນຢ່າງເຂັ້ມງວດເຄັ່ງຄັດ, ແມ່ນພັນທະ, ໜ້າທີ່, ຄວາມຮັບຜິດຊອບຂອງທຸກພາກສ່ວນ, ທຸກການຈັດຕັ້ງ, ບຸກຄົນ ແລະ ນິຕິບຸກຄົນ ເພື່ອປ້ອງກັນຕົນເອງແຕ່ລະຄົນ, ປ້ອງກັນຄອບຄົວ, ຍາດພີ່ນ້ອງທີ່ຕົນຮັກ, ປ້ອງກັນຄົນອື່ນໃນສັງຄົມໃນການຕັດວົງຈອນການລະບາດ, ຕ້ອງຖືສະເໝີວ່າພວກເຮົາທຸກໆຄົນບໍ່ວ່າໃຫຍ່ ຫຼື ນ້ອຍ, ທຸກເພດ, ທຸກໄວ, ທຸກຊັ້ນວັນນະ ລ້ວນແຕ່ມີຄວາມສ່ຽງເທົ່າທຽມກັນທີ່ຈະຕິດເຊື້ອຈາກພະຍາດທີ່ຮ້າຍກາດນີ້ໄດ້ໃນທຸກໆຄົນ ແລະ ທຸກເວລາ. ການປະຕິບັດເຂັ້ມງວດຂອງແຕ່ລະຄົນມັນເປັນການຊ່ວຍພັກ-ລັດ, ຊ່ວຍລັດ, ຊ່ວຍແບ່ງເບົາການເປັນພາລະຂອງຄະນະສະເພາະກິດ ແລະ ແພດໝໍຂອງພວກເຮົາ ທີ່ກຳລັງເຮັດວຽກດ້ວຍຄວາມອິດເມື່ອຍເຕັມໄປດ້ວຍຄວາມສ່ຽງ, ຊ່ວຍແບ່ງເບົາພາລະຂອງສັງຄົມ, ຊ່ວຍກອບກູ້ເອົາຊີວິດຂອງປະຊາຊົນເຮົາ ທັງທາງກົງ ແລະ ທາງອ້ອມ.

        ລັດຖະບານ ຊາບດີເຖີງຄວາມປ່ຽນແປງ ວິຖີຊີວິດຂອງສັງຄົມເຮົາ ທີ່ເກີດຂື້ນຢ່າງກະທັນຫັນແບບນີ້. ມັນເປັນສີ່ງທີ່ບໍ່ເພີ່ງປາດຖະໜາທັ້ງໆທີ່ປະຊາຊົນເຮົາ ຄວນໄດ້ມີເສລິພາບໃນການດຳລົງຊີວິດ, ການເຄື່ອນໄຫວໄປມາຫາສູ່ກັນຢ່າງບໍ່ຈຳກັດໃດໆ, ກະທົບເຖີງທຸລະກິດທຸກລະດັບ ໃນການທຳມາຫາກິນ ອັນເປັນປົກກະຕິ ຕະຫຼອດເຖີງການມ່ວນຊື່ນເບີກບານໃນວັນສົງການປີໃໝ່ ຕາມປົກກະຕິທີ່ເປັນປະເພນີປະຕິບັດຜ່ານມາຫຼາຍຮ້ອຍພັນປີຂອງຊາດເຮົານັ້ນ, ມື້ນີ້ພວກເຮົາພັດຖືກຈຳກັດ… ນີ້ແຫຼະ ຄືພວກເຮົາພວມຢູ່ໃນສະຖານະການທີ່ບໍ່ເປັນປົກກະຕິ (ສະຖານະການສຸກເສີນ) ຂອງສະພາບການເກີດຂື້ນ, ແຕ່ມັນພັດຮຽກຮ້ອງໃຫ້ທຸກຄົນຕ້ອງໄດ້ເສຍສະຫຼະ, ເສຍສະຫຼະເພື່ອຕົນເອງ, ເສຍສະຫຼະເພື່ອຄວາມສະຫງົບສຸກຂອງສັງຄົມ ແລະ ເສຍສະຫຼະເພື່ອສະຖຽນລະພາບ ແລະ ຄວາມໝັ້ນຄົງຂອງປະເທດຊາດເຮົາ… ຖ້າພວກເຮົາພ້ອມກັນຜ່ານພົ້ນໄລຍະວິກິດນີ້ໄປໄດ້ ຄວາມຜາສຸກຮ່ວມກັນໃນວົງຄະນະຍາດແຫ່ງຊາດຂອງພວກເຮົາ, ຂອງຄອບຄົວເຮົາຈະກັບຄືນມາອີກຄັ້ງຢ່າງແນ່ນອນ.

        ໃນກອງປະຊຸມຄັ້ງຜ່ານມາ, ລັດຖະບານໄດ້ອອກຂໍ້ຕົກລົງສະບັບເລກທີ 31/ນຍ ທີ່ໄດ້ກຳນົດບັນດານະໂຍບາຍ ແລະ ມາດຕະການທາງດ້ານເສດຖະກິດ-ການເງິນ ເພື່ອຊ່ວຍແບ່ງເບົາການກະທົບທາງດ້ານເສດຖະກິດຂອງປະເທດເຮົາ, ຫວັງວ່າພາກສ່ວນກ່ຽວຂ້ອງຕ່າງໆ ຈະດຳເນີນການຢ່າງເປັນຮູບປະທຳ ແລະ ທັັນເວລາ. ພ້ອມກັນນັ້ນ ກໍ່ຂໍໃຫ້ທຸກຄອບຄົວ, ທຸກທ້ອງຖີ່ນ ຖືເອົາວິກິດການນີ້ເປັນກາລະໂອກາດ ລົງມືປະຕິບັດການເພີ່ມພູນຜະລິດຜົນ ເພື່ອຮັບມືກັບການຂາດແຄນສະບຽງອາຫານ ທີ່ຈະເກີດໄດ້ໃນອານາຄົດທັງເປັນການຊ່ວຍໃຫ້ເສດຖະກິດຂອງຊາດດີຂື້ນ.

        ຂ້າພະເຈົ້າ ຂໍຮຽກຮ້ອງໃຫ້ທຸກຄົນຈົ່ງມີສະຕິ, ຈົ່ງຢ່າສວຍໃຊ້ໃນຍາມຫຍຸ້ງຍາກນີ້ ໃຫ້ເປັນໂອກາດຂອງບຸກຄົນ, ກຸ່ມຄົນ ເພື່ອຫາຜົນປະໂຫຍດໃສ່ຕົນເອງ, ສ້າງຄວາມເດືອດຮ້ອນໃຫ້ປະຊາຊົນ ແລະ ສັງຄົມ, ປະຊາຊົນຈະບໍ່ອະໄພໃຫ້ໄດ້.

        ຂໍໃຫ້ທຸກຄົນມີສະຕິ, ຢ່າເຊື່ອຂ່າວລວງ, ຂ່າວລື, ຂ່າວອະກຸສົນ, ຂ່າວປັ່ນປ່ວນໃດໆ. ຂໍໃຫ້ຕິດຕາມຂ່າວທາງການ, ຂໍຢ່າປັກໃຈເຊື່ອກະແສທີ່ຝືນຕໍ່ກົດເກນແຫ່ງຄວາມເປັນຈິງ ແລະ ຄວາມເປັນທຳ. ຄວາມມີຈັນຍາທຳ ແລະ ຈັນຍາບັນຍັງຕິດແໜ້ນຢູ່ໃນຫົວໃຈຂອງຄົນລາວທີ່ຮັກຊາດ ທຸກສ່ວນຢູ່ຕະຫຼອດມາ ແລະ ຕະຫຼອດໄປ.

        ພວກເຮົາຕ້ອງສາມັກຄີກັນ, ທົ່ວທັງຊາດ ເປັນຈິດໜຶ່ງໃຈດຽວກັນ, ຄົນລາວເຮົາບໍ່ຖີ້ມກັນ, ໃນໄລຍະນີ້ຂໍໃຫ້ອົດທົນຢູ່ເຮືອນ, ລ້າງມືເລື້ອຍໆ, ໃສ່ຜ້າປິດປາກ, ປິດດັງ, ຢູ່ຫ່າງກັນ (ຮັກສາໄລຍະຫ່າງໃນສັງຄົມ) ບໍ່ເຕົ້າໂຮມກັນຫຼາຍຄົນ… ພວກເຮົາພ້ອມກັນສູ້ ຕ້ານກັບ Covid-19 ໄຊຊະນະຈະຕ້ອງເປັນຂອງພວກເຮົາທຸກຄົນ. ປະຕິບັດຄຳຂັວນ ″ຮ່ວມແຮງຮ່ວມໃຈຕ້ານ Covid-19 ແມ່ນພາລະກິດຂອງໝົດທຸກຄົນ″

        ທັງໝົດນັ້ນແມ່ນບາງເນື້ອໃນສຳຄັນທີ່ໝົດທຸກຄົນຕ້ອງໄດ້ເຊື່ອມຊຶມ ແລະ ພ້ອມກັນຈັດຕັ້ງປະຕິບັດ ເພື່ອເອົາຊະນະວິກິດການແຜ່ລະບາດຂອງພະຍາດ  Covid-19 ໃນຄັ້ງນີ້.

ໂດຍ: ທິດດີ.