ວັນທີ 18 ເມສາ 2020 ບໍ່ພົບຜູ້ຕິດເຊື້ອເພີ່ມ

0
292

ທ່ານ ຮສ ດຣ. ພູທອນ ເມືອງປາກ, ຮອງລັດຖະມົນຕີ ກະຊວງສາທາລະນະສຸກ ຜູ້ປະຈໍາການ ຄະນະສະເພາະກິດ

ທ່ານ ພົນຈັດຕະວາ ດຣ. ບົວສີງ ອີນທະວົງ ຫົວໜ້າກົມເສນາຮັກ, ຄະນະສະເພາະກິດຕ້ານພະຍາດລະບາດ ກະຊວງປ້ອງກັນປະເທດ

ທ່ານ  ພັນເອກ ດຣ. ສຸລິພັນ  ເພັດຈັນທະລາ ຫົວໜ້າການທະຫານໂຮງໝໍສູນກາງ 103 ກອງທັບປະຊາຊົນລາວ ລາຍງານວ່າ:

  1. ສະພາບການເຝົ້າລະວັງ COVID-19 ຢູ່ ສປປ ລາວ ຮອດ 5 ໂມງແລງ ຂອງວັນທີ 17 ເມສາ 2020
  2. ວຽກງານຈຸດຜ່ານດ່ານ

    ຈໍານວນຜູ້ເດີນທາງເຂົ້າມາມີທັງໝົດ 1,002  ຄົນ

  • ຜູ້ເດີນທາງຜ່ານດ່ານລາວ-ໄທ ທັງໝົດ 310 ຄົນ, ໃນນັັ້ນມີແຮງງານລາວທີ່ກັບມາແຕ່ໄທ 06 ຄົນຜ່ານດ່ານຊ່ອງເມັກ, ເຫຼືອນັ້ນແມ່ນພະນັກງານຂັບລົດບັນທຸກຂົນສິນຄ້າ
  • ຜູ້ເດີນທາງຜ່ານດ່ານລາວ-ຈີນ ທັງໝົດ 250 ຄົນ,​ ທັງໝົດແມ່ນພະນັກງານຂັບລົດບັນທຸກຂົນສົ່ງສິນຄ້າ
  • ຜູ້ເດີນທາງຜ່ານດ່ານລາວ-ຫວຽດ ທັງໝົດ 442 ຄົນ, ທັງໝົດແມ່ນພະນັກງານຂັບລົດບັນທຸກຂົນສົ່ງສິນຄ້າ
  • ຜູ້ເດີນທາງຜ່ານສະໜາມບິນ 00 ຄົນ
  • ໃນທຸກດ່ານແມ່ນໄດ້ກວດວັດ ອຸນຫະພູມຮ່າງກາຍ ແລະ ບໍ່ມີຄົນເປັນໄຂ້, ສຳລັບແຮງງານລາວທີ່ເຂົ້າມາໃໝ່ແມ່ນໄດ້ສົ່ງໄປຕິດຕາມຢູ່ສູນຈຳກັດບໍລິເວນທີ່ໄດ້ກຳນົດໄວ້ໃຫ້ຄົບ 14 ວັນ.
  • ການເຝົ້າລະວັງ ແລະ ວິເຄາະ
  • ໃນວັນທີ 17 ເມສາ 2020, ໄດ້ເກັບຕົວຢ່າງມາກວດທັງໝົດ 27 ຄົນ, ໃນນີ້ມີນະຄອນ ຫຼວງວຽງຈັນ 23 ຄົນ, ຫຼວງພະບາງ 01 ຄົນ, ສະຫວັນນະເຂດ 03 ຄົນ (ທັງ03 ຄົນແມ່ນແຮງງານລາວທີ່ກັບມາແຕ່ໄທ). ຜົນກວດທັງໝົດ 27 ກໍລະນີ ບໍ່ພົບເຊື້ອ. ໝາຍວ່າໃນວັນທີ 17 ເມສາ 2020 ບໍ່ມີກໍລະນີໃໝ່.
  • ນັບແຕ່ເດືອນມັງກອນ ຮອດ ວັນທີ 17 ເມສາ 2020 ໄດ້ເກັບຕົວຢ່າງມາກວດທັງ  ໝົດມີ 1,318 ຄົນ, ກວດພົບເຊື້ອທັງໝົດ 19 ຄົນ (06 ມື້ແລ້ວທີ່ບໍ່ມີຜູ້ຕິດເຊື້ອເພີ່ມ)
  • ຈໍານວນຜູ້ສໍາຜັດໃກ້ຊິດທັງໝົດ ທີ່ໄດ້ຕິດຕາມ ແຕ່ວັນທີ 09 ມີນາ – 17 ເມສາ 2020 ມີ ທັງໝົດ 313 ຄົນ,  ໝົດກໍານົດຕິດຕາມ ທັງໝົດ 263 ຄົນ, ຍັງສືບຕໍ່ຕິດຕາມທັງໝົດ 50 ຄົນ, ໃນນີ້ ຢູ່ນະຄອນຫຼວງວຽງຈັນ 24 ຄົນ (ໃນນັ້ນ 13 ຄົນ ແມ່ນຕິດຕາມຢູ່ໂຮງໝໍ 103, ຕິດຕາມຢູ່ເຮືອນ 10 ຄົນ ແລະ ອີກ 01 ຄົນ ແມ່ນຕິດຕາມຢູ່ເຮືອນສວນ (ໂດຍສະເລ່ຍຍັງອີກ 7ມື້ ຈີ່ງຄົບກຳນົດຕິດຕາມ 14 ວັນ).
  • ແຂວງ ໄຊສົມບູນ  26 ຄົນ ທັງໝົດຕິດຕາມຢູ່ ແຄ້ມພູຄຳ (ຍັງອີກ 1 ມື້ຈະໝົດກຳນົດ).
  • ສຳລັບ ການຕິດຕາມ ສະຖານທີ່ຈຳກັດບໍລິເວນ ແລະ ຜູ້ຈຳກັດບໍລິເວນ ຢູ່ເຮືອນ ໃນທົ່ວປະເທດ
  • ເລີ້ມແຕ່ວັນທີ 20 ມີນາ 2020 ມີແຮງງານລາວຈໍານວນຫຼວງຫຼາຍ ຈາກປະເທດໄທໄດ້ກັບເຂົ້າມາລາວ ຕາມຈຸດຜ່ານແດນຕ່າງໆ ມີທັງໝົດ 113,404 ຄົນ , ອໍານາດການປົກຄອງ ໄດ້ມີການຈັດກຽມສະຖານທີຈໍາກັດບໍລິເວນໃນແຕ່ລະເມືອງ, ກຸ່ມບ້ານທົ່ວປະເທດມີ 2,142 ສູນ ເຊິ່ງຮອງຮັບແຮງງານທັງໝົດ 68,534 ຄົນ ແລະ ໄດ້ຈໍາກັດບໍລິເວນຕົນເອງຢູ່ເຮືອນ 44,870 ຄົນ.
  • ມາຮອດວັນທີ 17 ເມສາ 2020 ທົ່ວປະເທດ ຍັງມີ 1,399 ສູນ, ມີຜູ້ຈຳກັດບໍລິເວນຢູ່ສູນ 17,775 ຄົນ, ຈໍາກັດບໍລິເວນຢູ່ເຮືອນ 9,031 ຄົນ, ເກັບຕົວຢ່າງມາກວດວິເຄາະຫາເຊື້ອ ມີທັງໝົດ 122 ຄົນ. ທັງໝົດບໍ່ພົບເຊື້ອ.
  • ການຕິດຕາມປີ່ນປົວຄົນເຈັບຢູ່ໂຮງໝໍ
  • ປະຈຸບັນຍັງມີຜູ້ຕິດເຊື້ອນອນຢູ່ໂຮງໝໍ 17 ຄົນ
  • ຈຳນວນ 03 ຄົນຢູ່ໂຮງໝໍແຂວງຫຼວງພະບາງ ເຫັນວ່າມີອາການຄົງຕົວ ຂັ້ນເບົາບາງ ຍັງຕິດຕາມການກວດຫາເຊື້ອເພື່ອຢັ້ງຢືນ.
  • ຈຳນວນ 14 ຄົນຢູ່ໂຮງໝໍມິດຕະພາບ ທັງໝົດເຫັນວ່າ ມີອາການເບົາບາງ ແລະ ຍັງຕິດຕາມການກວດຫາເຊື້ອເພື່ອຢັ້ງຢືນ.  
  • ຂໍ້ແນະນຳ

ບັນດາທ່ານທີ່ນັບຖື ແລະ ຮັກແພງ,

  • ຄະນະສະເພາະກິດພວກເຮົາໄດ້ຈັດຕັ້ງໃຫ້ມີພະນັກງານ ຮັບສາຍດ່ວນເຂົ້າມາ 165 ແລະ 166 ທັງໝົດ 31 ປ່ອງ, ໃນວັນທີ 17 ເມສາ ທັງໝົດ 4,085 ສາຍ, ໃນນີ້ ມີສາຍທີ່ສອບຖາມກ່ຽວກັບພະຍາດ COVID-19 ພຽງແຕ່ 632 ສາຍ ກວມເອົາ 15.4 % ເຫຼືອນັ້ນແມ່ນ ສາຍທີ່ໂທມາລົບກວນ. ຈຶ່ງຮຽກຮ້ອງໃຫ້ຜູ້ທີ່ນຳສາຍດ່ວນ ຈົ່ງພິຈາລະນາ ບໍ່ໃຫ້ເປັນການລົບກວນ ຜູ້ທີ່ສົນໃຈ ໃນການປ້ອງກັນ ການແຜ່ລະບາດຂອງພະຍາດ COVID-19.
  • ເຖິງວ່າ ສະພາບການຕິດເຊື້ອຢູ່ປະເທດຂອງເຮົາ ໄດ້ເວັ້ນໄລຍະຫ່າງມາໄດ້ 6 ວັນແລ້ວ ຜູ້ຕິດເຊື້ອປິ່ນປົວຢູ່ໂຮງໝໍ ກໍ່ໄດ້ອອກໂຮງໝໍ2 ຄົນແລ້ວ ແຕ່ພວກເຮົາ ຈະບໍ່ໄດ້ລົດລະການເຝົ້າລະວັງ  ຕິດຕາມຄົ້ນຫາ ຜູ້ສົງໄສທີ່ຈະຕິດເຊື້ອ ໂດຍສະເພາະຜູ້ທີ່ຍັງຈຳກັດບໍລິເວນຕົນເອງຢູ່ສູນ ແລະ ຢູ່ເຮືອນ ລວມທັງຜູ້ເດີນທາງຜ່ານຊາຍແດນເຂົ້າມາໃໝ່ ເພື່ອມາກວດວິເຄາະ ຢັ້ງຢືນພະຍາດໃຫ້ໄດ້ໄວ ແລະ ປິ່ນປົວຢ່າງທັນການ.
  • ພວກເຮົາໄດ້ສືກສາຮ່ວມກັບອົງການອະນາໄມໂລກເຫັນວ່າ ຂະບວນການລະບາດຂອງປະເທດໃກ້ຄຽງ ຫຼັງຈາກມີການຕິດເຊື້ອຄັ້ງທຳອິດຮອດ ມື້ທີ່ 40 ຈະແມ່ນມື້ທີ່ມີການລະບາດສູງສຸດ, ສະເພາະລາວເຮົາ ມາຮອດມື້ນີ້ກໍ່ເປັນມື້ທີ່ 26 ເຊີ່ງຈະຕ້ອງໄດ້ສືບຕໍ່ເຝົ້າລະວັງຢ່າງເຂັ້ມງວດ, ອີກບັນຫາໜື່ງ ປະຈຸບັນນີ້ ປະເທດທີ່ມີການລະບາດຜ່ອນຄາຍລົງແລ້ວນັ້ນ ກໍ່ຍັງກັບມີຜູ້ຕິດເຊື້ອຄືນໃໝ່ເຊີ່ງມີການວິເຄາະວ່າເຊື້ອອາດຈະຍັງຢູ່ນຳຄົນເຈັບທີ່ບໍ່ມີອາການສະແດງອອກ ໃນ 49 ວັນ

ສະນັ້ນ, ຈີ່ງຮຽກຮ້ອງໃຫ້ພໍ່ແມ່ປະຊາຊົນບັນດາເຜົ່າ ຈົ່ງສືບຕໍ່ຮ່ວມໄມ້ຮ່ວມມືເປັນເຈົ້າການຮ່ວມກັນປະຕິບັດຄຳສັ່ງ ເລກທີ 06/ນຍ ແລະ ບັນດາຂໍ້ແນະນຳຕ່າງໆຢ່າງເຂັ້ມງວດ ເພື່ອໃຫ້ສະພາບການລະບາດຂອງພະຍາດໂຄວິດຜ່ອນຄາຍລົງ ຈີ່ງຈະສາມາດກັບມາດຳລົງຊີວິດຕາມປົກກະຕິໄດ້. ຍ້ອນວ່າສະພາບການລະບາດທົ່ວໂລກຍັງສືບຕໍ່ມີຜູ້ຕິດເຊື້ອ ແລະ ເສຍຊີວິດເພິ່ມຂຶ້ນເປັນປະຈຳແຕ່ລະວັນ:

  • ສະພາບການລະບາດຂອງພະຍາດ COVID-19 ໃນທົ່ວໂລກ

ມາຮອດເວລາ 6:00 ໂມງເຊົ້າ ຂອງວັນທີ 18 ເມສາ 2020 ທົ່ວໂລກມີການລາຍງານການລະບາດທັງໝົດ 210 (ປະເທດ/ເຂດ).

  • ມີກໍລະນີຢັ້ງຢືນ ຜູ້ຕິດເຊື້ອພະຍາດ COVID-19 2,247,659 (ໃໝ່ 85,292)
  • ເສຍຊິວິດ 154,086 (ໃໝ່ 8,615
  • ປີ່ນປົວຫາຍດີ 546,743 ຄົນ (ໃໝ່ 23,680)
  • ມີບາງປະເທດ ຈຳນວນຄົນຕິດເຊື້ອມື້ດຽວ ມີເຖິງ 31,253 ຄົນ ແລະ ເສຍຊີວິດຫຼາຍກວ່າ 2,478 ຄົນ ຕໍ່ມື້
  • ອັດຕາຄວາມຮ້າຍແຮງເພີ້ມຂື້ນເປັນ 6.85% (ມື້ວານນີ້ 6.67%)
  •  ຂໍແກ້ຂ່າວໃນການຖະແຫຼງກ່ຽວກັບການຊ່ວຍເຫຼືອຈາກຕ່າງປະເທດ ສະເພາະປະເທດອາເມລິກາ ໄດ້ຊ່ວຍເຫຼືອ 02 ຄັ້ງ: ຄັ້ງທີ່ 1 ແມ່ນຊ່ວຍເຫຼືອອຸປະກອນການແພດມີມູນຄ່າ 9,980 ໂດລາ, ຄັ້ງທີ່ ສອງ ແມ່ນຊ່ວຍງົບປະມານ ມູນຄ່າ 1,9 ລ້ານໂດລາ ໃຫ້ອົງການອະນາໄມໂລກ, ຢູນີເຊັບ ແລະ ອົງການຊ່ວຍເຫຼືອເດັກສາກົນປະຈຳ ສປປ ລາວ ເຊີ່ງບໍ່ແມ່ນຈຳນວນເງີນ 100 ລ້ານໂດລາຕາມທີ່ເປັນຂ່າວລື.
  • ສຸດທ້າຍນີ້ ຮຽກຮ້ອງມາຍັງບັນດາທ່ານຈົ່ງພ້ອມກັນປ້ອງກັນຕົນເອງ, ປ້ອງກັນຄອບຄົວ ແລະ ຜູ້ທີ່ຮັກແພງ ໃກ້ຊິດກັບບັນດາທ່ານຈາກການຕິດເຊື້ອພະຍາດ ໂຄວິດ 19 ຖືວ່າແມ່ນພັນທະ ແລະ ຄວາມຮັບຜິດຊອບຂອງບັນດາທ່ານ ແລະ ເປັນການປະກອບສ່ວນອັນສຳຄັນໃຫ້ແກ່ປະເທດຊາດເພື່ອຜ່ານວິກິດຂອງການລະບາດພະຍາດໂຄວິດ 19.