ໃນວັນ 28 ສິງຫາ 2019 ນີ້ ຢູ່ທີ່ສະໂມສອນຂອງບ້ານອຸດົມມີໄຊ ເມືອງອຸທຸມພອນ ໄດ້ຈັດໃຫ້ມີພິທີເລື່ອນສະມາຊິກພັກສຳຮອງ ຂຶ້ນເປັນສະມາຊິກພັກສົມບູນ. ໃຫ້ກຽດເຂົ້າຮ່ວມເປັນປະທານ ມີສະຫາຍ ດຣ ບຸນໂຮງ ແສງອະລຸນ ກຳມະການພັກເມືອງ ຜູ້ຊີ້ນຳກຸ່ມບ້ານໄຊສົມບູນ, ສະຫາຍ ພົມມະຈັກ ນາແສນທອງ ຮອງຫົວໜ້າຫ້ອງການຈັດຕັ້ງເມືອງ, ສະຫາຍ ນາງດວງມາລາ ສິດທິຊົນ ຮອງຫົວໜ້າຫ້ອງການໂຄສະນາ-ອົບຮົມເມືອງ, ສະຫາຍ ພູວັນໄຊ ອິນສີຊຽງໃໝ່ ເລຂາຄະນະພັກຮາກຖານກຸ່ມບ້ານໄຊສົມບູນ, ຈາກນີ້ກໍ່ມີບັນດາສະຫາຍ ເລຂາໜ່ວຍພັກ, ຄະນະໜ່ວຍພັກ, ແຂກຖືກເຊີນ ຕະຫຼອດຮອດສະມາຊິກພັກ ພາຍໃນໜ່ວຍພັກເຂົ້າຮ່ວມ.

ໃນພິທີ ສະຫາຍ ຄຳມີໄຊ ສີວົງດາວ ເລຂາໜ່ວຍພັກບ້ານອຸດົມມີໄຊ ໄດ້ຂຶ້ນຜ່ານມະຕິຕົກລົງ ຂອງຄະນະປະຈຳພັກເມືອງ ວ່າດ້ວຍການເຫັນດີອະນຸມັດເລື່ອນສະມາຊິກພັກສຳຮອງ ຂຶ້ນເປັນສະມາຊິກສົມບູນ ຈຳນວນ 1 ສະຫາຍ ຊຶ່ງຜ່ານການຕີລາຄາຕະຫຼອດໄລຍະທີ່ເປັນສຳມະຊິກພັກສຳຮອງ ເຫັນວ່າສະຫາຍດັ່ງກ່າວ ມີຄວາມຫ້າວຫັນໃນການປະຕິບັດໜ້າທີ່ວຽກງານ, ມີຄວາມສາມັກຄີ, ຝຶກຝົນຫຼໍ່ຫຼອມຕົນເອງຈົນໄດ້ຮັບ ຄວາມໄວ້ເນື້ອເຊື່ອໃຈຈາກຄະນະພັກ, ສະມາຊິກພັກ ແລະ ມະຫາຊົນເປັນຢ່າງດີ.

ໂອກາດດຽວກັນນີ້ ສະຫາຍ ດຣ ບຸນໂຮງ ແສງອະລຸນ ກຳມະການພັກເມືອງ ຜູ້ຊີ້ນຳກຸ່ມບ້ານ ໄດ້ໃຫ້ກຽດ ໂອ້ລົມ ຊຶ່ງສະຫາຍໄດ້ສະແດງຄວາມຊົມເຊີຍຕໍ່ໜ່ວຍພັກບ້ານອຸດົມມີໄຊ ທີ່ສາມາດສ້າງສະມາຊິກໃໝ່ ແລະ ສະແດງຄວາມຍິນດີຮັບເອົາສະຫາຍເຂົ້າເປັນສະມາຊິກພັກສົມບູນ ຂອງພັກປະຊາຊົນປະຕິວັດລາວ. ພ້ອມກັນນັ້ນ ທ່ານຍັງໄດ້ໃຫ້ຄຳເຫັນຕໍ່ກັບສະມາຊິກພັກສົມບູນໃໝ່ ຈົ່ງໄດ້ເອົາໃຈໃສ່ສືບຕໍ່ກໍ່ສ້າງຕົນເອງ ໃຫ້ມີຄວາມຫັດແໜ້ນ ເຂັ້ມແຂງ ທາງດ້ານຫຼັກສະນະຫຼັກໝັ້ນ ທາງອຸດົມການເມຶອງ ແລະ ປະຕິບັດໜ້າທີ່ວຽກງານຂອງຕົນ ໃຫ້ມີຄວາມກ້າວໜ້າຍິ່ງໆຂຶ້ນ.